Ua fa’amaonia mai e le Pulesili o le Ofisa o le Litaea a le malo ia Luatua Filisouaiga Taafua le toe fa’afo’i atu e le afioga i le ali’i senatoa ia Magalei Logovi’i, o le siaki e $9,000 a le litaea sa tu’uina atu ia te ia, ina ua le mafai ona malaga o ia i le fonotaga faaletausaga a le Litaea sa faia i le aai o Chicago i Amerika.

Saunoa Luatua e fa’apea, e na o le to’atolu lava totino o le Komiti Fa’afoe o le Litaea na malaga i le fonotaga, ae le i auai le afioga i le ali’i senatoa ia Magalei, ona sa malaga o ia mo lana talavai.

Ina ua fesiligia e faatatau i le siaki, na taua ai e Luatua i le Samoa News e fa’apea, ua mae’a ona toe fa’afo’i mai le siaki, lea ua maea fo’i ona toe teuina i totonu o teugatupe a le Litaea.

I le amataga o le masina lenei o Aperila, na faamaonia mai ai e Luatua i le Samoa News e faapea, o sui o le Komiti Fa’afoe o le a malaga i le fono e aofia ai Aleki Sene Sr, Magalei ma Faoa Aitofele Sunia, faapea ai ma le sui fou lea na pasia e le Fono o Toafala Iafeta.

O i latou uma nei sa tofu ma le siaki e $9,000, e fesoasoani ai i le totogiina o pasese, taumafataga, atoa ai ma le totogiina o le mea e nonofo ma faamautu ai i le taimi o le fonotaga, ma o le siaki sa tuuina atu ia Magalei e pei ona saunoa Luatua na toe fa’afo’i atu e le alii senatoa.

Ina ua fesiligia Luatua pe ua maua mai se tali a le alii kovana e tusa ai o lana tusi lea na ave i ai, ma ia faailoa ai ia Lolo Matalasi Moliga, e leai se malosi o ia te ia na te faatonuina ai Pulesili o le Ofisa o le Litaea i auala e faatino ai ana galuega, sei vagana ai se faatonuga e tuuina atu e le Komiti Fa’afoe, na taua ai e Luatua e faapea, e le i maua mai lava se tali mai le alii kovana e tusa ai o lana tusi, e leai fo’i se isi mataupu fou na toe tula’i mai e ese mai i mataupu sa taua i la tusitusiga ua mavae ma le alii kovana.

I se tusi sa tuuina mai e le alii kovana ia Lolo, sa ia tofia ai le susuga ia Sonny L Thompson e avea ma Ta’ita’ifono o le Komiti o le Litaea, peitai na faailoa i ai e Luatua i sana tusi, e le tupu se mea fa’apena, aua e fono le Komiti mo le sailiina o se latou ta’ita’ifono.

O le taimi nei, e na o Beaver Ho Ching o lo o fa’agasolo i le taimi nei gaioiga mo le ulufale atu i totonu o le komiti faafoe, peitai o isi sui fou e aofia ai Sonny ma Maaelopa Tuiasosopo e le i faagaioia auala mo le aloaia o i laua o totino o le komiti.

E le i faamaonia e le Fono le suafa o Sene ma Magalei e avea ai i laua ma totino o le komiti faafoe o le litaea, ina ua tuuina atu e le alii kovana ia Lolo suafa o le totino fou o le litaea i luma o le fono.

Ae talu ai o i laua o totino o le komiti faafoe tuai o lo o i ai, o lo o faaauau pea lava ona avea i laua ma totino o le komiti faafoe i le taimi nei, sei vagana ua pasia ni isi e sui tulaga ia te i laua.

fa’aliliu Ausage Fausia