Na fa’aalia e le Teutupe a le malo i luma o le Senate i le vaiaso nei, o le fa’aiuga e aveese mai ai le faiga o totogi o tagata faigaluega a le malo ‘payroll’ mai lona Ofisa ae tu’u atu i lalo o le Matagaluega o Tagata Faigaluega a le malo (DHR), o se fa’aiuga na fai e le kovana e aunoa ma le fesiligia o sona lagona fa’a teutupe.

“Sa ou fa’atuiese i le mataupu lenei ae sa fa’atonu sa’o mai lava a’u e le alii kovana e fai le mea ua ia finagalo i ai”, o se vaega lea o le molimau a Ueligitone Tonumaipea i luma o le komiti a le senate.

O le iloiloiga na valaauina e le senate, na fa’avae mai lea i lalo o fautuaga mai ni isi o senatoa, ina ia aami le teutupe a le malo sei fesiligia i le mataupu lea ua avatu ai le ‘payroll’ a le malo i lalo o le DHR, pe talafeagai ma le tulafono.

O le afioga i le alii senatoa ia Magalei Logovi’i, lea fo’i sa avefa ma teutupe a le malo mo le tele o tausaga i le nofoaiga a Togiola ma Faoa  na ia fesiligia lenei mataupu.

Ina ua fesiligia e le komiti le teutupe i sona finagalo e fa’atatau i le mataupu lenei, sa ia taua ai e fa’apea, sa ia tete’e lava i le mataupu lenei ae sa faia lava le finagalo o le kovana.

Saunoa Tonumaipe’a e fa’apea, e le gata sa ia fa’atuiese lava i le mataupu lenei, ae sa fa’atuiese ai fo’i le Teutupe tuai ua tuumalo, le susuga Falema’o Dr. Phil Mao i taimi ao avea o ia ma teutupe.

“Sa ou le fiafia i le fa’aiuga ua faia e le kovana e aveese atu ai le payroll mai lo’u ofisa, aemaise ai fo’i, e le i tu’uina mai e le alii kovana se avanoa ou te tautala atu ai mo so’u lagona mai la matou pito laau fa’a teutupe”, o le isi lea saunoaga a le teutupe.

“O le mea moni la na tupu, na fa’atonu sa’o mai lava a’u e le kovana e fai le faaiuga ua ia mana’o i ai, ma sa leai lava se isi faaiuga e fai ae na o le usita’i lava, e ui sa ou fa’atui i lenei mataupu, ae na fai lava ona ua fa’atonu mai a’u e fai”, o le saunoaga lea a le teutupe.

Ina ua fesiligia le mafua’aga o le fa’aiuga a le alii kovana, sa taua ai e le teutupe e fa’apea, o le mafua’aga autu ua faia ai e le kovana lenei suiga, o le taumafai lea ina ia taofia ai le fa’afitauli i itula ova taimi lea ua tele tupe a le malo ua alu ai i le tau totogiina, e ui o lea ua leva ona taoto le fa’aiuga e taofia ai le toe faia o ni isi itula ova taimi a le malo, peita’i o ova taimi na avatu ma totogi e le malo, sa avatu fa’atasi ma itula a tagata faigaluega.

O le fa’afitauli o lo o tula’i mai i le galuega e pei ona atugalu i ai le alii kovana, e le o le ‘system’ ae o tagata faigaluega lava le mafua’aga.

“Sa ou talanoa i le ta’ita’i o le DHR e fa’atatau i le mataupu lenei, e le o se latou matafaioi le faatautaia o se payroll a tagata faigaluega, peita’i sa finau mai fo’i le ta’ita’i o le DHR ia te a’u, o le payroll o le matafaioi lea a lona ofisa”, o le isi lea saunoaga a Tonumaipe’a.

O le toatele o afioga i senatoa na auai i le iloiloga na fa’aalia o latou atugaluga e faatatau i le mataupu lenei, e le tatau ona faa faigaluega e le DHR tagata faigaluega toe fai e latou ma totogi o tagata faigaluega, e talitonu fo’i i latou, e le o lava le malosi o le mafua’aga i ovataimi ua faia ai e le alii kovana lenei suiga, aemaise ai fo’i, o se auala lea o le a mafai ai ona faia suiga i totogi o tagata e aunoa ma le fesiligia o le ofisa o le paketi a le malo.