MALAGA LE LUTENA KOVANA I LE FU’A A SAMOA

O ananafi na malaga atu ai le afioga i le Lutena Kovana ia Lemanu Peleti Mauga ma le faletua e fai ma sui o le kovana sili ma le malo o Amerika Samoa, e tali i le valaaulia a le malo o Samoa i le faamanatuina o le 51 tausaga o lona malo sa’oloto, lea ua faamoemoe e fa’ataunu’uina ia Iuni 1, 2013.

O lo o faapea fo’i ona auai atu i ai ni isi o au taaalo mai Amerika Samoa e aofia ai au volipolo a ali’i ma tama’ita’i, ma le Asosi o Fusuaga a Amerika Samoa, lea ua malaga atu e puipui le Siamupini i le Ipu a le Palemia (Prime Minister’s Cup), lea na o latou manumalo ai i le tausaga na te’a nei ina ua latou fa’ato’ilaloina le aufusu a Samoa i taaloga sa faia i le malae taalo i Tuana’imato.

O le Aso To’ona’i nei lea ua faamoemoe e toe taliu mai ai i fanua le lutena kovana faapea ai ma ni isi o au taalo ua malaga atu i Samoa.

OVA 50 VA’A NA LIPEA VAEGA TOSO VAA SATALA 6 MASINA TALU AI

O le ripoti a le Vaega Tosovaa mo le Kuata Lua o le Tausaga Tupe lenei 2013 ua maea ona tuuina atu i luma o le afioga i le kovana sili ia Lolo Matalasi Moliga, o lo o taua ai le aofa’i galuega e 52 sa faatinoina e le aufaigaluega i le ulua’i ono (6) masina o le Tausaga Tupe lenei 2013, tusa lea e 52 va’a sa mafai ona toe lipea e le aufaigaluega e to’a 40.

O va’a na toe lipea e le aufaigaluega e aofia ai va’a fagota, va’a a le malo atoa ai ma va’a tua, lea na o latou maua ai le vaega tupe e $881,603.77.

Na taua e le Taitaifono o le Vaega Tosovaa ia David Robinson i lana ripoti sa tuuina atu i le kovana e faapea, e ui i le tele o le tomai ma le agavaa o lo o i ai i le aufaigaluega mo le faatinoina o galuega, peitai o le faafitauli na taua e Robinson o lo o feagai ma le latou vaega, o le tuai lea o mea faigaluega o lo o faatinoina ai a latou galuega e pei o masini.

Ui o lea, o lo o latou taumafai pea i le mea sili e mafai ai ona faatino la latou tautua mo le atunuu ma pisinisi tua.

FA’ALAUILOA NI ISI O TAUTUA NA FAATUPE CJPA I OFISA ESEESE MALO

O ni isi o tautua sa mafai ona faatupe e le Ofisa o Fuafuaga ma Solitulafono (Criminal Justice Planning Agency-CJPA) i ulua’i masina e tolu o le tausaga lenei 2013 e aofia ai le fausiaina o le fale mo le vaega a le K-9; toe faafouina o le Falepuipui o Tamaiti i Tafuna; o le faatupeina o le Shelter mo le Matagaluega o Tautua ma Auaunaga mo Tagata Lautele (DHSS), atoa ai ma le faatupeina o le polokalame o le ‘AFIS Online Record softward mo le Matagaluega o Leoleo.

I le ripoti na tuuina atu e le susuga a Keith J. Gebaure i le alii kovana sili e tusa ai o galuega sa faatinoina e le Ofisa o le CJPA i le tolu masina talu ai, o lo o taua ai le faaaluina o le $2,500 e faalelei ai le umukuka ma le fale taele i le falepuipui o tamaiti i Tafuna (Juvenile Detenetion Center), ma o lea galuega na amata i le aso 9 Aperila ae maea i le aso 23 Aperila lava.

O le isi galuega e aofia ai le $72,000 mai tupe o le ARRA sa fausia ai le fale mo le vaega a le K-9 i le Matagaluega o Tupe; $21,000 sa faatupeina ai le polokalame o le AFIS a le Matagaluega o Leoleo, ma le $190,000 i le tausaga mo le umi e lua tausaga o lo o faatupeina ai le Shelter mo le Matagaluega o Tautua ma Auaunaga Lautele.

O galuega e pei ona taua, o ni isi ia o tautua sa mafai ona ofoina atu e le Ofisa o le CJPA i ofisa ma matagaluega a le malo, lea e faatupe mai i tupe fesoasoani o lo o maua mai e le Ofisa mai le feterale.

Na taua e Gebauer i lana tusi i le alii kovana e faapea, e lua (2) polokalame mo tupe fesoasoani mai le feterale mo le 2013 ua talia, ae o isi tusi talosaga mo isi polokalame e tolu (3) ua maea ona tuuina atu i le feterale o lo o iloiloina pea i le taimi nei.

O polokalame fou e lua ua talia e le feterale e aofia ai le Block Grant ma le Title II, ae o polokalame e tolu o lo o faatali tusi talosaga sa tuuina atu mo se vaega tupe e faatupe ai e aofia ai le Justice Assistance Grant; Sexual Assault Services; ma le Residential Substance Abuse Treatment (RSAT), o le polokalame lea o lo o agava’a ai pagota o lo o tuli a latou faasalaga i le umia o faasolitulafono o fualaau fa’asaina, ina ia auai i ni a’oa’oga e fesoasoani ai i lo latou tagofia so’o o fualaau faasaina.