FAAFETAI LOLO IA PULA MO LE FEILOAIGA I UOSINITONE

O le toe taliu mai ai o le afioga i le kovana sili ia Lolo Matalasi Moliga mai lana malaga i le malo tele, na ia tusia ai se tusi faafetai i le Faatonusili o le Ofisa o le Initeria i Uosinitone, le susuga ia Nikolao Pula e faaleo i ai le agaga faafetai ona o le avanoa na mafai ai ona latou feiloa’i i le vaiaso na te’a nei, ma talanoa i ni isi o mataupu e fesoasoani ai mo Amerika Samoa.

O ni isi o mataupu na taua e Lolo i lana tusi sa aofia i le latou talanoaga, o le mataupu i le i tulaga o auala e mafai ai ona fesoasoani mai le Initeria mo Amerika Samoa.

“Faafetai i le faaavanoaina o lou taimi tatou te talanoa ma fetufaa’i ai i mataupu e faatatau i vaega tupe fesoasoani mo Amerika Samoa, mo le isi tausaga tupe fou o lo o lumana’i nei,” o le saunoaga lea a Lolo i lana tusi ia Pula.

E pei ona taua e le alii kovana i lana tusi, ua maea ona tuuina atu le ata faataoto i vaega tupe e mafai ona fesoasoani mai ai le Initeria mo Amerika Samoa, ma ua faamoemoe o nei atina’e o le a faatinoina i le tausaga tupe fou o lo o lumana’i nei.

TAOFI LE TOE MALAGA FAATONU MA LE SUI FAATONU I FAFO I LE TAIMI E TASI

O le toese ai o le Faatonusili ma le Sui Faatonusili a ni isi o Matagaluega a le malo i fonotaga i fafo i le taimi e tasi, ua fautuaina ai e le afioga i le kovana sili ia Lolo Matalasi Moliga Matagaluega uma ma Ofisa a le malo, e le toe mana’o e toe tula’i mai lea tulaga i le lumana’i.

I sana tusi i Faatonusili o Matagaluega ma Ofisa uma a le malo i le aso 24 Iuni 2013, sa ia taua ai lona popole pe afai ae tula’i so’o mai lea faafitauli i le lumana’i, ona e aafia ai ma le auaunaga talafeagai a le matagaluega po o le ofisa a le malo.

I lana tusi sa ia taua ai e faapea, o le vaiaso na te’a nei na ia maua ai se faamatalaga, e tolu matagaluega a le malo na malaga uma i fafo i le taimi e tasi le faatonusili ma le sui faatonusili mo fonotaga.

“E le o se faiga manuia lea faiga e masani ona tupu pea i ofisa a le malo,” o le saunoaga lea a Lolo.

“E le gata e aafia ai le faatinoina o galuega a le matagaluega ma ofisa a le malo, ae aafia atu ai ma taumafaiga a isi matagaluega ma ofisa ona o tulaga e pei ona tula’i mai i totonu o ofisa taitasi,” o le isi ela saunoaga a Lolo.

“I le aga’i atu ai i le lumana’i, ou te le toe fia vaai i se faatonusili ma se sui faatonu sili o malaga i ni fonotaga i fafo i se taimi e tasi,” o le faaiuga lea o le tusi a le ali’i kovana.

TOFIA MICHAEL WHITE E AVEA MA LOIA FAUTUA LE TUMAU

O le toesea ai o le Loia Fautua a le malo ona o ni isi o fonotaga i le malo tele, ua tofia ai e le alii kovana le ali’i loia ia Michael White e avea ma loia fautua le tumau mo le taimi nei, sei vagana ua toe taliu mai i fanua le loia fautua ia Douglas Fiaui.

I lana poloaiga 092-2013 na tuuina atu i le aso 20 Iuni 2013 i Faatonusili o Matagaluega ma Ofisa uma a le malo, na taua ai e Lolo Matalasi Moliga e faapea, ua ia tofia aloaia le susuga ia White e avea ma loia fautua le tumau, e sui tulaga ia Fiaui ua toesea mo fonotaga i fafo.

O le aso Gafua na te’a nei, Iuni 24 na toesea ai Fiaui ma le atunuu ma le faamoemoe e toe fo’i mai i le aso 19 Iulai, 2013.

I lona tofia ai o White e avea ma loia fautua le tumau mo le taimi nei, ua talosagaina ai e Lolo faatonusili ma faauluuluga o matagaluega ma ofisa uma a le malo ina ia tuuina atu la latou lagolago ia White a’o avea ai o ia ma faatonu le tumau o le latou Ofisa mo le lata i le 4 vaiaso.

TELE PILI TAU FAAOFI FUAFUA MALO FAAULU I LUMA O LE FONO

A’o sauniuni ai le Fono Faitulafono mo le tatalaina o lana tauaofiaga lona lua o le nofoaiga lona 33 o lo o nofoia nei, ua faamaonia mai ai e le ofisa o le alii kovana lo latou sauni e tuuina atu i luma o le fono ni isi o tulafono tau faaofi atoa ai ma le paketi o le tausaga tupe fou 2014.

O le aso Gafua muamua o le masina fou o Iulai lea ua faatulaga e toe a’e ai galuega a le Fono Faitulafono.

I se pepa o faamatalaga na tuuina mai i luga o le ofisa o le kovana o lo o taua ai e faapea, e le gata o le a tuuina atu i luma o le fono kopi o tulafono taufaaofi mo a latou iloiloga, ae o le a faapea foi ona tuuina atu i ai ma lisi o faatonusili tofia e le’i faamaonia e le fono, atoa ai ma faatonu ua maea ona teena i le tauaofiaga na se’i mavae atu nei.

O ni isi o tulafono taufaaofi ua fuafua e tuuina atu e aofia ai tulafono mo ni lafoga fou, o tulafono e taofia ai le faia o sauaga faasaga i fanau aemaise ai tulafono mo le toe iloiloina o talosaga mo laisene.

E toalua faatonusili na teena e le fono i le tauaofiaga ua mavae atu lea foi ua faamaonia mai e le alii kovana ia Lolo Matalasi Moliga lona sauni e toe tuuina atu suafa o i latou nei i le fono, o i laua ia e aofia ai le afioga Pa’u Roy Ausage ma Timothy Jones.

O isi tofiga fou a le kovana ua maea ona faia ae lei tuuina atu i le Fono e aofia ai le tofa Tuaolo M. Fruean e avea ma Komesina o Palota.