O le aso 23 Iuni lea ua fa’atulaga e faia ai le fa’amasinoga autu a le ali’i sa avea ma Pulenu’u o Fagatogo, ina ua ia teena le ofa a le malo sa tu’u atu ia te ia, e tali ioe i ai ma fa’amuta ai loa le mataupu o lo o tu’uaia ai o ia i le taimi nei.

Ina ua valaau le mataupu a So’osemea Tinae i luma o le fa’amasinoga maualuga i le taeao ananafi, na talosagaina ai loa e le loia a le malo ia Tiffany Oldfield i le faamasinoga, ina ia fa’atulaga loa se aso e faia ai le fa’amasinoga autu o le mataupu a Tinae, ona ua le talia e le ua molia le ofa a le malo sa tu’uina atu ia te ia.

E le i fa’ailoa e le loia a le malo i luma o le fa’amasinoga le ofa sa tu’uina atu ia Tina’e.

O lo o tu’uaia e le malo Tinae i moliaga mamafa e tolu, lea e aofia ai le moliaga o le faiaiga ma se teineititi e laititii lalo o le tulafono, faia o gaioiga fa’afeusuaiga mataga, atoa ai ma le tagofia o itutinosa o se tama’ita’i e le i fa’aipoipo i ai.

Ina ua tolopo mai le mataupu a Tinae i le lua vaiaso talu ai, e le gata na talia e le afioga i le fa’amasino sili lagolago ia Lyle L. Richmond le talosaga a Tinae ma lana loia le mana’omia o sina taimi se’i la talanoaina ai tulaga uma o le ofa a le malo, ae sa talia fo’i e le fa’amasinoga le talosaga a le malo, afai e le talia e le ua molia le ofa, ia fa’atulaga loa le aso o lana fa’amasinoga autu.

Na taua e Oldfield i le fa’amasinoga i le iloiloga sa faia i le lua vaiaso talu ai, o se tasi o tulaga na fa’ailoa e le molimau i leoleo, e masani lava ona vaaia Tinae ma isi tama’ita’i i le nofoaga lea na tula’i mai ai le fa’alavelave lea ua molia ai nei o ia.

O tu’uaiga fa’asaga ia Tinae na afua mai i le fa’alavelave lea na logo e se molimau le ofisa o leoleo i Tafuna i le aso 22 Oketopa 2014 mo se fesoasoani, ina ua vaaia le paka o le pasi a le ua molia i se vaega tu’ufua o le auala o lo o ui atu i tua o le Falepuipui a Tamaiti i Tafuna, ma vaaia ai o ia ma se tama’ita’i laititi i totonu o le pasi.

Na taunu’u leoleo i le nofoaga ma latou maua atu ai le ua molia ma se tama’ita’i i totonu o lana pasi, lea na iloa mulimuli ane, o lea tama’ita’i e 15 tausaga lona matua, e aiga fo’i ma le ua molia.

Na fa’ailoa e le tama’ita’i i leoleo, sa la fai’aiga ma le ua molia i totonu o se container o lo o tu i le isi pito o le auala, ma le fa’aupuga a le ua molia ia te ia, ua ia faia lea mea ona o lo o nofo aitalafu ona matua ia te ia.

O lo o taofia pea Tinae, 71 tausaga le matua i le toese i Tafuna ina ua le mafai ona ia totogiina le tupe sa fa’atulaga e tatala ai o ia, e fa’atalitali ai le aso lea ua fa’atulaga e faia ai lana fa’amasinoga autu.