E anoanoa’i auala ma fa’aupuga eseese na fa’aaoga e ta’ita’i o le atunu’u fa’apea ai le falema’i, e fa’amatala ai le tautua a Tausima’i o lo o fa’atinoina i aso fai so o i totonu o le atunu’u.

Na taua e le afioga i le alii lutena kovana ia Lemanu Peleti Mauga e fa’apea, e fa’atusa le galuega a le Tausima’i i aao alofa o le Atua, o le Pulesili o le LBJ ia Joseph Davis-Fleming na ia taua e fa’apea, o Tausima’i o ulua’i faiaoga ia mo so o se gasegase, ae na saunoa e Teine Tausima’i ia Simamao Tuatoo ma Margret Sesepasara e fa’apea, o le galuega o lo o fa’atinoina e Tausima’i, o le fatu lena o le galuega o lo o faia mo le soifua maloloina o tagata uma.

Na matua fa’atumulia le Falesa o le falema’i o le LBJ i Fagaalu i teine ma tama Tausima’i, uo ma aiga, aemaise ai ta’ita’i o le malo ma fa’auluuluga o le Falema’i ma le Matagaluega o le Soifua Maloloina, na lolofi atu e molimauina se sauniga sa faia ananafi e aloaia ai le tautua a Tausima’i i le atunuu, lea na tatala lava i se sauniga lotu puupuu na taitaia e le susuga a Rev. Petaia Tumau.

Na fa’atusa e le ali’i faifeau le galuega a Tausima’i, o se tagata e ola auauna e saili mea lelei e manuia ai le malo ma tagata uma.

Na fa’ai’u le saunoaga a Rev. Tumau i lona fautuaina o Tausima’i, ina ia togafiti gasegase uma e asiasi atu i le falema’i, e pei lava o ni a latou uo, e pei o Iesu sa ia alofa i so o se tasi e pei fo’i o ana uo i latou uma.

Na saunoa Lemanu e fai ma sui o le malo e faafetaia ai le galuega a Tausima’i o lo o faia i aso taitasi mo le atunu’u, lea ua mafua ai ona soifua maloloina le to’atele o le atunuu o lo o saili togafiti atu i le falema’i i aso taitasi.

O Fleming na fai ma sui o le LBJ ma Motusa sa fai ma sui o le Soifua Maloloina, e fa’afetaia le galuega o lo o ofoina atu e Tausima’i mo le tele o tausaga.

Ae na taua e Simamao F. Tuato’o, o le Fa’atonu o le Asosi o Tausima’i i Amerika Samoa e fa’apea, e le mafai ona manuia le galuega fa’a Tausima’i pe afai e le fusia i le alofa.

“O le galuega fa’a teine tausima’i, e fa’avae mai lea ina ua e alofa atu i se tagata ese ma e agalelei atu i ai e ala i lona talisapaia o ia i le taimi e sulu atu ai mo se fesoasoani,” o le saunoaga lea a Tuato’o ina ua mae’a ona ia si’itia le tala mai le Tusi Paia e fa’atatau i le Samaria Agalelei lea na ia fesoasoani i se tagata mafatia sa fasi e tagata faomea i le ala, ina ua ia ave i lana asini ma fa’a nofo i se faletalimalo, toe totogi le tau o le fale na togafiti ma tausia ai lea tagata mafatia.

“O matou o Tausima’i, o tagata pito i luma lea o le laina i so o se taimi e moomia ai e le gasegase se fesoasoani, e te alofa atu i le tagata ese tusa lava pe ete le masani i ai, e te fesoasoani ma togafiti ia te ia, aua ua e talitonu i le alofa e fa’atino ai le galuega,” o le saunoaga lea a Tuato’o.

I le filifilia ai o le autu mo le aso o Tausima’i i lenei tausaga, “O Tausima’i e ta’imuaina le ala,” na taua ai e Tuato’o e fa’apea, o isi galuega a Tausima’i, e le gata o i latou o tagata e tausia gasegase (care), ae o latou fo’i o ta’ita’i, fesoasoani muamua, faufautua ma so’oupu mo le gasegase.

“A o le i o o atu le tagata gasegase e vaai le foma’i, o i tatou o Tausima’i e muamua fa’atinoina le galuega, e ala i lou lau fofoga fiafia atu i le tagata gasegase ma ofo atu i ai le fesoasoani o lo o mana’omia,” o le saunoaga lea a Tuato’o.

O ni isi o faafitauli o le galuega e pei ona saunoa Tuato’o, o fa’asea ma faitioga e aumai i le gasegase, e muamua lava tu’uina atu i le Tausima’i fa’atoa alu ai le gasegase e vaai le foma’i.

I le saunoaga a Seseparasa o le Fa’atonu o Tausima’i a le Soifua Maloloina, sa ia fa’ailoa ai ni isi o suafa o Tausima’i na avea ma muaau o le galuega i le tele o tausaga ua mavae, o i latou fo’i nei na unaia le tele o Tausima’i ua i ai nei ina ia galulue i le galuega.

I le tele ai o tausaga o tautua Seseparasa i le galuega fa’a Tausima’i, sa ia unaia ai Tausima’i o lo o galulue i le galuega i le taimi nei, ina ia faaauau a latou aoaoga mo le sailia o fa’ailoga maualuluga, e fesoasoani ai i le fa’atinoina o a latou galuega.

Na fa’ai’uina le sauniga i le tufatufaina o fa’ailoga tauoloa mo ni isi o Tausima’i ua ausia tulaga maualuluga i le latou tautua, e aofia ai i latou ua silia i le 50 tausaga o le latou auaunaga, sosoo mai ai i latou ua atoa le ta’i 40 tausaga, 30 tausaga atoa ai ma le ta’i 20 tausaga.

Sa faapea fo’i ona maua fa’ailoga taualoa mo ni isi o lo o finau e ofo fua atu isi taimi e tautua ai mo le falema’i.

O le vaiaso atoa lenei o lo o fa’agasolo ai polokalame a le vaega o Tausima’i, a o alo atu ai le fa’atauaina o le latou tautua i lenei vaiaso.

Na faafetaia e le Peresetene o le Asosi o Tausima’i i le atunuu ia Tofiga Tufele ta’ita’i o le malo e tusa ai o le amanaiaina o le aso faapitoa mo Tausima’i i Amerika Samoa i lenei tausaga.