Na teena e le Fa’amasinoga Maualuga a Amerika Samoa le talosaga na fa’aulu e le Komiti tuai o le Litaea a le malo, mo se avanoa e toe iloilo ai e le fa’amasinoga lana fa’aiuga sa tu’uina mai i le tausaga na te’a nei, faasaga i le mataupu e uiga i totino fou o le Komiti o le Litaea lea na tofia e le alii kovana ia Lolo Matalasi Moliga.

O le susuga i le ali’i loia ia Marcellus T. Uiagalelei na tula’i mo totino tuai o le komiti a le litaea, lea e aofia ai Aleki Sene Sr, Faoa Aitofele Sunia, Fanene Morris Scanlan, ma le afioga i le alii senatoa ia Magalei Logovi’i, ae o le tama’ita’i loia ia Elana Rivkin-Hass na tula’i mo le afioga i le ali’i kovana ia Lolo Matalasi Moliga, lea o lo o faia fa’asaga i ai lenei tagi.

O le mataupu lenei na tofu atu i le faamasinoga, ina ua faila e totino tuai o le komiti faafoe o le litaea sa latou tagi fa’asaga i le ali’i kovana, i lona tofiaina o ni totino fou mo le komiti faafoe a le litaea, e aunoa ma lona faatalatalanoaina o le mataupu pe fesiligia fo’i so latou finagalo, e tusa ai o ala o le tulafono o lo o lima taitaiina ai galuega a le komiti faafoe o le litaea.

O le mae’a ai ona tuuina mai o le fa’aiuga a le fa’amasinoga i lemasina o Iulai 2013 e faatatau i le mataupu lenei, na toe tu’uina atu ai loa e le itu tagi sa latou talosaga i le fa’amasinoga mo se avanoa e toe iloilo ai lana faaiuga, atoa ai ma le talosaga mo se isi fa’amasinoga fou.

Na faamanino e le afioga i le ali’i fa’amasino sili ia Michael Kruse ina ua toe iloiloina lenei mataupu i le vaiaso nei e faapea, o le mataupu lenei e faasaga i sui e toafa o le komiti faafoe o le litaea sa latou faaulu se tagi faasaga i le alii kovana.

Ae i lalo o le vaega 7.1410 o le tulafono, e agava’a ai ona avea i latou nei ma totino o le komiti faafoe mo le umi e ta’i lima tausaga, peitai o le mea ua tupu, ua leva ona tuana’i le ta’i lima tausaga sa tatau ona galulue ai i latou nei e avea ma totino o le komiti, ae ua faaauau ai pea ona galulue i latou o ni totino o le komiti faafoe.

O le vaega sa fia manino i ai le fa’amasinoga, pe sa i ai se fa’aletonu o lana faaiuga ua mae’a ona tu’uina mai e tusa ai o lenei mataupu, lea ua mafua ai ona talosaga le itu tagi ina ia toe iloilo lana faaiuga ua tuuina mai, ae pe tatau fo’i i le fa’amasinoga ona taofi le faamalosia o lana faaiuga sei faatali se faaiuga o le talosaga apili mo lenei mataupu.

“I le maea ai ona iloilo o le talosaga, ua teena ai e le faamasinoga le talosaga mo se isi faamasinoga fou, atoa ai ma le teena o le talosaga ina ia taofi le faamalosia o le poloaiga ua maea ona tuuina mai e le faamasinoga,” o le saunoaga lea a Kruse.

I le talosaga mo se faamasinoga fou e pei ona taua e Kruse i lana faaiuga, e mafai ona tupu pe afai e i ai ni isi o suiga i le tulafono o lo o faatautaia ai gaioiga o lenei mataupu.

O le afioga i le ali’i fa’amasino lagolago ia Fa’amausili Pomele na lagolago i le fa’amasino sili i le iloiloina o lenei fa’aiuga.