Na taua e le Failautusi Aoao o le Komiti Fa’afoe o Ta’aloga a le Olimipeka i Amerika Samoa (ASNOC) i luma o le fonotaga a le Kapeneta i le vaiaso na te’a nei, le tele o se fa’aletonu o loo tula’i mai i Fa’alapotopotoga o Ta’aloga eseese i le atunu’u i le taimi nei, ma o loo galulue pea le pulega a le ASNOC i se auala e foia ai ia fa’aletonu.

O ni isi o ia fa’aletonu e pei ona saunoa le susuga a Bill Young, o le tumau pea lea o le fa’alagolago o Asosi o Ta’aloga i le ASNOC mo le sailiina o tupe e ave ai au ta’aalo a le atunu’u i ta’aloga a le Pasefika.

O lea saunoaga mai le susuga a Young, o sana tali atu lea i le fa’asea sa fa’aalia e le Fa’atonusili o le Ofisa o le TEO ia Aliitama Sotoa, ina ua fa’alauiloa e le alii kovana ia Lolo Matalasi Moliga i luma o le kapeneta, le tatau lea ona tutu fa’atasi le kapeneta ma le atunu’u e lagolago le sailiga tupe sa faia i le aso Toona’i na te’a nei, e fesoasoani ai i le auina atu o au ta’aalo i Papua Niu Kini mo ta’aloga a le Pasefika i le masina fou.

Na taua e Sotoa i lana fa’asea e fa’apea, o ta’aloga a le Pasefika e ta’i fa tausaga ma faia, ae foliga mai e leai ma se galuega a le ASNOC sa faia i le fa tausaga atoa lenei, ao lea faatoa tulioso mai lava e saili tupe ina ua toe fa vaiaso amata aloaia ta’aloga a le Pasefika.

Saunoa le susuga a Young e fa’apea, e moni le fa’asea a Sotoa fa’apea ai ma nisi o le atunuu ma le malo o loo tu’u fesili i le tuai lea ona faia o se sailiga tupe e ave ai au ta’aalo i Papua, peita’i o le tulaga tonu e tatau ona i ai, e tatau ona saili tupe Asosi o Ta’aloga eseese i le fa tausaga, mo le auina atu o a latou au ta’aalo i ta’aloga a le Pasefika.

“E le o se tiute o le ASNOC le fa’atupe o au ta’aalo mo Ta’aloga a le Pasefika, o le tiute lena o Asosi o Ta’aloga, ae foliga mai ua fai ma masani a Asosi o Taaloga le fa’amoemoe mai i le ASNOC latou te sailia tupe e ave ai au ta’aalo i ta’aloga a le Pasefika,” o le saunoaga lea a Young i luma o le kapeneta ma le ali’i kovana.

Na fa’amanino atili e Young e faapea, o tupe o loo maua mai e le ASNOC mai le  Fa’alapotopotoga o Ta’aloga a le Lalolagi (IOC), e fa’apitoa mo le atina’eina o ta’aloga eseese i le atunu’u, atoa ai ma le fa’atosiina mai o fanau ina ia fiafia e auai i so se ta’aloga, peita’i, e foliga mai e le o le tulaga tonu lea ua i ai le mataupu, ona o lea ua fa’aaoga tupe a le ASNOC e ave ai au ta’aalo i Papua.

“O le mafua’aga lena ua ou fai atu ai, e le o tulaga lelei Asosi o Ta’aloga i le atunuu i le taimi nei, ona, o loo tumau pea lo latou talitonuga, o le ASNOC e faia le galuega o le saili o tupe e ave ai au ta’aalo, ae le o latou, ma o le isi lea manatu o loo taumafai le pulega a le ASNOC e suia i le taimi nei, ina ia aveese lea ituaiga manatu mai loto o Asosi,” o le saunoaga lea a Young.

Na taua e le Peresetene o le ASNOC i le Samoa News, susuga Victor Langkilde i se fa’atalatalanoaga i le amataga o le masina nei, o le tulaga sa’o lava e tatau ona i ai, e tatau ona ta’i 50% le Asosi ma le ASNOC mo le fa’atupeina o se tagata taalo e malaga atu i Taaloga a le Pasefika.

Mai le aofaiga e to’a 120 o le au malaga lea ua fa’amoemoe e tuu va’a atu mo ta’aloga a le Pasefika, o le to’a 85 o i latou o au ta’aalo, ae o le to’a 35 o ofisa ma faiaoga, e aofia ai ma sui mai le malo, lea fo’i o loo malaga e tapuaia faiva o le a alo atu i ai tama fanau a le atunu’u.