Ua teena e le Vaega Apili o le Fa'amasinoga Maualuga a Amerika Samoa le talosaga na fa'aulu e le sui tauva ia Fatumalala Al-Sheri, fa'asaga i tagata fai palota ma le sui na manumalo i le palota a le itumalo o Alataua ia Savali Talavou Ale, i le aofia ai i le faia o ni isi o gaioiga e le tusa ai ma ala o tulafono tau palota i le aso o le palota na te'a nei, Novema 4, 2014.

Na taua e Al-Sheri i lana fa'afinauga i le vaiaso na te'a nei e fa'apea, e le gata sa i ai tagata na palota mo le itumalo o Alataua i le aso o le palota ae o lo o nonofo i latou nei i fafo, ae sa i ai fo'i tama matutua e to'alua na o atu a laua fanau teine fai a la pepa palota, ma o nei gaioiga uma ua soli ai tulafono tau palota.

Na taua e le fa'amasinoga i lana fa'aiuga e fa'apea, e le gata e le i mafai e Al-Sheri ona fa'amanino vaega sa autu i ai lana fa'afinauga, ae sa ia taua fo'i i le taimi na iloilo ai mau o lenei mataupu, e le o i ai sona manatu e fesiligia le fa'aiuga o le palota.

Na taua e le fa'amasinoga i lana fa'aiuga e fa'apea, na pau le auala e mafai ai e le fa'amasinoga se talosaga i mataupu tau palota, pe afai na mafua ona le sa'o le fa'aiuga o le palota, ona o se gaioiga le sa'o ma tau fa'asese sa faia i le taimi o le palota, e ni isi o sui tauva po o tagata fai palota, pe mafua mai fo'i ina ua le tusa le fa'aiuga sa maua ma gaioiga sa faia i lea aso.

E talitonu le fa'amasinoga, e le i faia e Al-Sheri vaega e pei ona taua ina ia fa'amaonia ma lagolago ai lana fa'afinauga.

Na si'itia fo'i e le fa'amasinoga i lana fa'aiuga le vaega o le tulafono tau palota, lea e talanoa sa'o mai ai i le a'afia o le fa'aiuga o le palota, ona o ni faiga pi'opi'o ma le le sa'o sa faia i le aso o le palota.

"Ae ona o le ta'utinoga sa faia e Al-Sheri i le aso na iloilo ai lenei mataupu, ua manatu ai loa le fa'amasinoga, o le a leai se mafua'aga e iloilo ai fua e le fa'amasinoga tulaga o lenei mataupu", o se vaega lea o le fa'aiuga a le fa'amasinoga.

E pei ona taua e Al-Sheri i se tasi o ana saunoaga i le aso o le iloiloga, na te le fesiligia le fa'aiuga o le palota pe ita fo'i i le sui ua manumalo ia Savali, pau le itu o lo o taula'i i ai lana vaai, o le faia lea o le mea sa'o ina ia taofia ai le tula'i so o mai o lenei fa'aletonu i le lumana'i.

A o le i taumafai fo'i ali'i fa'amasino e iloilo toto'a le moni o tu'uaiga a Al-Sheri fa'asaga i le auala sa fa'atautaia ai le palota, e talitonu le fa'amasinoga, e le mafai lava e mau sa tu'uina atu ona lagolagoina le moni o tu'uaiga fa'asaga i le fa'aiuga o le palota mo le itumalo #14 a Alataua.

"I le fa'aiuga la o la matou iloiloga, ua manatu ai, e le i mafai e le itu tagi ona tu'uina mai mau e lagolago ai se fa'aiuga malosi e tatau ona tu'uina atu e le fa'amasinoga, e le i mafai fo'i ona ia aumaia ni mau e lagolago ai itu fa'aletonu na mafua ai ona taunu'u le fa'aiuga o le palota i le taunu'uga e pei ona i ai nei.”

O afioga i ali'i fa'amasino sa iloiloina lenei fa'aiuga e aofia ai Michael Kruse, Lyle L. Richmond, John L. Ward II, Logoai Siaki ma Satele Ali'ita'i Lili'o.