Ads by Google Ads by Google

Toe saafiafiga mo Susana Leiato Lutali

“Aua o oe ia e alu atu se’ia o’o i le i’uga, aua e te malolo, e te tu mai fo’i i lou tofi pe a o’o i le i’uga o aso!” Tanielu 12:13.

O toe saafiafiga mo le tina ia Susana Leiato Lutali i ona toe sauniga sa faia i le vaiaso nei i le malumalu a  Peter & Paul Katoliko Roma i Iliili, ma faamavae atu ai lona aiga, o ana uo faapea ai i latou sa pele ia te ia i ona toe sauniga, ma manatua ai lana tautua i le aiga, atunuu, nuu, malo ma le ekalesia.

I se molimau a le fanau, e iloga ai, e maualuga le fua a le tina o Susana i totonu o lona lotoifale i le fanau ma latou fanau. E ote Mama pe afai e le fetaui se mea i lana va’ai! “Ia feagai mea uma! Match mea uma e o’o i le savali ma le tautala, e fa’apipi’i atu i le tagata ua mae’a teuina ia talafeagai ma le mea o fa’atasi atu i ai!”

Ioe e fa’apena le agaga o le tina tapenapena! E fa’afetaia ai lenei tina o le atunu’u i lona va’ai toto’a i so tatou va’aiga lautele i e tafafao mai, ia avatu le tala, ua lelei mea uma ia Amerika Samoa, ua faia le faiva o tina, “Ia tumama ma teuteu o tatou tagata ia matagofie i le va’aiga, ma ia iloa patino aga e faia i so’o se mea e auai ai, le tu ma le savali ae maise i le tautala mai! Ia fa’amuamua lava, ‘aua ne’i fa’atuai, ae ia vave ma muamua mai!”

E le’i vale tu’ulima se tofi o Susana mai le Atua i se tasi la te mafuta ma fausia lo la’ua a’iga. Na talafegai mea uma sa ia momo’o ai i lona Atua ma lana toe tali mai ia te ia. Ae le’i galo ai i le Fa’atina o Amerika Samoa na malolo manumalo, lana tatalo ia fa’asalafa i lona malo ma ona tagata, o si ona aiga, ae maise o lana fanau ma latou aiga ma fanau.

E ui ina ua se’e tuavao ae tatali faiva o tina fou o le atunu’u, ae sa e mua i malae e fa’ata’ita’i i mea e lelei ai le atunu’u. Sa tautala au galuega, ma o lo’o gagana mai pea lava, ua aoga i le olaga o le tupulaga i lenei vaitausaga, ma isi fo’i i le lumana’i. I lona toe sauniga, sa fa’afofogaina ai le molimau a Patele ma sa ia fa’ailoa ai le Tapeneko o lo’o tutula’i i le malumalu, o sana taulaga, ae maise o le Malumalu fou ua faia ai lona toe sauniga, sa sapaia i le fanua o Susana Lutali le nogatupe tele sa mafai ai ona fa’atula’ia lea malumalu tapua’i.

Vaega mulimuli o le molimau sa fa’apea ai, “E le fa’atuai le afioga Maeata’anoa Susana Le’iato Lutali i so’o se tapua’iga i lona Atua. Sa ia faia le mea silisili mo le Atua, ua ia faia nei mea silisili ma manumalo ai lava!”

E vavalalata le mafutaga a le tofa Faleomavaega Eni ma le Faletua ma lenei tina o le atunu’u, aua sa fa’ato’a manumalo ai Kovana Lutali & Susana i le latou paga na tauva i le tausaga 1984. E so’otau’au lelei faletua o le Kovana ma le Lutena i lenei vaitausaga. ma ua avea ma fa’anoanoaga ia Hinanui Hunkin le tala fa’avauvau ua malaga filemu Susana Lutali, ae le’i toe talatalanoa ma talitalie, ma fetufa’i lata mai ma ia. Ia Hinanui, “E tele se a’oa’oga na ou maua mai ia Susana Lutali, i uiga ma aga e ao ina faia e fa’atina o le atunu’u, ma ua fa’afetai, ua ou ola ai.”

Na fa’aipoipo le tama’ita’i faia’oga i Fagaitua Elementary i lana susuga le Asiasi a’oga Aifili Paulo Lutali ia Aperila 2, 1954, na fa’ato’a tatalaina i le oti e le tama o le aiga i le tausaga e 2002, peita’i ua fa’ato’a mou atu i le vaiaso ia Iuni 29, 2012 ina ua lagomau fa’atasi i la’ua i lo la’ua maota i Iliili lava.

O le afioga Maeata’anoa Susana sa soifua a’e i Fagaitua i le aso 23 Me, 1932 i ona matua o Taetuli So’omali’i Tupua Le’iato ma lona tina o Anasitasia Lauatua’a Malepeai o Faga’itua lava. Mai le la’ua osigafeagaiga e to’a 12 le la’ua fanau ma la’ua fanau tausi e to’alua, ma ua soifua mai ai fo’i le to’a 41 o fanau a fanau ma le isi to’a 32 o faau a fanau a fanau. Na maliu o ia ia Iuni 15, 2012 ma ua atoa i ai le sefulu tausaga talu ona tu’ua e le tama le mafutaga ma ia.

Ua fa’asaga ane fo’i le malo e fa’ailo le auaunaga matavela a le afioga Maeata’anoa Susana Lutali, ua fa’ao’o atu le agiagia o le Malo e ufita’i lona Sa o lana toe faigamalaga. Ua auai fo’i le to’atele o Fa’atonu o Matagaluega ta’itasi ae maise o i la’ua ma le Faletua Maryann Tulafono e fa’ailo le fa’aaloalo o le Malo i le tu’ua i tatou, e se tasi o Tina Iloga, sa fautua ma fa’atino le tausiga o lona lotoifale i tausaga ua mavae.

Ua le gata ina auai le malo atoa i lona toe sauniga, ae fa’apea fo’i ona auai i ona toe taimi ina ua lagona o ia i lona oliolisaga tumau i lo la’ua maota ma le Tama i Iliili.

Na lu’ia fo’i e afioga Patele na ta’ita’i i le sauniga le fanau, “Ia outou savavali i tulaga a’ao o lo outou tina, e vave mai i tapua’iga, e le fa’atuai mai lava, e naunauta’i i lona ali’i e auai i fonotatalo uma lava, ma o le ala fo’i lea e na te faia ai mea sili mo lona Atua.”