Ads by Google Ads by Google

Toese: Popole se tina i le saogalemu o lona to’alua

O le fa’alavelave lea o lo o tu’uaia na fasi fa’amo’amo’a ai se ali’i o lo o taofia fa’apagota i totonu o le toese e isi fo’i ali’i o lo o taofia fa’apagota i le aso Faraile o le vaiaso na te’a nei, ua fesiligia ai e le to’alua o le ali’i o lo o manu’a le saogalemu o le ola o si ona to’alua ao aumau ai i totonu o le toese.

 

E pei ona ripotia e le Samoa News i lana lomia o le Lali i le aso ananafi, o manu’a e pei ona a’afia ai foliga o se ali’i o lo o taofia fa’apagota i le toese, e mafua mai lea ina ua fasi o ia e ni ali’i pagota i le aso Faraile, ae ana le iloa e lona to’alua le mataupu i le aso To’ona’i na soso’o ai ina ua mae’a ona faila lana tagi i le Ofisa o Leoleo, e le auina atu lona to’alua i le falema’i mo togafitiga.

 

O le taeao o le aso Faraile na te’a ina ua mae’a ona tula’i le ali’i o Nick Motu i luma o le fa’amasinoga fa’aitumalo, na tula’i mai ai loa le fa’alavelave e pei ona taua e se molimau i le Samoa News, ina ua fa’ateia le ali’i o Motu e le i leva ona saofa’i i totonu o le potu lea o lo o loka ai o ia i totonu o le toese, ae savali atu loa le isi ali’i pagota ma kiki lona auvae.

 

Na taua atili e le molimau i le Samoa News e fa’apea, na taumafai Motu e oso atu i le ali’i pagota sa ia kikiina o ia, peita’i sa taofiofi o ia e le isi ali’i pagota, ae fa’aauau pea ona fasi o ia e le ali’i pagota na mua’i kikiina lona auvae, ae o le isi ali’i pagota o lo o tu i le faitoto’a e vaai se leoleo e alu atu.

 

O Motu o lo o tu’uaia i le moliaga o le gaoi, e mafua mai i le fa’alavelave lea o lo o tu’uaia ai o ia i lona ave fa’agaoi o se tupe mai se isi tagata, lea na ia fa’ailoa ai loa i leoleo e fa’apea, o le tupe sa ia gaoia na alu ma fa’atau mai ai vaega o fualaau fa’asaina mai le Aute, ma o lo o i ai le masalosaloga, o ni isi e feso’ota’i i le nofoaga e pei ona taua sa fa’atau mai ai fualaau fa’asaina sa aofia i le fa’alavelave e pei ona manu’a ai Motu.

 

E pei ona taua e le molimau i le Samoa News, o le pepa o le tagi fa’asaga ia Motu, lea o lo o tusia uma ai moliaga ma le fa’amatalaga a le ua molia i leoleo, sa galo i totonu o le potu i le aso Faraile na te’a nei ina ua auina mai o ia i le fale fa’amasino, ma e masalomia, o iina na mafua ai ona maua e ali’i pagota fa’amatalaga a le ali’i o Motu sa fai i leoleo, ma tula’i mai ai loa ma le fa’alavelave e pei ona taua.

 

Pe tusa o le itula e 7:00 i le taeao o le aso To’ona’i na te’a nei e pei ona taua e le molimau i le Samoa News, na aga’i atu ai le to’alua o Motu ma si ana fanau e to’afa e asi le Tama o le aiga, peita’i e toeititi lava tapuni le taimi o asiga i le itula e 1:00 i le aoauli, e lei alu ane lava Motu e feiloa’i ma lona aiga, e ui ua fa’atele ona ave i ai poloa’i e alu ane e feiloa’i ma lona aiga.

 

O le avanoa lava na maua e Motu e alu ese mai ai i le nofoaga o lo o taofia ai o ia, na mafai ai lona savali telea’i ane e feiloa’i ma lona aiga, ma tusa ai o le fa’amatalaga a le molimau, na avea le fa’ateia o le Tina ma le fanau i manu’a o lo o a’afia ai Motu ma itu na feei ai si ana fanau i luga ma fetagisi, ae matapogia ai si ona to’alua.

 

Na matua musu lava le Tina e talanoa mai i le Samoa News ina ua fesiligia o ia e uiga i lenei mataupu, ona sa ia taua lona popole i le saogalemu o si ona to’alua ma lana fanau, e mafua mai i le vaaiga sa ia vaaia i le toese i le aso To’ona’i na te’a nei, i le leva ona manu’a tigaina o si ona to’alua, ae leai ma se leoleo o le toese na ia logoina le Ofisa o Leoleo e uiga i lenei fa’alavelave, leai fo’i se isi na manatu e auina atu Motu i le falema’i mo togafitiga.

 

Na pau le saunoaga a le Tina i le Samoa News, o lo o popole lava o ia i le saogalemu o lona to’alua, a o taofia ai i totonu o le falepuipui, ae na taua e le molimau e fa’apea, ana le augani le tina i le Ofisa o Leoleo mo se fesoasoani, e le mafai ona auina atu Motu i le falema’i i Fagaalu i le aoauli o le aso To’ona’i na te’a nei pe tusa o le itula e 3:00 e vaai le foma’i.

 

Na fiu le Samoa News e fa’afeso’ota’i le Komesina o Leoleo mo sana saunoaga e uiga i lenei mataupu, atoa ai ma le Pule o le Falepuipui, peita’i e le i manuia.

 

A o lei saofa’i Motu i luga o le nofoa i le taimi na valaau ai lana mataupu i luma o le fa’amasinoga maualuga i le taeao ananafi, na umi se taimi o silasila sa’o i ai le afioga i le Fa’amasino Sili ia Michael Kruse i ona foliga ma manu’a o lo o i ai, ae o le taimi fo’i lea o lo o vaaia ai le mafatia o si ona to’alua e ala i le maligi o ona loimata i luga o le nofoa o lo o saofa’i atu ai.

 

O le ali’i loia ia Michael White lea o lo o tula’i mo Motu, na ia fa’aleoina le tali tete’e a Motu i tu’uaiga a le malo fa’asaga ia te ia, ma fa’atulaga ai loa le isi ana iloiloga e faia lea i le aso 30 o Mati 2016.

 

Na valaau Kruse i loia mo sa latou talanoaga puupuu i luma o lana laulau, ae ina ua fesiligia e le Samoa News le ali’i loia ia White i le mafua’aga o le latou talanoaga puupuu ma le fa’amasino sili, na taua ai e le ali’i loia le fesiligia e Kruse o le mafua’aga o manu’a i foliga o Motu, ma ia poloaina ai le latou Ofisa e su’esu’e le mataupu o lo o mafua ai manu’a i foliga o Motu, ma fa’amaonia mai ai loa e le ali’i loia ia White le sauni o lona Ofisa e su’esu’e le mataupu lenei.