Ads by Google Ads by Google

Tautino se tama’ita’i i leoleo o lo o ia fa’atauina atu fualaau fa’asaina

Na taua e le tama’ita’i e 18 tausaga le matua lea ua molia e le malo, i lona umia fa’asolitulafono o vaega o fualaau fa’asaina, e ta’i $10 na ia fa’atauina atu ai tama’i taga pepa iila o lo o i ai vaega o le pauta fa’asaina, ae ta’i $5 na te fa’atauina atu ai le paipa o lo o fa’aaoga e ula ai le aisa.

 

O le taeao ananafi na tula’i ai i luma o le fa’amasinoga fa’aitumalo le tamaitai o Elsarina Lefatia  ina ua faila e le malo le moliaga mamafa e tasi fa’asaga ia te ia, o lona umia fa’asolitulafono lea o vaega o le pauta fa’asaina o le aisa ma le fa’amoemoe e tulei pe fa’atau atu i isi tagata.

 

O le mataupu na mafua ai ona taofia e leoleo ia Lefatia na afua mai i le afiafi o le aso To’ona’i na te’a nei, 25 Oketopa 2014 pe tusa o le itula e 3:53 i le afiafi i se vaega o le alatele i Tafuna, ina ua taumafai leoleo e taofi se pikiapu lanuuliuli ae sa atili ai ona alu i le atoa ma vaaia ai le afe i tua i le auala ‘alo i Futiga e aga’i atu i le LE AUTE, ma fa’atonu ai loa e le Ta’ita’i Uati ia leoleo na tulia le ta’avale ina ia toe fo’i atu.

 

Pe tusa o le itula e 5:55 i le afiafi o le aso lava lea, na toe vaaia ai loa e leoleo le pikiapu lava lea i luga o le auala, ma vaaia ai se tamaitai talavou o lo o ia fa’afoeina le ta’avale, atoa ai ma se apa pia o lo o matala i totonu o le ta’avale, ona fesiligia lea e leoleo le ave ta’avale po o ia na aveina le ta’avale i le taimi na taumafai ai leoleo e taofi i le afiafi o le aso lava lea, ae na tali le tama’ita’i lea e leai, ona fa’ailoa lea e leoleo i le tamaitai lea, ua masalomia lona tagofia o le ‘ava malosi ae le i atoa lona 21 tausaga, ma ua manaomia lo latou aga’i atu i le ofisa o leoleo i Tafuna mo suesuega, ae o le a taofia e leoleo lana ta’avale mo a latou su’esu’ega.

 

A o fa’agasolo le faia o pepa e molia ai Lefatia i le moliaga mama o le tagoia o le ‘ava malosi ae le i atoa lona 21 tausaga, o le taimi fo’i lea o lo o fa’atinoina ai e leoleo se suega fa’apitoa i totonu o le ta’avale na alu atu ai Lefatia, ma fa’ateia ai leoleo ina ua latou maua ai i totonu o le ta’avale se vaega tupe tele e tusa ma le $4,900, o ‘straw’ e 51 ua uma ona tipi fa’amaai tulimanu, lea e masani ona fa’aaoga e ula ai le aisa, o paipa e masani ona ula ai le aisa e 23 o lo o afiafi i se pepa pa’epa’e, ma se ‘straw’ se tasi ua uma ona fa’amaai ona itu o lo o i ai vaega o le pauta fa’asaina o le aisa (methamphetamine).

 

Na muamua faia se suega i vaega o le pauta sa maua i totonu o ‘straw’ ma fa’amaonia ai, o le pauta lea, o se vaega o le pauta oona o le aisa.

 

Ina ua fesiligia e leoleo le ua molia e tusa ai o mea sa maua i totonu o le ta’avale, sa ia taua ai e fa’apea, o le vaega tupe tele sa maua i totonu o le ta’avale, o tupe mai le latou pisinisi o lo o faia i lo latou aiga, e aofia ai le fa’atauina atu o pia atoa ai ma laulau piliaki o lo o masani ona ta’aalo ai tagata.

 

Sa ia fa’ailoa i leoleo e fa’apea, e ta’i $5 o lo o ia fa’atau atu ai le paipa e ula ai le pauta o le ‘aisa i tagata, ae ta’i $10 o lo o ia fa’atau atu ai vaega o le pauta fa’asaina o le aisa.

 

E $25,000 le vaega tupe lea ua fa’atulaga e le fa’amasinoga e totogi ona fa’atoa mafai lea ona tatala le ua molia i tua, e fa’agasolo ai taualumaga o lana mataupu.