Ua i luma nei o le Faamasinoga Maualuga talosaga ma faafinauga a loia, faasaga i le mataupu e uiga i se taavale a se tagata na faatau i Amerika ma taunuu mai i le teritori ia Ianuari 2012, peitai e le o mafai ona tatalaina atu lea taavale i le tagata e anaia ona o loo taofi e le Ofisa o Tiute a le malo.

E ui e lei faatulagaina se aso e fofogaina ai lenei mataupu i luma o le faamasinoga, peitai ua maea ona faila e le loia a le o loo faia le tagi sana faamatalaga i le faamasinoga, ma ua maea foi ona tuuina atu i ai se tali a le malo e uiga i lea tagi.

O le tagi na faaulu e Live Saunoa o Faleasao, Manu’a i le faamasinoga, tauala atu i lana loia fautua o Fiti Sunia, e fesiligia ai le Faatonuga Faalauaitele a le Kovana Sili ia Togiola Tulafono na tuuina mai i le 2007, e faasa ai le toe faaulufaleina mai i le teritori o taavale ua tuana’i le taimi na fausia ai ma le tausaga faatulafonoina.

O le Faatonuga Faalauaitele a le kovana sili na sainia i le 2007, sa faasa ai le toe faaulufaleina mai o taavale sa fausia i tua atu o le 1999, peitai sa i ai aiaiga ma tuutuuga e talia ai se taavale e i tua atu o le tausaga e pei ona taua, pe afai e i ai se manaoga faapitoa mo se vaitaimi e manaomia ai le faaulufaleina mai o lea taavale.

O se talosaga e faataga ai le faaulufaleina mai o lea taavale e tatau ona faila i le Ofisa o le kovana.

O le fuafuaga a le kovana e faailoa ai le lagolagoina e le malo o taumafaiga e tete’e atu i aafiaga ua i ai suiga o le tau i le taimi nei i le lalolagi.

O le vaiaso na te’a nei na faila ai e le loia a Saunoa o Sunia se tagi i le faamasinoga, e fesiligia ai le faatonuga faalauaitele a le kovana lea ua le mafua ai ona taofi e le malo lana taavale na faatau mai i Kalefonia.

I le tagi a Saunoa o loo taua ai e faapea, o lana taavale, le ituaiga o le Dodge Ram 1500 struck 1996 na faatau mai i Kalefonia, ina ua toe foi mai i le teritori. O feuiaiga sa faia ma le kamupani vaa a le Polynesia Line mo le aumaia o lana taavale i le atunuu, e aofia ai le tuuina atu i ai i le kamupani vaa o faamaumauga uma e uiga i le taavale, ma o le masina o Ianuari  2012 na taunuu mai ai le taavale i le teritori.

Ina ua taunuu le taavale, sa taofi e le Ofisa o Tiute e le mafai ona tatalaina i tua, faavae lea i luga o le faatonuga faalauaitele a le kovana i le 2007. Na taumafai foi Saunoa e faila sana talosaga i le loia a le kovana mo se avanoa e tatala ai lana taavale i tua, peitai sa faailoa i ai e le loia, e le agavaa lana taavale i aiaiga e mafai ai ona talia se talosaga faapitoa mo le faaagafuaina o vaega o le faatonuga faalauaitele.

Na taua e Saunoa e faapea, ina ua faagasolo pepa mo le aumaia o lana taavale, sa ia tuuina atu pepa uma i le kamupani vaa, peitai e lei faailoa atu e le kamupani vaa ia te ia se tulaga e uiga i le Faatonuga Faalauaitele a le kovana i le taimi na tuuina atu ai pepa o le taavale, ae na faatoa faailoa mai ina ua auina mai le taavale i le teritori.

Ae i le tali a le malo faasaga i le tagi a Saunoa, o loo teena ai e le alii loia ia Michael Iosua nisi o faamatalaga e uiga i lenei mataupu.

Fai mai le malo, e lei i ai se taimi na fautuaina ai e le Ofisa o Tiute le o loo tagi sei vagana o se faatanaga mai le ofisa o le kovana sili ona faatoa mafai lea ona tatala lana taavale i tua. Fai mai le malo, e le o i ai i le faatonuga faalauaitele a le kovana se vaega o loo taua ai ituaiga taavale na fausia i le 1999 e faasa ona toe aumaia i le teritori.

Fai mai le malo, sa fautuaina kamupani vaa e uiga i le faatonuga faalauaitele a le kovana, mo taavale ma latou tausaga e faataga ona toe faaulufale mai i le teritori.

faaliliu Ausage Fausia