Mai se fonotaga fa’apitoa mo faia’oga a le malo i le fa’ai’uga o Ianuari 2016, (Teacher Development Seminar), na tula’i ai le sui mai le ASCC Land Grant Agriculture Program Auatagavaia Tunai Alfred Peters ma ia saunoa, “Ia tau solomua ia te outou faia’oga, ona fa’aofi atu nisi tomai fou mo le fanau e tapena ai i si tomai fou e fa’aaoga tatau ai latou taimi pe afai ua le maua ni galuega e maua pe a mae’a a’oga maualuluga.”

O lena tima’iga na fa’aoso fiafia i le tama’ita’i faia’oga o Makerita Tofa o le a’oga a Pavaiai Elementary, ma sa ia manatu loa, “E ui ina laiti la’u vasega o le level K5, ae le tuua se mea lelei ua ou iloa mai le semina lea. O le fai loa o se fa’ato’aga, aua o lo’o i ai si vaipanoa i le va o falea’oga e fa’aaoga ai. O lumafale fo’i o le matou potu a’oga.”

Ina ua soalaupule o ia i le pule a’oga Lemapu Suani ma le Sui Pule Aoga Betty Iosefo, sa talia ma le fiafia e i la’ua nei, ae ua toe tu’u mai le isi lu’iga, saili se tinoitupe e fa’atino ai. Na i’u le tofa, o le a faia tusi aisi i Kamupani mo se fesoasoani, ma sa talia lelei le fanoga e le Kamupani a Haleck Island Motors i Pavaiai.

“O le agaga o le fa’afetai sa lagona, ae maise ua fa’aosofia atili le naunau ia i matou uma o faia’oga ma fanau a’oga i le level K 3-5, i Pavaiai,” o a Tofa lea.

O le faleoloa o le Ace Hardware sa faia ai le fa’atauga, taua’ao fo’i ma le aisiga i lena faleoloa ma toe ofo mai ai le Ace Home Center e aumaia fua fa’atauga o laupapa, fao ma le uaea e si’omia ai le galuega a le fanau ia le sao i ai meaola fa’alafua.

“Ua tino mai nei le galuega, ae o le fa’afetai e fia fa’aleo i nei kamupani, aua na sau fo’i ma uta palapala malu mai le Vailuu Trucking Company i Pavaiai, ua atoa i ai mea e fa’atulaga ai le togala’au o La’au ‘aina mata a lenei vasega,” o le tala lea a Tofa.

“O matua lava isi fesoasoani sili, aua sa o mai matua e fa’atino moega mo le totoina o la’au, ae maise o le fa’amamaina o le vao, ma sa o mai fo’i i aso To’ona’i ina ia fausia le pa ma fa’amautu lelei le togala’au ua i ai nei.”

O le tau o le fa’atauga na totogia e Halecks e $700; o le fa’atauga na totogia e le Ace Home Center e $200; ma uta uma o le palapala malu sa aumaia e Vailu’u & Sons i Pavaiai, ua latalata fo’i i le $300.

O la’au toto mai le polokalama o fa’ato’aga a le ASCC Land Grant, atoa ai ma le fa’amaluina o le eleele ma fa’amoega mo le togala’au, ua fa’atulaga uma e taulele’a mai lea polokalama a le Kolisi Tu’ufa’atasi.

O faia’oga o lea vasega e auai ma se sui e to’atasi mai le World Teach, le susuga Mark O’Malley mai Wisconsin, ma o se mea e fiafia ai lenei ali’i, ua toe oni nai masina ona tu’ua lea o Amerika Samoa, ae ua fiafia tele, ua ia totoina ni la’au, o le a aoga tele mo le fofoga taumafa o le fanau a’oga, le vasega o faia’oga fa’apea ma matua, a’o le’i tu’umuli.

“O lenei se taimi muamua ua aofia ai lo’u sui talavou i se togala’au ‘aina, o le mae’a ai lava o a’oa’oga i le Iunivesite o Wisconsin ma sau ai loa i lenei polokalama aoga tele mo a’u, o le World Teach, ae le’i maua se avanoa lelei ou te totoina ai se togala’au mo ou matua. Lea ua faia mo la’u vasega, ua ou matua fiafia lava,” o O’Malley lea.

“O le aoga sili, ia mafai e le tagata ona toto la’au e fa’aaoga e lona aiga, po’o lona lava tagata soifua, aua ua tele ina fa’atuatua tagata e fa’atau mai mea ua mae’a totoina, ae le’i iloa lava e oe po’o a mea na fa’aaoga e totoina ai nei la’au ua e taumafaina,” o lana tala lea.

O le ‘auga fo’i lea ua fa’aosofia ai Makerita Tofa ma le vasega o faia’oga uma atoa ai ma le pulega i Pavaia’i, “Ia fa’ateleina ona toto e i tatou o tatou lava fa’ato’aga e saunia lelei mai ai tatou taumafa i aso ta’itasi, e le fa’amoemoe ina ia se’i o’o mai va’alele ma va’a oloa ma fua o fa’aeleeleaga mai isi atunuu ma le Iunaite Setete.”

O le ‘auga lava lea o le Polokalama atoa a le ASCC Land Grant Agriculture, “Ia fa’aosofia agaga o tagata Amerika Samoa e totoina o latou fa’ato’aga e toe fa’aaoga e i latou ma latou aiga, e le gata ina fa’atau atu, ae gaosia ai latou fo’i tausami ma malolosi atili ai, ona ua taumafa tatau i mea’ai paleni na totoina i o tatou lava eleele ma ona sosia,” o se tala lea a Autagavaia.