O se tusi a le afioga i le ali’i kovana ia Lolo Matalasi Moliga na tufatufa atu i sui o lana kapeneta i le amataga o le masina nei, o lo o ia toe fa’amanatu le mataupu e faatatau i ova taimi mo tagata faigaluega, atoa ai ma le mataupu i auala o lo o tuuina atu ai ova taimi i tagata faigaluega o lo o agava’a i ova taimi.

Na taua e Lolo e faapea, i lalo o tulafono faavae a le feterale i mataupu tau ova taimi, o tagata faigaluega uma lava o lo o agava’a i ova taimi, e tatau ona totogi i latou i le tau e le itiiti ifo i le tasi ma le afa itula i le itula, mo itula ova pe afai ua silia ma le 40 itula ua galue ai le tagata faigaluega.

Na fautuaina e Lolo le tatau lea ona taofi le faiga o lo o faia e ni isi o matagaluega ma vaega tumaoti a le malo, o le totogi sa’o lea o itula ova taimi a tagata faigaluega i le tau e itula i le itula (rate of 1:1).

Mo se faataitaiga e pei ona taua e le alii kovana i lana tusi, afai o se tagata faigaluega na galue mo le umi e 55 itula i le vaiaso, lona uiga e le gata ua maua ona itula faigaluega masani e 40 i le vaiaso, ae ua maua fo’i ana itula ova taimi e 15, lea e tatau ona totogi i le totogi e (1:11/2) e tusa ai o le tulafono a le feterale o lo o faamalosia mai i lalo o tulafono mo tagata faigaluega.

“Ou te fautuaina malosi matagaluega ma ofisa a le malo o lo o latou totogiina itula ova taimi i le tau e (1:1) ina ia taofia loa lea tulaga, ae mulimulita’i i le alafua o lo o faataoto mai i lalo o le tulafono,” o se vaega lea o le tusi a Lolo.

Na faamamafa e le alii kovana e faapea, o le faatamala o le malo i le usitaia ma mulimulita’i i tulafono nei, e mafua ai ona feagai le malo ma faafitauli i tulaga o tupe aitalafu e totogi atu, ona o le le usitaia o aiaiga o le tulafono, ma avea ai lea tulaga o se avega i le malo i tulaga o ana tupe faaalu.

Na faafetaia e le alii kovana matagaluega uma o lo o latou faamaloosia lea vaega o le tulafono, aemaise ai o le faautagia o se talosaga ina ia taofia le toe soona tuuina atu mo itula ova taimi i tagata faigaluega, ae tatau ona faaaoga tupe o lo o totogi ai ova taimi a isi tagata faigaluega e faa faigaluega ai ni tagata fou i totonu o matagaluega ma ofisa a le malo.

Na faaiu le tusi a le alii kovana i lona talosagaina lea o faatonusili, ina ia latou fesootai mo le faamalosia o lenei tulafono, pe afai e manaomia le faia o ni aoaoga mo le aufaigaluega o lo o gafa ma le tuu faatasia o faamaumauga taua nei mo ova taimi ma itula a tagata faigaluega a le malo.