Ua toe amataina nei galuega o le auala i le malae ca’alele, ina ua talia e le vaega o le Federal Highways se talosaga na tuuina atu e le Matagaluega o Galuega Lautele a Amerika Samoa, sa tuuina atu i le Matagaluega o Galuega a le malo tele, e tusa ai o le latou maliliega ua faia ma le konekarate fau auala a le McConnell Dowell, latou te faaauau le fausiaina o le galuega.

I se pepa o faamatalaga na tuuina mai e le vaega a le Federal Highways sa taua ai e faapea, o le konekarate a le McConnell Dowell sa lona lua la latou ofo i le ofo a le konekarete na ulua’i fausia lenei galuega, le Whitehorn lea ua faaleaoga a le malo.

O le faaiuga e faaleaoga le konekarate a le Whitehorn mai lo latou fausia o le auala, na faia e le malo ina ua maua ane e le moni le mataupu e faatatau i le tupe o le pone (bonds) sa tatau ona totogi e le kamupani i le malo.

Na mafua ona iloa e le malo le mataupu i le pone, ona o se sui o le kamupani inisiua a le Chubb Group Insrance Companies na vili ma faafesootai le Matagaluega o Galuega a le malo ma le Ofisa o le Loia Sili, ma faailoa i ai o le tagata lea sa galulue ma le konekarate a le Whitehorn e tusa ai o feutanaiga i le pone e le faigaluega i le latou kamupani.

O se faamatalaga lea na tuuina mai e se molimau e galue i le malo e le i finagalo e faailoa lona suafa i lenei mataupu.

O le tupe o le pone o lo o fesiligia i lenei mataupu e tutusa ma le aofaiga o le ofo na manumalo ai le Whitehorn i le aofaiga e $7.9 miliona.

E tusa o se pepa o faamatalaga na tuuina mai i le Ofisa o le alii kovana, o lo o taua ai le tulaga lea, o le susuga a Abraham Wong, o ia lea o le Pulesili o le vaega o le ‘Hawaii Federal-Aid Division’, sa tusi i le Faataonusili o le Matagaluega o Galuega a le malo e tusa ai o tulaga uma e faatatau i le galuega ma manaoga o lo o i ai mo le fia faaauau lea o le galuega.

Na taua foi e Wong i lana tusi le lagona e le vaega a le Federal Highway (FHWA) aafiaga e ono feagai ma le malo o Amerika Samoa mo le toe faaleleia o lona tamaoaiga, pe afai ae le faaleleia lea vaega taua o le auala e feoa’i ai le atunuu lautele, ina ia mautinoa e saogalemu mo le atunuu atoa.

Talu ai o lenei tala fiafia, na faaleo ai e le afioga i le kovana sili ia Lolo Matalasi Moliga lona fiafia tele ona o le naunau o le FHWA e lagolago le fuafuaga e toe faaauau ai le fausiaina o le auala.

Na taua foi e le faatonusili o le Ofisa o Galuega a le malo ia Faleosina Voight lona fiafia tele ina ua mafai ona maua mai lenei tala fiafia mo le auala i le malae vaalele, ma ua latou sauni foi e galulue faatasi ma le konekarate mo vaega uma o le galuega.

I le faaiuga o feutanaiga, ua fautuaina ai e le alii kovana le faatonusil o le Ofisa o Galuega ma le Ofisa o Oloa a le malo ia Tiaotalaga John Kruse ina ia amata loa ona galulue mo le faaleleia o lenei faamoemoe.

fa’aliliu Ausage Fausia