E ui o lo o fa’atulaga i totonu o le Paketi a le malo tupe e fa’atupe ai siitaga i totogi o tagata faigaluega a le malo, peita’i na fa’ailoa e le Teutupe i luma o le Komiti o le Paketi a le Maota o Sui i le vaiaso nei, fa’atoa mafai lava ona faia nei si’itaga pe afai e talia mai e le alii kovana ia Lolo Matalasi Moliga.

E le o se taimi muamua lenei ua talanoaina ai i luma o le Fono siitaga o totogi o tagata faigaluega a le malo, e le gata na talanoaina i iloiloga o le paketi o lo o fa’agasolo i le taimi nei, ae na toe talanoaina i le vaiaso nei ina ua molimau le Teutupe a le malo ia Ueligitone Tonumaipe’a e fa’atatau i le pili a le maota o sui e si’i ai totogi o le kovana ma le lutena kovana.

O le afioga i le tamaitai faipule ia Vui Florence Vaili Saulo na ia lagaina le mataupu, ina ua ia fesiligia le teutupe po o i ai se tupe ua fuafua e le malo i le tausaga tupe 2015 e faatupe ai siitaga mo tagata faigaluega a le malo, lea na tali mai ai le teutupe, “o lo o i ai le vaega tupe e faatino ai siitaga o totogi a tagata faigaluega mo le tausaga tupe fou”.

Na talosaga Vui ia Tonumaipe’a e fa’amaonia atu i luma o le komiti, pe mafai fo’i ona fa’atino loa lea si’itaga i totogi o nai tagata faigaluega, ae na tali le teutupe, “e mafai ona fai siitaga o totogi a tagata faigaluega, a ioe mai lava le alii kovana e fa’agaioi loa si’itaga a tagata faigaluega, lona uiga o le a fa’atino loa, ae o le tupe e fa’atino ai nei si’itaga ua mae’a ona i ai i totonu o le paketi mo le tausaga tupe fou 2015”.

Na fesili le afioga i le alii faipule ia Taotasi Archie Soliai i le teutupe, po o i ai se fuafuaga a le malo e totogi siitaga a tagata faigaluega mo le tausaga tupe lenei 2014, ae na tali le teutupe, e le i maua se la feutanaiga ma le kovana e tusa ai o lea mataupu.

Na fa’apupula atili e le teutupe i luma o le komiti e fa’apea, o tausaga tupe taitasi uma lava e fa’atulaga ai e le malo tupe mo siitaga o totogi a tagata faigaluega, ae talu ai ua taofi e le kovana le toe faia o ni siitaga i totogi o tagata faigaluega, atoa ai ma le toe fa’a faigaluegaina o ni isi tagata faigaluega fou, o le mafua’aga lena ua le mafai ai ona fa’ataunu’u lea tulaga.

Ae na toe saunoa Taotasi e fa’apea, e lagona lona fa’anoanoa i le leai o se fuafuaga a le faigamalo e faatino loa siitaga o totogi mo tagata faigaluega, ao lea ua talanoaina e le maota se tulafono taufaaofi e sii ai totogi o le kovana ma le lutena kovana.

Sa ia taua fo’i e fa’apea, ua uma ona talosagaina e le fono i le taimi o iloiloga o le paketi le tatau lea ona fai siitaga i totogi o tagata faigaluega, e foliga mai foi ua lua tausaga e lei faia lava se siitaga mo ni isi o tagata faigaluega a le malo.

Na taua e ni isi o faipule i le taimi o le iloiloga e fa’apea, o se tulaga e le manuia le fuafuaga ua faia e le faigamalo e taofi ai siitaga i totogi o tagata faigaluega a le malo, ao latou nei o lo o pito sili ona pagatia i le fa’atinoina o galuega i totonu o ofisa ma matagaluega.

Saunoa Fetui Fetu Jr e fa’apea, e le tatau ona tuu umia e le malo siitaga o tagata faigaluega e aunoa ma le fa’atinoina, ona o tupe ia ua uma ona pasia atu e le fono i totonu o le paketi ma fa’atulafono, e tatau fo’i i le malo ona usitaia ma mulimuli i ai.

Ina ua fesiligia e le komiti a le maota o sui le teutupe po o malosi tupe maua faalotoifale a le malo e faatino ai siitaga e pei ona taua, na tali le teutupe, talu mai le tolu tausaga talu ai, o lo o maitauina pea le aga’i i luma o tupe ao a le malo mai lafoga ma soo se auala o lo o maua mai ai tupe lotoifale.

Mo se fa’ataitaiga e pei ona taua e le molimau, e amata mai i le 5% e o o atu i le 20% le maualuga o lo o siitia ai tupe maua a le malo, ma o se tulaga fo’i ua mautinoa ai le malosi o tupe lotoifale e fesoasoani ai i ni isi o galuega fa’atino a le malo.