Na taua e le afioga i le fa’amasino sili i le aso Faraile na te’a nei, e tele naua mataupu tau i fanua ma suafa o lo o taoto i luma o le fa’amasinoga e aunoa ma se fa’aiuga ua faia i ai, e mafua mai ona o le tuai ona fa’atino e le Ofisa o Mataupu Tau Samoa o lana pito laau e pei ona mana’omia i lalo o le tulafono, o le faia lea o fonotaga i le va o aiga po o le malo o lo o tula’i mai ai fete’enaiga i le va o fanua ma suafa.

O se saunoaga lea a Michael Kruse na tu’uina atu i le Failautusi o le Ofisa o Mataupu Tau Samoa i le aso Faraile na te’a nei, ina ua fofogaina i luma o le fa’amasinoga le mataupu i le va o Tavita Tili, Anufe ma le Pulega o le Eletise ma le Suavai (ASPA).

Na samania e le fa’amasinoga le afioga i le Alo o Salamasina ia Satele Galu Satele, ina ia o o atu i luma o le fa’amasinoga mo le fa’ailoaina atu i ai e le fa’amasinoga o sona finagalo e tusa ai o mataupu nei.

Saunoa Kruse ia Satele e fa’apea, o le tele o mataupu e fa’atatau i fanua ma suafa o lo o taoto i luma o le fa’amasinoga i le taimi nei, e le mafai ona faia i ai se galuega a le fa’amasinoga mo le fa’aauauina, e aunoa ma le fa’amalieina o tulaga o le tulafono e pei ona moomia ai le vaega a le Ofisa o Mataupu Tau Samoa.

“Tele mataupu tau fanua ma suafa o lo o taoto pea i le fa’amasinoga e le o faia i ai sa matou fa’aiuga, se’i vagana ua mae’a ona fa’atinoina fonotaga e tatau ona fa’atinoina e le Ofisa o Mataupu tau Samoa”, o se vaega lea o le saunoaga a Kruse ia Satele.

Na mafua ona samania e le fa’amasinoga le afioga Satele, o ia lea o lo o fa’auluulu i ai le ofisa o Mataupu tau Samoa, na te silafia fo’i tulaga uma e tatau ona fa’amalieina mo le tulafono.

Na fa’ailoa e Kruse ia Satele e fa’apea, e le i leva atu fo’i se taimi na toe fa’afo’i atu ai e le Vaega o Apili o le fa’amasinoga sa latou fa’aiuga, ma logoina ai le fa’amasinoga, e manaomia le toe iloilo o tulafono o lo o fa’afoe ai mataupu tau fanua ma suafa mai tausaga ua mavae.

“Matou te manaomiaina fo’i le ofisa o le Loia Sili ina ia galulue fa’atasi ma le Ofisa o Mataupu tau Samoa, mo le vave iloiloina o mataupu nei, ina ia mafai ai fo’i e le fa’amasinoga ona vave fa’atino ana galuega”, o le saunoaga tu’u sa’o lea a Kruse i le loia sili lagolago sa i ai fo’i i totonu o le potu fa’amasino, le tama’ita’i loia ia Mitzie Jessop.

Na fa’amanino e Satele i luma o le fa’amasinoga e fa’apea, talu lava ona tula’i mai i le tofiga o le Failautusi o le Ofisa o Mataupu tau Samoa, e le i tali atu lava le Ofisa o le Loia Sili i le talosaga sa tu’uina atu i ai, ina ia tofia se loia latou te galulue fa’atasi i le iloiloina o mataupu e pei ona atugalu i ai le fa’amasinoga.

Na faamalulu le afioga Satele i le paia o le fa’amasinoga maualuga, ona o se fa’aletonu i tulaga o lo o fa’atinoina ai galuega a le ofisa o Mataupu tau Samoa, i le taulimaina o lana pito laau e pei ona faamanino mai e le tulafono, e ala i le faia o fonotaga ma aiga o lo o tula’i mai ai fete’enaiga i mataupu tau fanua ma suafa matai.

Saunoa Satele, talosia ae tofia vave mai e le ofisa o le loia sili se loia latou te galulue mo le fa’amalieina o vaega o le tulafono e pei ona atugalu i ai le fa’amasinoga.

Na fa’ailoa e Kruse i le tama’ita’i loia sili lagolago ia Jessop e fa’apea, e leai se aia o le fa’amasinoga e fa’atonu ai le faigamalo po o le ofisa o le loia sili i auala e fa’atino ai lana galuega, ae afai loa e tula’i mai ni fa’afitauli e ono tu’utaia ai le faatinoina o galuega a le fa’amasinoga, o iina loa lea e auala atu ai se manatu o le fa’amasinoga.

Na fesili Kruse ia Satele pe ua i ai la se loia ua tofia atu e galulue ma le latou ofisa, na tali le afioga Satele e leai.

E 90 aso lea ua toe tolopo i ai le mataupu lenei, ae ua poloaina e le faamasinoga le loia sa tula’i mo le malo ina ia fa’ailoa atu i le fa’amasinoga lona tulaga i le mataupu lenei.

O le alii loia ia Matailupevao Leupolu Jr o lo o tula’i mo le aiga, ae o le ali’i loia ia Roy Hall Jr o lo o tula’i mo le ASPA.