O le fonotaga a le Iuni Lakapi a Amerika Samoa sa usuia i le vaiaso na te’a nei, na pasia ai le toe fa’atumauina o tofiga tuai e pei ona tauave mai e le Iuni i le tausaga ua mavae, e fa’aauau ai galuega fa’atino a le Iuni mo lenei tausaga.

O ni isi o ia tofiga maualuluga e aofia ai le avea pea o le afioga i le Matua ia Togiola T. A Tulafono e fai ma Ta’ita’ifono o le Iuni, ma le afioga ia Aumoeualogo Te’o J. Fuavai e avea ma Peresetene, fa’apea ai ma isi tofiga masani o lo o tumau pea.

Na taua e se totino o le komiti a le Iuni lakapi e fa’apea, o suiga ua faia ua lagolagoina ma sapaia ma le talitonuga, o le a manuia ai le atina’eina o le ta’aloga lakapi i Amerika Samoa.

O le fonotaga lava fo’i lea na fa’alauiloa aloaia ai loa le fa’amutaina o le ta’amilosaga ta’ito’a 15 a le Iuni lakapi mo le tausaga e 2013, ma ua avea ai le kalapu mai Fagatogo ma siamupini o le 2013, atoa ai ma le latou umiaina o le talita.

E $1,000 le fa’ailoga tupe na maua e Fagatogo mo le siamupini, ae $300 le fa’ailoga tupe mo le latou umia ai o le talita mo le 2013.

O le lua ai lea o tausaga soso’o talu ona siamupini le kalapu lakapi a Fagatogo fa’atasi ai ma le latou umia o le talita a le Iuni.

O le ta’amilosaga mo le 2014 lea ua fa’agasolo i le taimi nei, o lo o umia ai e le kalapu lakapi mai Leone le talita, ina ua latou se’i ese mai ia Fagatogo i le tolu vaiaso talu ai i se ta’aloga finau ma le mataina.

I le fa’aauau ai o tapenaga a le Iuni mo le auina atu o sana au fili ta’ito’a 7 i le ta’amilosaga a le Pasefika mo le tausaga nei, ua fa’atulaga ai le ta’amilosaga ta’ito’a 7 e faia i le aso 4 Iulai 2014 i le malae o le VA Stadium i Tafuna, lea o le a sailia ai e au fili e tolu mai Sasa’e ma au fili e tolu mai Sisifo e sailia ai se au fili e auina atu i le ta’amilosaga a le Pasefika, lea e faia i Ausetalia i le masina o Oketopa 2014.

O le taua o le ta’amilosaga a le Pasefika lea o le a tausinio ai Amerika Samoa, o iina e fa’amautu mai ai sona avanoa e tausinio ai i le ta’amilosaga ta’ito’a 7 a le IRB lea e faia i Ueligitone i Niu Sila ma Hong Kong o le 2015.

Na taua e Togiola i se fa’atalatalanoaga ma le Samoa News i le masina na te’a nei e fa’atatau i le ta’amilosaga ta’ito’a 7 a le Pasefika mo le tausaga nei, o le a taumafai le Iuni e auina atu se au lelei ina ia mautinoa e toe maua fo’i e Amerika Samoa le avanoa e tausinio ai i Hong Kong mo le tausaga fou.