E le gata ua fa’alauiloa e le afioga i le ali’i faipule mai le afioaga o Aua lona teena o le pili e si’i ai alauni mo senatoa ma faipule, ae sa ia fa’ailoa fo’i i luma o le maota o sui ananafi lona lagolagoina o finagalo fa’aalia o le atunu’u e tusa ai o lenei tulafono taufaaofi.

Na vave fa’auilavea le afioga i le Fofoga Fetalai ia Savali Talavou Ale ao saunoa le afioga a Faimealelei Anthony F. Allen e fa’aleo lona finagalo e fa’atatau i le mataupu i siitaga o alauni o senatoa ma faipule, atoa ai ma le tele o finagalo fa’asea o le atunu’u e fa’atatau i lenei mataupu.

Na fa’aalia e Faimealelei i luma o le maota o sui e fa’apea, e taua lagona fa’aalia o le atunu’u, aua o lo latou lava lea aia e saunoa ai i mataupu faapenei, e o o lava fo’i i afioga i faipule ta’ito’atasi, e tofu lava fo’i latou ma lagona e fia fa’aali e fa’atatau i lenei mataupu.

Saunoa le ali’i faipule e fa’apea, sa ia faitau i le nusipepa e faatatau i faasea a le atunuu e faatatau i siitaga o alauni a senatoa ma faipule, ma ua ia manatu ai e sa’o fo’i finagalo o le atunu’u.

“Atonu e sa’o finagalo o le atunuu e fa’atatau i le mataupu lenei, ae tatau fo’i ona silafia e lau afioga i le fofoga fetalai ma le maota o sui, e le o se tatou pili le tulafono lea ua vavao mai ai le atunuu, o le pili a le .......” o le saunoaga lea a Faimealelei ae fa’auilavea loa Savali ma saunoa e fa’apea, “o nei a mea o fa’asalalauga, tatou te fa’aaloalo fo’i i ai ae le avea lea ma itu e taofia ai tulaga o galuega a le maota.”

Na faaiu le saunoaga a le fofoga fetalai i le sui mamalu, i lona fautuaina lea e taoto pea lona finagalo, e i ai lava le taimi e lalafo ai le maota o tulaga o le pili pe afai e maua le avanoa.

Na taua e Faimealelei i le Samoa News ina ua fesiligia o ia i sona finagalo e tusa ai o lenei mataupu, o ia e fa’aaloalo i le maota maualuga ma le latou tulafono taufaaofi, ae o lona taofi sa’o lava, na te le lagolagoina le pili e sii ai totogi o senatoa ma faipule.

“Ou te le i sau i le nofoa lenei e auauna mai le atunu’u ia te a’u, na ou sau e fai so’u sao i le atunu’u ma lo’u itumalo,” o le isi lea saunoaga a Faimealelei.

“Ou te talitonu ua tatau ona sii totogi o senatoa ma faipule, e maualalo tele le tulaga o lo o i ai, ae le tatau ona faia faapenei, e ao ona uia ala o le tulafono e pei o le faia oni iloiloga faalaua’itele e fesiligia ai finagalo o le atunuu, ona fa’atoa laa loa lea i le isi la’asaga”, o le isi lea saunoaga a le ali’i faipule.

Na lagolagoina e le afioga a Faimealelei ni isi o finagalo fa’asea o le atunu’u faasaga i siitaga a le fono, ona o lo o alu ai tupe a tagata totogi lafoga.

Na taua e ni isi i le Samoa News e fa’apea, e le talafeagai le pili lea ua faaulu e le senate e sii ai totogi o senatoa ma faipule i le ta’i $10,000, ona o ni isi o mafuaaga e aofia ai le maualalo o totogi o tagata lima vaivai ao lea ua felelei i luga totogi o ta’ita’i o le atunuu.