O le tausaga nei ma le sailiga o le Tausala Lalelei o le Pasefika i Saute e talimalo ai Samoa, le atunu’u sa muaimalae i lea fo’i tauvaga matagofie. O le tauvaga lenei e fa’atautaia ia Tesema 14 se’ia o’o ia Tesema 20, 2014, a’o le aso 19 Tesema, le aso patino o le tauvaga e sailia ai le tausala lalelei o le Pasefika.

Ua mae’a fa’atulaga e le Ofisa o Turisi a Samoa, ma ua logoina fo’i atunu’u uma e tauva i lea tulaga, ina ia mautinoa ua nofo saunia tausala ta’itasi ma latou komiti eseese i la’ei ma tapena latou teuga patino mo a latou taumafaiga.

O lenei tausaga, ua galulue fa’atasi le tatou Ofisa o Turisi ma le MASI ina ia fa’atulaga Komiti Ta’itasi e tofu i latou ma le vaega o le tauvaga e saunia la’ei ma teuga eseese.

O le aso 12 Tesema, 2014 e tu’ua e le aumalaga fa’atasi ai ma le tatou Tausala, ina ia taumafai mo lea pale. O le aso Sa lea e amatalia ai le fa’amoemoe i Samoa, peita’i o le aso Lulu e faia ai le tauvaga fa’ata’ita’i, ma e ao ina o’o atu i ai, ua mae’a tapena uma teuga nei a Annalise Sword e tauva ai.

E to’a valu tausala mai le Pasefika ua mae’a fa’aulu o latou suafa. Ua fa’atagisia fo’i e le tatou Tausala Lalelei, Annalise Fa’aitumalo Sword le tatou nofo tapua’ia o ona faiva a’o alo atu i tapenaga ma le tauvaga.

“Ia mua lava ona talosaga i lo’u malo ma ona tagata lautele, ia tapua’ia o’u faiva, e mua lava le lagona, o se faiva e tapua’ia e manuia, ae sili atu ona ou tatalo mo le agava’a ia foa’ina e le Atua o mea uma, ina ia manuia ai lenei taumafaiga aua e vaivai lava la outou auauna,” o sana fa’amatalaga lea e tusa o le fa’amoemoe.

Mo lana taumafaiga sa ia fa’apea ai, “O le mea sili e mafaia e le tagata e taumafai i ai lo’u sui, ae afai e le pale ai ma atoa ai se taumafaiga ia malo, ou te fa’afetai lava mo le avanoa na tauva ai i lea fo’i fa’aaliga taleni.”

O vaega ua fa’ailoa mai e tauva ai e aofia ai le Taleni, Ofu Taele, Fesili ma Tali ma le Ofu o lou atunu’u e saunia pe mamanu fa’aonaponei. Ua fa’ailoa mai o le fa’aaliga Ta’avale teuteuina, e i ai lona fa’ailoga fa’apitoa, ma ua taumafai fo’i mo le Tausala o le Initeneti e maua fo’i lana fa’ailoga e le o aofia i togi o le tauvaga tausala.

O tamaitai tauva mai le Pasefika mo le Tausala 2014/2015:

• Amerika Samoa: Annalise Fa’aitumalo Sword, 26 tausaga o le soifua ma o se tama’ita’i faia’oga e tautua ai ona tagata i lona malo.

• Nauru: Kauai Margreta Oppenheimer, o se tamaitai a’oga toe galue i le vaega o teuga e fa’amatagofie atili ai foliga o tama’ita’i ma ali’i. Ua atoa le 26 o ona tausaga.

• Niue: Erika Misioini Nemaia, 18 tausaga o le soifua, ae o lo’o avea ma teine a’oga i le Iunivesite o Tekonolosi i Manukau i Aukilani, Niu Sila.

• Fiti: Nanise Noel Ragarau Rainina, ua 22 tausaga o lona soifua, ma o ia o se tama’ita’i e Misionare.

• Tonga: Cassandra Ngaluafe, 22 tausaga o lona soifua. O ia o se tama’ita’i a’oga i le Iunivesite o Tekonolosi.

• Atu Kuki: Antonina Browne, ma e le’i maua mai e le Ofisa autu o le Tausala Lalelei o le Pasefika i Samoa isi fa’amaumauga uma mo lea Tausala.

• Papua Niu Kini: Grace Agatha Nugi, ua 24 ona tausaga, ma o lo’o galue o le Research Intern and Honor Student i le Wildlife Conservation Society.

• Samoa: Latafale Auva’a, 20 tausaga o lona soifua, ma o lo’o avea ma se tama’ita’i a’oga i le Iunivesite o Otago i Niu Sila.