Ua teena e le Vaega Iloilo o le Fa’amasinoga Maualuga le talosaga atoa na fa’aulu e le ali’i loia o loo tula’i mo Siaumau Siaumau Jr, mo se poloaiga a le fa’amasinoga e toe teuteu ai lana poloaiga sa tuuina mai muamua i le mataupu a Siaumau Jr i ni tausaga ua mavae, e fa’amatu’u atu ai i le Ofisa o le Loia Fautua le $260,000 e fesoasoani ai i gaioiga o loo faia mo le finauina lea ma le puipuia o aia tatau a le ua molia, mai tu’uaiga mamafa a le malo o loo faia fa’asaga ia te ia.

O le fa’aiuga e teena ai le talosaga a Siaumau Jr, lea na tauala atu i lana loia fautua ia Douglas Fiaui, na faia lea e le afioga i le ali’i fa’amasino sili lagolago ia Lyle L. Richmond, faapea ai le lagolagosua a le afioga i le ali’i fa’amasino lagolago ia Mamea Sala Jr.

O le fa’aiuga a le fa’amasinoga fa’asaga i lenei mataupu, na tu’uina mai lea ina ua mae’a ona fa’afofoga ali’i fa’amasino i le talosaga a Fiaui, atoa ai ma le tali a le malo sa fa’aleo e le tama’ita’i loia ia Mitzie Jessop-Ta’ase.

Na taua Jessop-Ta’ase i lana tali, e le logo malie i le malo le talosaga a Fiaui ua taoto i luma o le Fa’amasinoga, mo se poloaiga e fa’atonu ai le faigamalo e tu’u atu ni isi tupe fa’aopoopo mo ia, a’o ia o se tagata faigaluega a le malo.

Fai mai Jessop-Ta’ase, e sa’o le fa’afinauga a Fiaui, o le aso 3 Aokuso 2010 na faila ai e le malo sana talosaga i le fa’amasinoga, mo se avanoa e fa’asala ai Siaumau Jr i le fa’asalaga o le oti.

“Ae ui sa talosagaina e le malo le fa’asalaga o le oti i lenei mataupu, peita’i sa toe faila e le malo sana talosaga mulimuli ane e toe fa’aleaogaina ai lana ulua’i talosaga mo le fa’asalaga o le oti,” o se vaega lea o le tali a Jessop-Ta’ase i le fa’amasinoga.

O Siaumau Jr o loo tu’uaia i moliaga mamafa eseese e aofia ai le fasioti tagata i le tulaga muamua, e mafua mai i le fa’alavelave lea o loo tu’uaia ai o ia i lona tagatavaleina o le ali’i leoleo suesue ia Det. Lt. Lusila Brown i le masina o Iulai 2010.

Na fa’amanino e Jessop-Ta’ase i luma o le fa’amasinoga e fa’apea, e le o toe i ai lava se manatu o le malo latou te toe finauina se fa’asalaga o le oti fa’asaga ia Siaumau Jr, poo le toe taumafai fo’i e fautuaina le fa’amasinoga mo lea ituaiga fa’asalaga, pe afai ae ta’usala le ua molia i le aso o lona fa’amasinoga autu.

Na faailoa atili e Jessop-Ta’ase i luma o le fa’amasinoga e fa’apea, o le vaega tupe lea na poloaina e le fa’amasinoga i le aso 22 Me 2012 e tuu atu i le Ofisa o le Loia Fautua, sa faia ma le manatu ia mafai e le Ofisa o le Loia Fautua lea sa tula’i mo Siaumau Jr ona maua aoaoga faapitoa ma talafeagai, e puipuia ai aia tatau o Siaumau Jr ao feagai ai o ia ma le talosaga o le fa’asalaga o le oti.

Sa taua fo’i e Jessop-Ta’ase e faapea, e ui o lea ua toe fa’aui i tua e le malo la latou talosaga mo le fa’asalaga o le oti, o lea lava e finau mai le itu tete’e fai mai, o loo aofia ai pea i lalo o fa’asalaga o loo fa’atula’i mai e le tulafono le fa’asalaga o le oti faasaga i le ua molia, o le mafua’aga fo’i lea e talafeagai ai ona toe tuuina mai lenei vaega tupe mo le itu tete’e.

“O le matua sese lava o lea auala ua fa’aalia e le itu tete’e latou te fa’amatalaina ai le tulafono,” o se vaega lea o le fa’afinauga a le malo.

“Talu ai ua faaui i tua e le malo lana talosaga mo le faasalaga o le oti, lona uiga e le o toe i ai se faanaunauga i le malo e toe aapa i lea talosaga, e le o fa’amalosia fo’i i lalo o le tulafono le fa’asala o le ua molia i le fa’asalaga o le oti.”

I le manatu ai o le itu tete’e o le mataupu fa’asaga ia Siaumau Jr, o se tasi lea o mataupu e pito ese lona maualuga ma le ogaoga i lenei vaitau, e le avea lea ma itu e manatu ai le malo latou te toe talosagaina se fa’asalaga o le oti.

“O lea ua savali atu nei i le 4 tausaga, 11 masina ma aso o sauniuni mai le itu tete’e mo lenei mataupu, ao lea fo’i ua latou toe sauni e talosaga i le fa’amasinoga e toe tolopo le aso o lenei fa’amasinoga, o se itu ua le talafeagai tele lea, fuafua i le isi mataupu lea o loo latou finauina, o se vaega tupe fa’aopoopo lea mo i latou,” o le saunoaga fa’ai’u lea a Jessop-Ta’ase, ma ia talosagaina ai loa le fa’amasinoga ina ia teena le talosaga a le itu tete’e mo le fa’amatu’uina atu o le vaega tupe sa poloaina muamua e le fa’amasinoga, fa’atasi ai ma le isi talosaga ina ia teena le isi fuafuaga a le itu tete’e e talosaga i le fa’amasinoga e toe tolopo atu i luma o le aso e faia ai le fa’amasinoga autu o lenei mataupu.

I le fa’aiuga a le fa’amasinoga, na teena ai e ali’i fa’amasino vaega uma o le talosaga a le itu tete’e.