E lua ni pisinisi i Amerika Samoa ua mae’a ona sainia sa latou maliliega ma le Matagaluega o Leipa a le fetarale, (USDOL), ma ua malilie la te totogiina atu i ni tagata faigaluega se to’a 7 se vaega tupe e tusa ma le $23,922, e fa’apaleni ai penefiti mo nai tagata faigaluega e le i lelei ona totogi.

I se pepa o fa’amatalaga na tu’uina mai e le sooupu o le USDOL i San Francisco, sa fa’amanino atili mai ai lenei mataupu.

Na taua i se vaega o lea pepa o fa’amatalaga e fa’apea, o se suesuega sa faia e le USDOL, na manino ai le le tausisia e pisinisi ia e lua o tulafono i le faa faigaluega ma le totogiina o tagata faigaluega.

O pisinisi e lua o le kamupani o le Ocean Star Enterprises Inc lea o lo o fai pisinisi ma le pisinisi e taua o le Pacific Minimart i Tafuna, fa’apea ai ma le pisinisi o le Ocean Star Enterprise Inc i Nu’uuli.

Na maua i ni su’esu’ega sa faia e le USDOL, e le’i totogi atu lea e pisinisi nei e lua o ni totogi ua mae’a ona fa’atulaga mo tagata faigaluega, e aunoa ma le totogi o i latou fuafua lea i le aofa’i o itula o lo o galulue ai i totonu o le vaiaso atoa.

I se vaega o lea ripoti o lo o taua ai e Terence Trotter, o le fa’atonu o le vaega lava lenei i Hawaii e fa’apea, i suesuega sa faia, na faamaonia ai le faatulaga e pisinisi o ni totogi i le aofa’i e $4.60 i le itula, ma faamautuina ai le totogi lea e maua e le tagata faigaluega pe a atoa le 40 o itula faigaluega i le aso, e aunoa ma le totogiina o a latou itula ova taimi.