E tele naua atina’e mo afioaga i tua o le motu o Tutuila ma Manu’a, atoa ai ma le motu laititi o Aunu’u ua sauni le Pulega o le Eletise ma le Suavai (ASPA) e fa’atino, mo le soifua manuia o tagata lautele o le atunuu.

O le agaga autu o nei atina’e e pei ona taua e sui o le ASPA i se iloiloga sa faia i luma o le Komiti o le ASPA/TEO a le maota o sui ananafi, o le naunau lea ia soo le auaunaga a le ASPA o lo o maua e isi vaega o le atunuu, ina ia tofusia ai afioaga mamao tua e aofia ai ma le motu Sa i Manu’a.

O le polokalame a le ASPA e taua o le ‘Rural Developments Area’, o se polokalame e fa’atino lava e le ASPA i tupe lotoifale, ona o le naunau ia mafai ai ona faalautele atu lea auaunaga i vaega eseese o le atunuu o lo o manaomia mai ai se fesoasoani.

“Na pau le faafitauli o lo o feagai ma le polokalame lea, e le o i ai se vaega tupe tumau ua maea ona faatulaga e faatupe ai, ae o lo o matou taumafai pea e sailiili ni auala e mafai ai ona faaauau pea le faatupeina o lenei polokalame”, o le saunoaga lea a Reno Vivao, le sui sinia o le ASPA, i luma o le komiti.

O le iloiloga sa valaauina ananafi e le komiti a le alii faipule ia Puletuimalo D. Koko, o le talanoaina lea o le galuega mo le fausiaina o se tane vai i le afioga o Faleasao i Manu’a, ona o le fuafuaga o le nofoaga fou lea ua manatu tagata o le nuu e nonofo tumau ai, talu ai o le nofoaga tuai o lo o i ai e tu lata i le matafaga, e faigofie fo’i ona afatia i galu malolosi.

Na talosagaina e le susuga John Utu, o ia o le isi sui o le ASPA,  le komiti, e manaomia se lisi o tagata Faleasao ua fuafua e aga’i i luga i le nofoaga fou lea ua faamoemoe e fausia ai le tane vai, ina ia mautinoa e le na o le toatasi le aiga o le a faamautu ai i le nofoaga lea, ma e le o se galuega fo’i e ma’imau ai le vaega tupe tele e $800,000 ae leai ni tagata e nonofo ai.

Saunoa le sui fofoga fetalai ia Talia Faafetai Iaulualo e fa’apea, ua maea ona tuu faatasia se talosaga a le afioaga o Faleasao e faailoa mai ai le lagolagoina uma e aiga o le afioaga le talosaga, mo le fausiaina lea o se tane vai i luga o le nofoaga fou lea o le a aga’i i ai tagata, e fesoasoani ai i le faavaeina o le latou nuu fou.

Saunoa Vivao e fa’apea, e ese mai ai i le fausiaina o le tane vai mo Faleasao, ua fuafua foi le ASPA e vili ni a latou pamu vai fou i ni isi o nofoaga fou e aofia ai Aua, Laulii, Tula ma Alao.

O le agaga o le ASPA e pei ona saunoa le molimau, e le gata ia mama ma lelei le suavai e faaaoga a le atunuu, a ia mafai foi ona tofusia uma nuu i tua ma le atunuu atoa i tulaga lelei o le latou tautua.