Ads by Google Ads by Google

To'atele aufai fale'aiga vela uma ona lesitala mo le Farm Fair

E to'atele naua le aufai fale'aiga vela ua faamaonia le mae'a lea ona lesitala o latou suafa, mo le fa'aaliga o fa'atoaga a le malo, le Farm Fair, lea ua fa'amoemoe e fa'ataunu'uina i le aso Lulu ma le aso Tofi o le vaiaso nei, i le malae o le Si'uga'ula a le Atuvasa i Utulei.

 

I se ulua'i fa'atalatalanoaga ma le Fa'atonusili o le Ofisa o Fa'atoaga e tusa ai o lenei mataupu, sa ia taua ai le matua mana'omia o ni tagata e fai a latou fale'aiga vela, e lesitala o latou suafa i le Farm Fair o lenei tausaga, ona o iina lea ua fa'amoemoe le ave i ai le fa'amamafa mo le tauvaga o lenei tausaga, o tulaga i taumafa Samoa vela.

 

Ae i se fa'atalatalanoaga ma le tofa a Lealao M. Purcell i le fa'aiuga o le vaiaso na tea nei, na ia fa'amaonia mai ai le to'atele o tagata fai fale'aiga vela ua maea ona lesitala o latou saufa mo le Farm Fair o lenei tausaga.

 

"O le agaga fiafia i le Matagaluega ma le malo ona ua mafai ona tali mai le aufai fa'atoaga aemaise ai fo'i le aufai fale'aiga vela, ina ua to'atele i latou ua mae'a ona lesitala o latou suafa mo le tauvaga o lenei tausaga", o le saunoaga lea a Lealao.

 

Saunoa atili Lealao e fa'apea, o le fuafuaga lea ua fa'ataoto mo le Farm Fair o lenei tausaga, e ave le fa'amuamua i tulaga o taumafa Samoa ua uma ona fa'avela, ona o le isi lea itu o lo o taumafai le malo e unaia ma fa'amalosia i le aufai fa'atoaga aemaise ai o le aufai fale'aiga vela, ona o lo o taumafai pea e fa'amalosia le toe fa'aolaola mai o taumafa Samoa.

 

"O le agaga o le alii kovana ma le faigamalo, ia toe fa'amalosia tulaga o taumafa Samoa sa masani mai ia le atunu'u i aso ua mavae, e aoga lea e fesoasoani ai i le soifua maloloina o tagata i ona po nei, ona ua maitauina le tele o fa'ama'i eseese ua a'afia i o tatou tagata, e mafua mai ona o taumafa, o le mafua'aga la lena ua manatu ai e ave le fa'amamafa i taumafa vela Samoa", o le saunoaga lea Lealao.

 

O ni isi o suiga fou a le Ofisa o Fa'atoaga ua fuafua mo le Farm Fair o lenei tausaga, e aofia ai le le toe faia o ni fa'ailoga i meafaigaluega, ae o le a fa'aaoga le tupe e fa'atino ai fa'ailoga mo le aufai fa'atoaga e fa'amanuiaina i vaega ta'itasi o le a tausinio ai, ona o le manatu, e taua fo'i le tu'uina atu o le seleni e fesoasoani ai i taumafaiga a le aufai fa'atoaga.

 

Na fa'aalia e ni isi o le aufai fale'aiga vela ua mae'a ona lesitala o latou suafa i le Farm Fair i le Samoa News, o le taua o le toe lesitala o latou suafa mo le fa'aaliga o lenei tausaga, o le fia fa'aalia pea lea o le lagolago i fuafuaga ma polokalame a le malo.

 

"E ui lava o le taui le sini autu o so o se tausinioga, ae o le itu taua ia te a'u ua ou manatu ai e toe lesitala lo'u igoa i le Farm Fair o lenei tausaga, o le fa'ailoaina atu lea o le lagolago i fuafuaga a le malo, atoa ai ma le fa'aalia o le taleni kuka ua uma ona a'oa'oina ai a'u, e ala lea i le kukaina o taumafa eseese mo le fofoga taumafa a le atunu'u", o le saunoaga lea a le tina o Lupe Filiga, lea fo'i sa lesitala lona suafa i le fa'aaliga a le aufai fa'atoaga i le tausaga na te'a nei.