O le fonotaga a le kapeneta i le vaiaso na te’a nei na fa’ailoa aloaia ai e le afioga i le ali’i kovana ia Lolo Matalasi Moliga, le tulaga ua o o i ai taumafaiga a i latou sa taumafai e fa’avae le faletupe o le Community Bank of American Samoa (CBAS) ina ua toe fa’aui i tua le latou talosaga sa tu’uina atu i le vaega a le fetarale le FDIC.

Na taua e Lolo i le kapeneta e fa’apea, i se latou fonotaga ma le susuga ia Avamua Dave Haleck i le lua vaiaso talu ai, na fa’amaonia atu ai e Haleck ia te ia le toe fa’aui i tua o le latou talosaga sa tu’uina atu i le Vaega a le Feterale e puipuia vaega tau faletupe (U.S Federal Depository Insurance Corporation -FDIC), i lalo o se fautuaga sa tu’uina mai e le FDIC ia i latou sa taumafai e fa’atula’i le faletupe.

Na taua e le alii kovana i lana kapeneta e fa’apea, e ui o lo o tu’u fesili le to’atele o le atunu’u po o fea ua fai aga’i i ai taumafaiga e fa’atula’i le CBAS, o le itu taua e tatau ona silafia e le atunu’u, e le i nofonofo le malo i le amataina mai o lenei faamoemoe, ae sa tu’u atoa atu lava i ai le lagolago ma le agaga maualuga ia manuia lenei fa’amoemoe.

“O le itu e ao ona silafia e le tatou kapeneta, sa tu’u atu atoa le fa’atuatuaga a le faigamalo e sapasapaia ai taumafaiga mo se faletupe fou, ae talu ai ua le mafai ona latou fa’atula’i se faletupe fou, o le fesili la lea ua tula’i mai, o le a la le isi gaioiga a le malo o le a fai nei”, o le saunoaga lea a Lolo, ma ia fa’alauiloa ai loa le mafua’aga ua ala ai ona talosaga le malo i le Fono Faitulafono mo se avanoa e fa’atautaia ai e le malo se faletupe fou mo le atunu’u.

Ina ua fa’atoa tauaao e le Fono Faitulafono le pili lea ua latou pasia mai le faigamalo, e talosagaina ai le fa’avaeina o le faletupe o le Charter Bank, sa finagalo ai ni isi o sui o le komiti o le Tamaoaiga a le maota o sui e fa’atulaga se iloiloga ma sui o le Komiti Fa’afoe sa taumafai e fa’atula’i le CBAS, se’i fesiligia se tulaga ua o o i ai a latou taumafaiga.

Na fa’ailoa e le afioga i le ali’i faipule mai Aua ia Faimealelei Anthony Allen e fa’apea, e tatau ona malamalama le Fono i le tulaga ua o o i ai taumafaiga a le CBAS, ina ne’i fete’ena’i ma taumafaiga a le malo e fa’atula’i le Charter Bank.

“Afai ua i ai se fa’aletonu i taumafaiga e fa’atula’i le CBAS, e tatau la ona silafia e le Fono Faitulafono le mafua’aga o lea fa’aletonu, ae pe le o se auala fo’i e ono a’afia ai ma taumafaiga a le malo e fa’atula’i se Charter Bank”, o le saunoaga lea a Faimealelei na tutusa lelei ma le fesili a le afigoa i le ali’i senatoa ia Magalei Logovi’i sa tu’uina atu i sui o le Komiti o le Pone a le malo, ina ua fesiligia e le senate i latou i taumafaiga e fa’avae le Charter Bank.

 Na fesili Magalei ia Keniseli Lafaele le Fa’atonusili o le Matagaluega o Fefa’atauaiga ma Alamanuia a le malo, pe fa’amata e ausia e le Komiti o le Pone le tupe lea ua valoia e faatupe ai le Charter Bank, ae na tali Keniseli, “A lava lo tatou fa’atuatua i le Atua e mafai lava ona taunu’u mea ua tatou fa’amoemoe i ai”, ae na toe saunoa Magalei e fa’apea, o le fa’atuatua lava foi lea i le Atua na o mai ma sui o le CBAS, ina ua fesiligia po o fea e maua mai ai se tupe e fa’aatoa ai le $10 miliona e amata ai gaioiga mo le fa’atupeina o le faletupe.

Saunoa Magalei, afai o le tupe le isi mafua’aga lea ua punitia ai taumafaiga a le CBAS, e tatau lava i le malo ona silasila toto’a i tupe o le pone o lo o fuafua e fa’atupe ai le Charter Bank.

O le tausaga e 2013 na a’e ai se tofa i le afioga a Avamua ma ni isi o le aufai pisinisi i Amerika Samoa, e fa’atula’i se faletupe e sui tulaga i le lala o le Faletupe a Hawai’i o le a latou tuua le atunu’u i lea taimi, ma latou tu’u fa’atasia ai loa le fa’atula’iina o le faletupe o le CBAS.

O le amataga o le tausaga nei na fa’ailoa aloaia ai e Avamua le tu’uina atu o se latou ata fa’ataoto i le faigamalo a Lolo ma Lemanu, e fa’ailoa atu ai le lagolago sa tu’uina mai e le malo mo le fa’avaeina o se faletupe fou i le teritori, e fesoasoani i manaoga a le atunu’u ma le malo, aemaise ai le talosaga a le CBAS o lo o taoto i luma o le Fono mo le fa’avaeina o lea faletupe fou.

Ae ina ua fa’alauiloa se taumafaiga a le malo mo le fa’avaeina o le Charter Bank, na taua ai loa e Avamua le tula’i mai o se atugaluga i le latou taumafaiga ona o le tele o mafua’aga e feso’ota’i ma mataupu tau faletupe.

O ni isi o ia mafua’aga e pei ona saunoa Avamua, o le fa’aaogaina lea o le nofoaga o lo o i ai le Faletupe o Hawai’i e le CBAS, ae afai o lea ua fuafua le malo e fa’atula’i le Charter Bank, lona uiga o le nofoaga fo’i lea ua fuafua le malo e fa’aaoga a le Charter Bank.

O le masina o Iuni 2015 lea ua folafola e le faigamalo e tatau ona tatala aloaia ai le tautua a le Charter Bank i le teritori.

Na taua e le pule o le lala o le Faletupe a Hawai’i i Amerika Samoa, o ia fo’i lea o le sui peresetene, susuga EJ Tyler Ozu i luma o le maota o sui i le lua vaiaso talu ai, o le taimi lava e mautu ai fuafuaga a le malo mo le fa’avaeina o le Charter Bank, ona tula’i lemu ese loa lea o le faletupe a Hawai’i ma tuua filemu le atunu’u ua mae’a lana tautua.