E le gata ua teena e le Vaega Iloilo o le Fa’amasinoga Maualuga le talosaga a le tama’ita’i faipisinisi o Fa’asaina Park ina ia fa’aleaoga le fa’aiuga a le Vaega Iloilo Iuga lea ua ta’usala ai o ia i le moliaga mamafa o lona taumafai e fa’alauiloa faiga fa’atalitane i ni ana tama’ita’i faigaluega se to’alua, ae na taua fo’i e le fa’amasinoga e fa’apea, e le mafai e le fa’amasinoga ona fa’alavelave i le fa’aiuga ua mae’a ona tu’uina mai e le Vaega Iloilo iuga e tusa ai o lenei mataupu.

O le fa’aiuga o le masina na te’a nei na tuu aloaia mai ai e le fa’amasinoga sana fa’aiuga tusitusia, e tusa ai o le talosaga a le pule o le Fale Kalapu o le Karaoke Bar i Satala ia Park, lea na fa’aulu e lana loia fautua ia Fiti Sunia, e talosagaina ai le fa’amasinoga mo se avanoa e suia ai le fa’aiuga a le Vaega Iloilo Iuga ua mae’a ona taoto fa’asaga ia te ia.

O le masina o Oketopa o le tausaga na te’a nei na fa’amauina ai i fa’amaumauga a le fa’amasinoga le nofosala o Park i luma o le fa’amasinoga, ina ua ta’usala o ia i le moliaga mamafa e tasi o lona taumafai e fa’alauiloa faiga fa’atalitane i le tulaga lua, atoa ai ma moliaga mama e lua o le fa’ao’olima i le tulaga tolu.

O se tasi o mafua’aga na taua e Park i lana fa’afinauga e tatau ai i le fa’amasinoga ona liliu le fa’aiuga a le Vaega Iloilo iuga, e le gata e le lava elemeni na tu’uina atu e le malo i le aso o le fa’amasinoga e lagolago ai tu’uaiga fa’asaga ia te ia, ae o lo o ia finau malosi fo’i, na te le i fa’atonuina lana aufaigaluega e fa’atino amioga fa’atalitane e pei ona ta’usala ai o ia.

Sa ia finau fo’i e fa’apea, e leai ni faiga fa’atalitane sa faia i totonu o le Karaoke Bar e pei ona manatu i ai le Vaega Iloilo iuga, e leai fo’i ni tupe po o ni isi lava penefiti na maua mai ai i gaioiga e pei ona folasia e le malo.

Ae na taua e le fa’amasinoga i lana fa’aiuga e fa’apea, e le gata sa mafai e le malo ona fa’amanino i luma o le vaega iloilo iuga mau e fa’amaonia ai le tu’uaiga fa’asaga ia Park, ae sa aofia fo’i i molimau a tama’ita’i faigaluega e to’alua sa a’afia, le faia lea e Park o fa’atonuga i ni isi o le aufaigaluega, ina ia tufa meainu ma taumafa i tagata e o atu e tafafao i totonu o le kalapu, ma ia faia i ai gaioiga e fa’atosina mai ai i latou i ugia fa’afeusuaiga.

E ui sa teena e Park lona iloaina o gaioiga o lo o taua e le aufaigaluega sa tutupu i totonu o le fale kalapu, peita’i na finau le fa’amasinoga e fa’apea, e le gata na iloa lelei lava e Park ia tagata na o ma lana aufaigaluega i le taimi e tapuni ai le fale kalapu, ae sa ia tu’uina atu fo’i i ai pa’u e fa’aaoga i taimi o feusuaiga.

O le isi vaega o le fa’aiuga a le fa’amasinoga e pei ona tu’uina mai i lenei mataupu, o tama’ita’i faigaluega na a’afia i gaioiga a le ua molia, o i laua ia sa le’i lelei ona totogi, ae sa la usitaia fo’i fa’atonuga uma sa tu’uina atu e le ua molia i mea e ao ona faia ma ali’i e o atu ma tafafao i le fale kalapu.

Na fa’ai’u le fa’aiuga a le fa’amasinoga i le fa’apea mai o ali’i fa’amasinoga, o gaioiga uma sa faia e le ua molia i le taimi sa tula’i mai ai lenei fa’alavelave, e talitonu le fa’amasinoga sa ia faia ma lona iloa.

O le afioga i le ali’i fa’amasinoga sili ia Michael Kruse o lo o saini i le fa’aiuga, e aofia ai ma ali’i fa’amasino lagolago ia Logoai Siaki ma Fa’amausili Pomele.