Mai molimau na fa’afofogaina, e tusa o le soifuaga o le tama matua, o ia o se auauna sa tele lona taimi na ia faia ai misiona e tele mo le Ekalesia a Iesu o le Au Pa’ia o Aso e Gata Ai, e to’atele fo’i sa latou maua le fa’amalosi’aga mai ia te ia, i lea fa’atuatuaga.

O ana galuega ua fa’aalia i le to’atele o aiga, sa ia fa’amalosi’au i ai, ma ua o’o mai i le taimi nei, ua maua’a  latou e o’o i uso o le tina o le aiga, Margaret Sialataua McMullin, o lo’o ua latou fiafia ma olioli e tapua’i i le Atua e ala i le ekalesia LDS.

O molimau ola nei o le soifua galue o Lelologatele William Galea’i i le sauniga a lona aiga sa muamua mai i ona toe sauniga i le malumalu i Malaeimi i le aso Faraile na te’a nei. Mai le fanau sa molimau ai le tama’ita’i o Celeste Annandale, “O le Kerisimasi lea na te’a atu, sa matou iloa lelei, na fai Papa, o le a toe nofo mai lava se’ia mae’a ona fa’ato’a alu lea. Peita’i, mai le tele o ana meaalofa sa taua’aoina i lea tausaga, ma isi tausaga uma o lona soifua, sa ou fesiligia ai, po’o le a lava sana meaalofa e sili ona fa’afiafiaina ai o ia.”

“O lana tali na ‘aumai sa ou ofo ai lava, ‘O mapu na fai meaalofa mai ai lo’u uso o Ken ia te a’u, o mapu ia, o mapu o malo o Ken i le tausaga atoa pe a pele mapu ma tamaiti uma lava o le matou nu’u, na alu lea tanu i le eleele i le tausaga atoa, ae o’o loa i le Kerisimasi, tago loa fufulu mama, fa’atagapepa ae aumai mo a’u.”

O se mea e ofo ai i lena tali, ae o le maulalo o lona loto, ma le uiga ia te ia o le foa’i, atoa ai ma le taua ia te ia o se mea sa fa’apolopolo e lona uso mo le tausaga atoa, lea ua ia fa’ailoa ai, e sili ona taua o mea iti nai lo mea tetele uma e te loto i ai.

“O se tama e agaga i lana fanau ma lona aiga, e le taitai ona ma’ema’ea sona leo i totonu o le matou aiga, ae o Mama lava e faia le tele o tonu. Tausi aiga tele Papa, e alofa ia i matou uma lava, e le fa’ailoga se tasi ae fa’asalafa atu fo’i i nisi o tuaoi ma so’o se tasi o le Ekalesia o lo’o ia va’aia e i ai le mana’omia i o latou lotoifale. E fai tuafafine ma fai uso tele o ia.”

I le molimau a lona tuafafine, Vataumalo Neria, sa ia molimau ai, “O Willie tausi aiga tele, o ia lenei sa muamua o ma le tama o le aiga i fafo e amata faigaluega i le tausaga 1952, ma avatu uma ai i matou uma i Hawaii, e o’o lava ina matua ma fai lona aiga, e le tu’ua lava lona tausi aiga lelei. Ou te fa’afetai i le Atua mo le vaiaso e tasi na ia tu’u maia, e mate mafuta ai ma Willie a’o le’i tu’ua e ia lenei ola, ua matua ou fiafia tele, aua o le avanoa lea sa ou fa’ananau i ai.”

Na molimau fo’i le to’alua o Ken lona atali’i, Roxanne Forsythe, sa la’ua vasega i le Iunivesite, a’o tau sailia lona fa’ailoga maualuga, sa la’ua a’o’oga fa’atasi, ma e fautua lava o ia ia te ia i le a’oga. E vavalalata tele i la’ua ona o lona ola fautua ia te i la’ua ma lo la’ua aiga.

Peita’i, sa ia molimau, o Ianuari 10 ua vala’auina ai Papa e alu, ae o lo’u tama fo’i, na vala’auina fo’i ia Ianuari 11, 2010 na maliu ai. E fautua lava o ia, ia naunau e fa’aa’o’oga matou fanau, ia maua le poto e tamaiti aua latou lumana’i.”

I le molimau a le tina, sa la’ua mafuta mo le tele o tausaga, sa ia fa’ailoa mai ai, “O se tama agamalu, alofa tele ia matou ma le fanau, ae silisili lona fai tama valea i lana fanau a fanau. E naunau i le mafutaga fa’aleaiga, ae saili i le mafutaga ma lona Atua i so’o se taimi, e agaalofa tele o ia, ma loto fesoasoani i isi o i ai le mana’omia. E alofa tula’i, ma e le fa’atua’oia ona manuia na’o le matou aiga, e tufa atu lava i taimi uma i so’o se tasi. Amu’ia fo’i a’u sa mafuta ma lenei tama, fa’afetai i le Atua ona o lana meaalofa taua mo a’u,  aua o se tama fa’amaoni i ona tiute ma lo ma’ua va, ou te iloa ma e toe fetaui lava ma ia.”

O lona soifua galue, sa matauina ai lona fa’amaoni, sa tautua o ia o se tagata faigaluega o le Teutupe a le  Fono Faitulafono a le Malo.  E tele fo’i tofi na tula’i ai e pei o le Epikopo a le Pateriaka poo le fa’atama o lana ekalesia aemaise o lona aiga.

E to’a 5 o la’ua alo ma le tina o le aiga, Margaret Sialataua McMullin Galea’i, e to’a 12 ona uso, ae to’a 9 ona tuafafine. E to’alua ona tina o lo’o lisia i le polokalama, Meaali’i Evelina Sitaimata Tufaga ae mulimuli ai si o Fuauli Fonoti Semaia, ae o lona tama o Fegaimaali’i Tu’ia Galea’i.

O fanau a lana fanau e to’a 23, ae o fanau a lana fanau e to’a 21. Na soifua mai o ia i ona matua i le aso 5 Iuni, 1932 ae ua malolo nei o ia ia Ianuari 10, 2015.