E tele fesili na fesiligia ai e le afioga i le Fa’amasino Sili ia Michael Kruse le Pulesili le Tumau o le Ofisa o Femalagaaiga ia Fagamalama Fualaau, e fa’atatau i auala o loo fa’agaioi ai le Pemita e 14 aso lea o loo ulufale mai ai tagata mai Samoa i le teritori.

Ina ua fesili Kruse ia Fualaau poo ai tagata e agava’a i le Pemita e 14 aso, na tali le molimau, o tagata faipisinisi mai Samoa e fia malaga mai e fai a latou fa’atau i le teritori, e agava’a ai fo’i tagata e malaga mai i fa’alavelave e pei o fa’aipoipoga poo maliu, ae tatau ona i ai se tusi valaaulia poo se pepa maliu e fa’amaonia ai le fa’alavelave.

Na toe fesili Kruse ia Fualaau poo anafea na amata mai ai le Pemita e 14 aso, ae na tali le molimau, na te le iloaina poo fea tonu le taimi na amata mai ai, pau le itu o loo ia malamalama i ai, o le taimi o le Loia Sili ia Malaetasi [Togafau] na amata mai ai le Pemita lea.

“O a la mea e mana’omia pe afai o a’u lea e fia talosaga se Pemita 14 aso, ao ai fo’i ou te alu aga’i i ai i Samoa mo le talosagaina o le Pemita,” o le isi lea fesili a Kruse, ae na tali le molimau, e i ai le tama’ita’i o loo faigaluega i le Ofisa o le Palemia a Samoa, o ia lena e ave uma i ai fa’amatalaga mo mea uma e mana’omia mo le Pemita, ona faaoo mai loa lea e le tamaitai lea fa’amaumauga i le latou Ofisa iinei.

“Lona uiga e le o outou e siaki le “Look Out List” poo i ai le igoa o le tagata lea e talosaga mo se Pemita e 14 aso,” o le isi lea fesili a Kruse, ae na tali Fualaau, “E siaki fo’i e matou le Lisi poo i ai igoa o tagata ia e talosaga mai mo se pemita.

“O ai e faia le faaiuga pe talia le talosaga mo le Pemita 14 aso,” o le isi lea fesili a Kruse, ae na tali le molimau, “O matou. Talu lava ona aveese mai le faagaioiina o le pemita mai luga o le Ofisa o le Loia Sili, o matou lava e faia le fa’aiuga.”

Na toe fesili Kruse ia Fualaau poo ai “matou”, ae na tali le molimau, “O maua ma Dennis [Tamasa D. Lutu].”

E tusa ai ma fa’amaumauga ua mae’a ona tauaao e le Fa’amasinoga, e na o le talosaga mo le pemita e 30 aso e mafai ai ona siaki le igoa o le tagata talosaga i le Lisi, poo i ai lona igoa, ae mo le pemita e 14 aso, e le faia se siaki i le Lisi poo i ai le igoa o le tagata talosaga.

Na tuu e Kruse le pepa o loo taua ai mea e manaomia mo le pemita e 14, lea ua avea ma mea molimau lona #3 a le malo ia Fualaau ma ia fesili i ai, “Tago e siaki le pepa lena poo taua mai ai le vaega lea ua e taua i lau molimau, e oo fo’i i tagata e talosaga mai i le pemita e 14 aso e siaki fo’i o latou igoa poo i ai i totonu o le Lisi.”

Ina ua mae’a ona faitau e le molimau le pepa, sa fesili loa i ai Kruse, poo i ai se vaega faapena i totonu o le pepa, ae na tali Fualaau, “e leai.”

“O ai la e sa’o, e sa’o le pepa na tuu mai e le malo pe sa’o lau molimau lea ua fai mai nei. Aua ne’i galo ia te oe o lea ua mae’a ona fa’atauto oe,” o le saunoaga a Kruse, ae na tali le molimau, e sa’o lana molimau, o le pepa fo’i lea o loo i ona luma, e lei faia i ai se teuteuga (unedited).

Na faamanino atili e le molimau ia Kruse e faapea, talu mai lava le aso 15 Fepuari 2015 ina ua aveese mai le talosagaina o le pemita e 14 mai le Ofias o le Loia Sii, ae tu’u atu i lalo o le vaavavaiga a le latou Ofisa, o le taimi fo’i lea na amata ai ona latou fa’atinoina tulaga e pei ona taua i lana molimau, o le siaki lea o le Lisi poo i ai igoa o soo se tasi e talosaga mai i le pemita e 14 aso.

Na toe fesili Kruse ia Fualaau pe sa’o lana molimau o loo fai atu i le fa’amasinoga, ae na toe saunoa le molimau, “E sa’o la’u molimau, e le o sa’u pese lea e usu atu, ae o lea ou te molimau sa’o atu lava i galuega o loo matou faia.”