O le poloaiga mai le Komesina o Leoleo lea na tu’uina atu i tagata faigaluega uma o le Matagaluega o Leoleo i le aso 19 Iuni 2014, o lo o toe fa’amanino atili ai ni isi o ana poloaiga sa tu’uina atu muamua e tusa ai o suiga sa faia, lea e foliga mai e le o matua manino lelei i ni isi o le Matagaluega.

O se tasi o suiga toe fa’amanino e William E. Haleck, o le tofia o Si’isi’i Iese e galue i le Vaega e taliina telefoni mo fa’alavelave fa’afuase’i (dispatcher), i lalo o le ta’ita’iga a le Ta’ita’i Leoleo.

“Ia mautinoa lelei e le Ta’ita’i Leoleo e mulimulita’i Iese i le poloaiga lea ua tu’uina atu, o lana galuega fo’i lea ua tofia o ia e galue ai mo le taimi nei, ua na o se galuega mo se vaitaimi e le tumau”, o se vaega lea o le saunoaga a Haleck.

O isi suiga na manatu Haleck e toe fa’amanino lelei, o le tofiaina lea o Capt. Moleli Tavai e galue i le Ofisa o Leoleo i Fagatogo, o fa’atonuga fo’i mo ana tiute tauave e tu’uina atu lea e le Ta’ita’i Leoleo.

“O le fa’amaninoina o tiute tauave a Capt. Tavai, o le a ia vaavaaia galuega fa’atino a le vaega o Leoleo o lo o Tiute i luga o le Alatele (Patrol Division) mo aso ta’itasi, e pei fo’i ona fa’atonuina ai e le Ta’ita’i Leoleo isi Kapeteni o lo o galulue i le Ofisa o Leoleo i Tafuna ma Leone”, o le isi lea vaega o le saunoaga a Haleck.

O le vaega mulimuli o tofiga a Haleck sa ia manatu e toe fa’amanino, o le tofia lea o Comdr. Lavatai Ta’ase Sagapolutele lea o lo o Ta’ita’i i le Vaega o Leoleo Su’esu’e (CID) e avea ma Ta’ita’i Leoleo Lagolago, a o avea ai fo’i o ia ma Ta’ita’i o le Vaega o Leoleo Su’esu’e.

Na taua e Haleck e fa’apea, i le galue ai o Comdr. Sagapolutele i le tulaga fou e pei ona tofia i ai o ia, o le a ia fesoasoani i le Ta’ita’i Leoleo i le fa’afoeina o galuega a le Ofisa o Leoleo mo aso ta’itasi.

“Ae afai e le auai le Ta’ita’i Leoleo, ona avea lea o ia ma Ta’ita’i Leoleo le tumau”, o le saunoaga lea a Haleck fa’asaga i ana tofiga ua faia mo Comdr. Sagapolutele.

I le fa’aiuga o le poloaiga na sainia e Haleck, sa ia taua ai lona talitonu atoatoa i suiga ua faia, o le a manuia ai galuega fa’atino a le Matagaluega o Leoleo, atoa ai ma le fa’aleleia o le latou tautua i le atunu’u.