Na teva i fafo mai le maota le afioga i le Fofoga Fetalai i le taeao ananafi ua le fiafia, ina ua mae’a ona ia tu’uaia le Ta’ita’ifono o le Komiti o le Tamaoaiga o le maota o sui ia Larry Sanitoa, o ia lea o lo o fa’ata’amilo ma tuai ai le ripotiina atu o le pili sa talosaga e le kovana, e fa’avae ai se Faletupe a le malo i le teritori.

E le gata na tula’i le fofoga fetalai ae le i mae’a felafolafoaiga a le komiti, ae sa ia fa’atonuina fo’i Sanitoa ina ia ripoti le pili mo lona faitauga fa’alua fa’atasi ai ma suiga, tusa lava pe le i mae’a ona fa’aliliu i le gagana Samoa suiga a le komiti, ae fa’agasolo pea le galuega se’i fa’atoa avatu suiga i le gagana Samoa i le faitauga fa’atolu o le pili.

E latalata loa ina mae’a felafolafoaiga a le Komiti o le Tamaoaiga a le maota o sui i le taeao ananafi mo se fa’aiuga e tatau ona faia i le pili, ae tula’i mai ai loa ma le fa’aletonu ina ua si’isi’i le si’ufofoga o le fofoga fetalai, sosoo ai ma lona po o le laulau, ona ia tula’i ai loa lea ma aga’i atu i fafo o le maota a o alala pea afioga i ali’i ma tama’ita’i faipule.

E le gata na saunoa fa’afetai Sanitoa ina ua latalata i le fa’aiuga o felafolafoaiga a le komiti i finagalo fa’aalia o afioga i faipule, ae sa ia fa’afetaia fo’i i latou i le tele o fautuaga ua mae’a ona tu’uina atu, i ni isi o la’asaga e tatau ona faia e le komiti mo isi ana sailiiliga e fa’atatau i le tulafono lenei, a o le i tu’uina atu le pili e fai i ai se finagalo a le maota.

O ni isi o fautuaga na taua e Sanitoa, e le gata e tatau ona fai se iloiloga fa’alaua’itele mo lenei mataupu, ae tatau fo’i ona maua se avanoa o le komiti e valaau ai sui o le faletupe o le Zion Bank e o o mai sei fesiligia e fa’atatau i le faletupe o lo o fuafua le malo e fa’atula’i.

O le sui fofoga fetali ia Fetu Fetui Jr na ia fa’atu le mau ina ia tu’u suiga ua pasia e le komiti i totonu o le pili, lea fo’i na fulisia i ai le komiti.

Na toe saunoa Sanitoa e fa’apea, talu ai e le faigofie lenei mataupu, atoa ai ma le tele o isi fesili e le o mafai ona tali i le taimi nei, e tatau ai ona toe fuafua se isi iloiloga i se taimi o i luma.

Ae na saunoa le fofoga fetalai e fa’apea, e leai se isi taimi e tatau ai ona toe fa’atali le komiti mo le tu’uina atu o le pili i luma o le maota, o le taimi lava lea.

“O lea ua ou sauni e aumai le pili e faitau lua i le taeao nei (taeao ananafi)”, o le saunoaga lea a Savali ia Sanitoa, peita’i na tali fuaitau Sanitoa, e le i maea ona faaliliu suiga a le komiti i le gagana samoa.

“E mafai lava ona fa’aalu ai pea i le gagana fa’aperetania i le taimi nei, ae fa’atali le fa’a Samoa e aumai pe a faitau tolu le pili, ua leva na tatau ona aumai le pili e fai i ai se finagalo a le maota, ae o oe lava lea e fa’ata’amilomiloa le mea”, o le saunoaga lea a Savali ma po malosi luga o le laulau, ma ona fofoga ua matua ita lava, ona ia tula’i lea ma savali i fafo ma le maota, a o taumafai atu Sanitoa e fa’amalulu i lona finagalo e tusa ai o le mataupu.

I le taimi o le tauaofiaga a le maota ananafi, na pasia ai e le maota o sui le pili fa’atasi ai ma suiga, ma ua fa’amoemoe o le taeao nei e faitau tolu ai le tulafono.

O suiga a le komiti ua pasia e le maota o sui, e aofia ai le aveese mai o le aia mai le Pulesili o le Faletupe e palota ai, se’i vagana ai totino e to’afitu o le Komiti Fa’afoe o le Faletupe e i ai le aia e palota ai. O le isi suiga a le maota, ina ia to’a fa sui o le komiti faafoe e filifilia mai le lautele.