Ads by Google Ads by Google

Toe Sa’afi’afiga mo Leroy Simaile Lutu

“Tatou te feso’ota’i i le toto, ae o le alofa e avea ai i tatou o se Aiga!”

O le mau lea e fa’ailoga ai le soifuaga o le Tiakono, o se tama o le fanau, o se Uso ma se tuagane, ae o se uo mamae a le to’atele o i latou sa soifua fa’atasi ma Leroy Simaile Lutu i le 62 tasuaga, 9 masina ma le 13 aso lea na latou fa’atasi ai.

Na soifua a’e o ia i lona aiga, o lona tama Lutu Simaile o Fagatogo ma Amanave, a’o lona tina o Salote Kipeni Su’apa’ia mai Salelavalu ma Manono i Samoa. E to’a 20 i latou o Alo o le afioga le Sa’ousoali’i, e to’asefulu ona tuafafine ae to’aiva fo’i ona ae o ia o le lona 11 o le fanau i le fa’asologa mai le ulumatua.

Na amata a’oa’oga a Leroy i le aoga tulaga lua i Fagatogo ma Pago Pago, na soso’o lea ma le a’oga a Poyer Junior High, ae fa’ai’u ai i le a’oga maualuga a Samoana a’o fa’aigoa o le American Samoa High School.

Na fa’asolo atu i fafo ana a’oa’oga maualuluga mo tusi pasi maualuluga ma fa’ai’u ai ana taumafaiga ina ua umia lona fa’ailoga o le Masters. Ina ua mae’a nei tausailiga sa toe taliu mai i le aiga, e fa’amautu ai le mavaega a si ona tama, “Ia e toe fo’i mai e tausia le aiga!”

O le olaga atoa o Leroy, o Fagatogo, o lona nofoaga o le Maota lava i Asila. O lana tautua i lona aiga, e le fesiligia, o lana tuatua fo’i i le Ekalesia Fa’apotopotoga Kerisiano i Amerika Samoa i Fagatogo lava, ua mae’a molimauina e le Fa’afeagaiga i lona sauniga, e le pa’ole lava lana tautua!

“O lona soifua auauna, ua iloga ai lona iloa lelei o lona Atua!” Na papatisoina o ia e avea ma totino o lana Ekalesia e le susuga le Fa’afeagaiga Toeaina Fiti Sunia ma le faletua o Savali Sunia. Peita’i, o lona vala’auina e avea ma Tiakono o le Ekalesia, na fa’au’uina ai o ia e le susuga le Fa’afeagaiga Ned Ripley. E le’i tu’ua ai fo’i i nei tofiga le auai o Leroy i le sauniga a le Ekalesia Katoliko i Fagatogo lava, ona o lo’o i ai lona naunauta’iga e molita’i ona mana’oga fa’apitoa e nofo tatalo i ai le vasega o Monike i Vailima, Samoa.

E vala’auina o ia e malolo, o lo’o ia tau’avea le tofiga Ta’ita’ifono o le Komiti o le Alofa mo lea lava fa’amoemoe.

O le tautua a Leroy i lona nu’u ma lona aiga, e le fa’amatalatalaina, aua e teufatu lava Fagatogo lona nu’u pele ia te ia. E so’o se mea e taumafai Leroy e faia mo lona afio’aga, e mautinoa lava e taunu’u. E ave i ai lana fa’amuamua ma lona fai mea mafai! O le fuafuaga ma lona fa’ataunu’uina e atoatoa ona i ai o ia, ma e faifia fo’i o ia e fai mea fa’atasi ma le to’atele. O le Au Lakapi, e le’i fa’avaivai o ia, o le auva’a  ma lana sapaia o latou fa’amoemoe, e numera tasi ai lona agaga.

Lea ua tu’ua nei, tau ina so’o le fau ma le fau i le afio’aga, ua mae’a le tautua matavela a lea tama fanau, ae ua tofia fo’i e le Atua nisi ‘au’upega malolosi mo lea lava folauga se’ia taunu’u ai le tatou faigamalaga i se taunu’uga lelei.

Mai lona soifuaga e to’afa lava le fanau ua lisia o lana fanau i lenei olaga, a e ua tatou iloa lelei, e tele le alofa sa ia fa’asoa i so’o se tasi sa i ai le mana’omia.

O lana fa’asoa fo’i i le sosaiete a Fa’afafine i lenei malo, ua sapi ai le to’atele o i latou ia i ma’a o malie. O lona lelei, e fesoasoania’i atili i tatou i lenei vaitau, ae o lona amataga ua tatou iloa lelei lona pogati, Leroy Lutu lea!

O lana tautua i le Malo na afua mai le avea o ia ma Faia’oga ina ua taliu mai i fanua i le tausaga e 1980 ia Aokuso. Na faia’oga i Samoana, soso’o ai ma le avea ma Sui Pule A’oga i Samoana lava i le tausaga e 1986-Tesema 1994.

 Amata lana tautua o le Pule i Polokalama Fa’afoe a le Drug Free mo A’oga i le tausaga lea 1994 Tesema se’ia o’o ina avea ma Sui Pule o le Polokalama lava lea ia Me 2000 ma fa’aauau ai lava lana tautua i lena tofiga se’ia o’o ia Iulai 2010.

O se tasi fo’i o ia vaitaimi atoa sa tautua ai i le tatou malo, sa avea ai o ia ma Totino o le Komiti Fa’afoe mo le Ofisa o Femalaga’iga.Na amia o ia e malolo e lona Matai i le aso 14 Ianuari, 2012 peita’i, ua fa’aalia e lana Fa’afeagaiga taulagi Rev. Ulu, “ua mae’a tu’uina atu e Leroy mea uma i le Atua, ua ia lelei fo’i ma lona Atua.”

“O lenei ia o’ofu outou i le alofa mutimutivale, ma le agalelei, ma le loto maulalo, ma le agamalu, ma onosa’i, fa’apei o e ua filifilia e le Atua. o e ua pa’ia ma ua alofaina!” Kolose 3:12