O ananafi na toe fa’amaonia ai fo’i e le Fa’amasinoga Fa’aitumalo le moliaga o le fa’atupu vevesi i nofoaga faitele fa’asaga i se ali’i pagota o lo o tuli sona fa’asalaga fa’a falepuipui i le toese i Tafuna, ina ua talia e le fa’amasinoga se maliliega na sainia e le ali’i pagota ma le itu a le malo ma fa’amuta ai loa le mataupu fou e pei ona tu’uaia ai o ia.

O le itula e 8:30 i le taeao nei la lea ua fa’atulaga e le ali’i fa’amasino o John L. Ward II, e fofogaina ai lana fa’aiuga mo le ali’i o Michael Agasiva, ma ua ia fautuaina loia a itu uma e lua o lenei mataupu ina ia sauni fa’afinauga mo le fa’asalaga talafeagai mo le ua molia.

Na ulua’i tu’uaia Agasiva i moliaga mama e lua - fa’ao’olima i le tulaga tolu ma le moliaga o le fa’atupu vevesi i nofoaga faitele. Ae i lalo o le maliliega na sainia e le malo ma Agasiva, ua ia tali ioe ai i le moliaga o le fa’atupu vevesi i nofoaga faitele, ae solofua le isi moliaga.

O tu’uaiga fa’asaga ia Agasiva na afua mai i le fa’alavelave lea na ia fa’ao’olima ai i se isi ali’i pagota, i le masina o Aukuso 2013 i totonu o le toese.

Ina ua fesiligia e le ali’i fa’amasino ia Ward II ia Agasiva i le mafua’aga o le fa’alavelave, sa ia taua ai e fa’apea, o le vevesi na tula’i mai ina ua sosoo po e tolu e le maua sana moe i totonu o le sela o lo o loka ai o ia, e mafua mai i le pisa tele o tamaiti o lo o loka i le sela o lo o i tala atu o ia.

Na taua e Agasiva e fa’apea, e tiga lava ona te’a le 10:00 i le po ua momoe uma pagota o le toese, ae fai lava uiga le mafaufau a tamaiti nei i le pisa pisa o, ae a valaau atu i ai ae atili ai ona pisa pisa o.

O le isi aso na sosoo ai, o le aso 10 lea o Aokuso, na alu ai e vaai po o ai lea sa faia le amio lea o le pisa, na i’u ai i lona po ina o le ali’i sa ia faia lea amio.

O le fesili pe na fa’apefea ona o o Agasiva i le sela o lo o taofia ai le ali’i na a’afia ma fa’ao’olima i ai, e le o manino mai, ae na taua e se molimau fa’atuatuaina i le Samoa News i le tausaga na te’a nei ina ua fa’atoa lomia e le Samoa News lenei ripoti, na tatala e se ali’i leoleo le faitoto’a o le sela o lo o loka ai le ali’i na a’afia, ina ia mafai ai ona alu atu Agasiva e fa’atino le mea sa ia mana’o i ai, sa i ai fo’i le ali’i leoleo i le taimi na fasi ai e Agasiva le ali’i pagota na a’afia.

E le i failaina e le ali’i leoleo lea sana ripoti e uiga i le fa’alavelave sa tupu, e tusa o auala o lo o fa’atautaia ai a latou tiute tauave i totonu o le toese, ae o le mataupu lenei na tofu atu i le Ofisa o le ali’i Komesina, ina ua faila e le tina o le ali’i pagota sana tagi fa’asaga i manu’a sa a’afia ai lana tama, ina ua alu atu le tina e asi lana tama i le aso To’ona’i ae ona molimauina ai suiga i lona tino ma ona foliga, ma tofia ai loa leoleo latou te su’esu’eina lenei mataupu, lea ua i’u ina ta’usalaina ai Agasiva i le fa’amasinoga.

O Agasiva, o lo o tuli sona fa’asalaga fa’a falepuipui e 5 tausaga i le toese, ina ua ta’usala o ia e le fa’amasinoga maualuga i le moliaga o le fa’ao’olima i le tulaga lua, e afua mai i le fa’alavelave lea na ia fa’aaoga ai se agaese e fa’ao’o ai manu’a i le ali’i na a’afia, i lo latou nuu i Amaluia i le aso 29 Setema, 2009.