Ua toe tolopo i tua le aso e tapunia aloaia ai le tautua a le Faletupe o Hawaii i Amerika Samoa, lea na fuafua e maea i le aso 14 Mati, 2014, i le mae’a ai ona toe talosagaina e le alii kovana sili ia Lolo Moliga o le pulega a le faletupe, i se latou fonotaga sa faia i Honolulu i le aso Gafua.

O le amataga o le tausaga na faailoa mai ai e le faletupe le toe tolopo lea o le aso e tapunia ai le lala i le teritori nei mo le isi tausaga, amata atu i le masina o Mati o le tausaga nei, i le maea ai lea o se talosaga sa tuuina atu e le alii kovana, o le alii faipule i Uosigitone ia Faleomavaega Eni Hunkin atoa ai ma isi sui o le malo.

O le mafuaaga, ina ia tuu atu ai le avanoa ia Amerika Samoa e faavae ai le isi faletupe mai Amerika e faatautaia faalotoifale, lea ua amata ona faagasolo i le taimi nei lona faavaeina, e pei ona igoa ai i le Community Bank of American Samoa, lea o lo o faagasolo i le taimi nei le faamaonia i tulafono ma ta’iala a le feterale e faavae ai lona faatautaiga.

Ae i le le toe atoa ai o ni aso e 100 taunuu i le aso e tapunia ai le tautua a le Faletupe o Hawaii, na mafua ai loa ona tuuina atu se talosaga a Lolo mo se avanoa e feiloa’i ai ma le Peresetene o le Faletupe atoa ai ma le Pulesili ia Peter Ho, lea e pei ona faatautaia i Honolulu i le vaiaso nei.

I se pepa o faamatalaga na tuuina mai i le alii kovana i le maea ai o le latou fonotaga, sa ia taua ai le faagaeetia o lona loto atoa ai ma le leai o ni upu e faamatala ai lagona fiafia, ona o le faaauauina pea lea o le auaunaga a le Faletupe mo Amerika Samoa, ma talia ai loa le toe tolopo atu i tua o le aso e faamuta ai la latou auaunaga.

Ina ua fesiligia e le Samoa News le taimi tonu e maea ai le tautua a le Faletupe o Hawaii, na taua ai e le Faufautua faapitoa a le kovana ia Iulogologo Pereira e faapea, e le o i ai se taimi tonu ua faatulaga e faamuta ai lea auaunaga, ae o le a fuafua lava e le kovana ma Peter Ho, ina ia mautinoa e leai ni aafiaga o le tamaoaiga o le atunuu e tula’i mai ai pe afai e faamuta le auaunaga a le faletupe.

Na taua e Lolo i le pepa o faamatalaga e faapea, o le faaiuga a Ho ina ia toe tolopo le aso e tapunia ai le auaunaga a le faletupe, e le gata ua atagia mai ai lona tulaga faataitai, ae o lo o faamuamua foi e le faletupe o Hawaii tagata ae le o penefiti.

Na faafetaia e Lolo le faaiuga ua faia e Ho ma le pulega a le faletupe o Hawaii, ma ia taua ai le le faigofie o le faaiuga ua latou faia, fuafua i le tulaga faaletonu o lo o i ai le lala o le faletupe i le teritori.

Na taua foi e le alii kovana e faapea, ana le tuuina atu lana talosaga mo se fesoasoani mai le faletupe, atonu o le a avea o ia o se taitai faatamala ma le mataala i mea lelei mo le atunuu.

Sa ia taua fo’i e faapea, o le faaiuga ua faia e le pulega a le faletupe, ua mafai ai ona lava le taimi e faamae’a ai mea uma o lo o mana’omia mo le Community Bank, o se taimi foi lea o le a mafai ai e le malo ona faamaea gaioiga uma e moomia mo le tautua a le faletupe fou ua foufou mai.

Na taua e Ho i se pepa o faamatalaga e faapea, o le latou fonotaga ma le alii kovana, o le faailoga lea o le toe faaopoopo o isi aso o le tautua a le faletupe mo le atunuu lautele.

Sa ia taua foi e faapea, o lo latou faanaunauga ia sologa lelei mea uma mo tagatanuu ma le malo o Amerika Samoa pe a latou tula’i ese, ma e le mafai foi ona latou tula’i ese se’i vagana ua mautu manaoga uma e moomia ona faia mo le tautuaina o le atunuu.

faaliliu Ausage Fausia