Ua i luma o le Fono Faitulafono se tusitusiga mai le afioga i le ali’i kovana ia Lolo Matalasi Moliga e fa’alauiloa ai ana tofiga mo i latou e to’a 7 ua ia filifilia e avea ma totino o le Komiti Fa’afoe o le Faletupe a le Teritori o Amerika Samoa (Territorial Bank of American Samoa).

O i latou e to’a 7 ua tofia ma totino o le Komiti Fa’afoe e aofia ai Papali’i Lauli’i Alofa ma Salaia Gabbard lea ua fa’amoemoe e ta’i 4 tausaga e galulue ai i laua, fa’apea ai Steven H. Watson, Alo Dr. Paul Stevenson, Ruth Matagi-Fa’atili, Keniseli Lafaele ma Utu Abe Malae e ta’i 3 tausaga i totonu o le Komiti Fa’afoe.

I se vaega o le tusi a Lolo i le aso 11 Mati 2016, o lo o ia taua ai le tatau lea ona fa’ataunu’u lana tofiga, ina ia tusa ma le Vaega 28.0204 o le Tulafono Toe Teuteuina a Amerika Samoa, lea e tu’u atu ai le malosi ia te ia na te tofia ai totino o le Komiti Fa’afoe e to’a 7 ona sui, fa’aopoopo i ai ma le Pulesili o le Faletupe lea fo’i e avea o ia ma sui o le Komiti Fa’afoe.

“O tiute o le Komiti Fa’afoe e aofia ai lo latou filifilia o se Pulesili o le Faletupe, fa’atulaga tulafono ma ta’iala e fa’atautaia ai galuega a le Faletupe, atoa ai ma le fa’atula’i o auala e lima ta’ita’iina ai le tautua a le Faletupe. E tatau fo’i i le Komiti Fa’afoe ona i ai ni isi a latou tama’i komiti se tolu e aofia ai le Komiti o Nonogatupe, Komiti o Su’etusi atoa ai ma le Komiti e Pulea Meatotino ma Aitalafu a le Faletupe”, o se vaega lea o le tusi a Lolo.

Na taua atili e le ali’i kovana lona matua talitonuina o i latou uma e to’a 7 ua ia tofia e avea ma totino o le Komiti Fa’afoe, o le a latou fa’atautaia la latou galuega i se tulaga e manuia ai le atunu’u.

Sa ia taua fo’i le fesoasoani tele o tomai ma agava’a o i latou uma nei i le fa’atinoina o le latou matafaioi i totonu o le Komiti Fa’afoe.

O ni isi o ia agava’a e aofia ai le afioga i le Faatonusili ia Lafaele, lea ua silia i le 30 tausaga o lona tomai i lana galuega i totonu o le malo, fa’aopoopo atu ai ma Watson, e le gata o ia o le loia fautua a le kovana, ae ua silia i le 20 tausaga o galue i le Faletupe o le ANZ Bank, atoa ai ma Utu, lea fo’i ua tele tausaga o lona soifua o lo o avea ai ma Pulesili o le Pulega a le Suavai ma le Eletise.

I tulaga o pisinisi, o lo o tula’i mai ai le afioga a Alo, lea fo’i ua silia i le 20 tausaga o tautua i le Komiti Fa’afoe o le Faletupe a Amerika Samoa fa’apea ai ma le Komiti Faufautua a le Faletupe o le ANZ Bank, faapea ai le afioga a Papali’i lea o lo o fai ma Pulesili o le kamupani fau fale a le Paramount Builders, o se tasi o kamupani fau fale tele i le atunu’u, o ia fo’i o se totino o le Komiti Fa’afoe o le aoga a le Manumalo, o se tasi o aoga e to’atele fanau aoga o lo o a’oa’oina ai.

E le o fa’agaloina fo’i le tomai ua mafai ona ofo mai e Gabbard, i le tuana’i ai o tausaga e 10 o galue i totonu o le Faletupe o le ANZ Bank fa’apea ai ma le Citibank, aemaise ai Matagi-Fa’atili lea o lo o avea ma Peresetene o le Faletupe o Atina’e, ua tele fo’i  tausaga o galue fa’atasi ma pisinisi i le talanoaina o mataupu tau atina’e.