Na manino i le molimau a le sui fa’atonusili o le Matagaluega o Fefa’atauaiga ma Alamanuia a le malo (DOC), i le taimi na fesiligia ai e le Komiti Soofa’atasi a le Fono lana paketi i le vaiaso na te’a nei, le tele pea lea o pisinisi o lo o nofo aitalafu i le malo i tupe o Lisi.

E le i auai le fa’atonusili o le matagaluega i le iloiloga o lana paketi, susuga Keniseli Lafaele, ona o lo o toesea o ia mo ana talavai i atunu’u i fafo, e pei ona fa’ailoa e le ofisa o le kovana i le komiti soofa’atasi a le fono.

Na taua e le afioga i le ali’i faipule ia Vailoata Eteuati Amituana’i e fa’apea, o se tasi lenei o fa’afitauli o lo o fetaia’i pea ma le Ofisa o le DOC i le tele o tausaga, o le tele lea o pisinisi o lo o latou lisiina fanua a le malo i Tafuna, e le o fa’amaoni i le totogiina o tupe o lisi.

Na fa’amaonia e le sui fa’atonusili ia Uili Leauanae i luma o le komiti soofaatasi le i ai o pisinisi o lo o aitalafu i tupe o lisi, ae o lo o galulue pea le malo ma pisinisi ia i le tau aoina atu o tupe o lo o nofo aitalafu ai.

E ui e le i fa’ailoa e le sui fa’atonusili le aofa’i o le tupe o lisi o lo o taumafai le malo e ao, peita’i sa ia taua le faigata tele lea i le malo ona tau ao mai tupe o lo o nofo aitalafu ai pisinisi, e o o foi i le taumafai o le malo e aveese fa’amalosi pisinisi mai luga o fanua a le malo, e faigata fo’i ona fa’atino lea tulaga, sei vagana o se poloaiga mai le fa’amasinoga ona fa’atoa mafai lea ona aveese fa’amalosi.

Mo se fa’ataitaiga e pei ona fa’apupula atili e le sui fa’atonusili e fa’apea, e i ai le pisinisi o lo o lisi i fanua a le malo ua tele tausaga e le o totogiina lava se tupe o le lisi, ma ua taoto atu lea mataupu i luma o le fa’amasinoga, peita’i o le fa’afitauli ua tula’i mai, ua silia ma le 2 tausaga talu ona mae’a le lisi, ae le mafai fo’i e le malo ona aveese fa’amalosi le pisinisi lea, se’i vagana o se poloaiga mai le fa’amasinoga.

I le talanoaina ai pea o le mataupu e faatatau i lisi a le malo, na fesiligia ai e le afioga i le alii faipule ia Puletuimalo D. Koko ia le molimau, po o i ai se gaioiga a le malo o lo o faia e taofia ai pisinisi o lo o lisi i fanua a le malo, i lo latou toe lisiina atu lea o le fanua a le malo i isi pisinisi, ona maua lea e le pisinisi lea o le tupe ae leai se tupe a le malo e maua mai ai.

Na saunoa le sui fa’atonusili e fa’apea, o le isi lea faafitauli o lo o maitauina i le taimi nei, o le toe lisi atu lea e pisinisi o fanua a le malo i isi pisinisi, ona maua lea e latou o le tupe ae leai se tupe e maua e le malo.

Saunoa Leauanae e fa’apea, o lisi tuai uma lava sa faia i tua atu o le nofoaiga fou lenei a Lolo, o lisi na o lo o tula’i mai ai fa’afitauli e pei ona taua, ae o lisi fou uma sa sainia maliliega ma le malo i le taimi o le nofoaiga fou lenei, o lisi na o lo o mafai ona fa’atonutonu e le malo tulaga o le toe lisi atu e pisinisi o fanua i isi fo’i pisinisi.

Saunoa Puletuimalo e faapea, afai e le mata’ala le malo i le vaavaaiga o lisi nei, e penefiti ai lava na o pisinisi ae gau le malo, ae na taua e isi sui o le komiti e faapea, e tatau fo’i ona i ai se tupe a le malo e maua mai i lisi o lo o faia i le va o pisinisi.

O se tasi o itu na taua e le fono o lo o popole i ai, o le fa’aitiitia lea o le aofa’i o pisinisi o lo o lisi i fanua a le malo, lea e na o le to’a 47, peita’i na saunoa Leauanae, o lo o i ai le fa’amoemoe e amata ane le tausaga tupe fou ua toe fa’aopoopo isi pisinisi e lisi i fanua a le malo.

O isi fautuaga sa tuuina atu i le molimau, o pisinisi ma tagata ua fau o latou fale i luga o fanua a le malo ma nonofo ai, ae le tatau ona tupu lea tulaga i luga o fanua a le malo, ae na saunoa le sui fa’atonusili, e le fa’atagaina i feagaiga o lisi ma pisinisi ona nonofo ni tagata i luga o fanua a le malo.

I le fesiligia ai o tupe o lo o maua mai e le malo i fanua o lo o lisi atu i pisinisi, na saunoa ai le afioga i le senetoa ia Soliai T. Fuimaono e faapea, e tatau ona manino le fa’aaogaina o tupe nei, ina ia mautinoa lelei e le Fono, o lo o fa’aaoga tupe e tusa ma le tulafono.

Mo se fa’ata’ita’iga e pei ona fesili Soliai, o le Pule o le Maketi lea o lo o totogi i tupe o lo o maua mai i le Industrial Park, ae sa tatau lava ona totogi i tupe o lo o maua mai i le maketi, ae na fa’amanino e Leauanae e fa’apea, e le o i ai se afaina o le totogi o le pule o le maketi i tupe o lo o maua mai i le Paka, ona o le Paka o lo o i lalo o le vaavaaiga a le DOC, lea fo’i e tolu i ai matagaluega a le malo o lo o tausia ma vaaia le maketi.