Na tu’uaia e le ali’i pagota e 48 tausaga lea na ia faia uiga mataga i lona niece e 15 tausaga le matua si Tiapolo o Satani, o ana fa’aosoosoga lea na mafua ai ona ia soli le tulafono ma ia faia ai uiga mataga i le teineititi na a’afia.

E le i avea tu’uaiga fa’asaga i le Ti’apolo atoa ai ma loimata maligi mai le to’alua o le ali’i na molia, ma itu na ‘alo ai le fa’amasinoga i le tu’uina atu o lana fa’asalaga, e fa’asala le ali’i amio valea i le toese mo le 7 tausaga.

O le teineititi na a’afia i lenei mataupu, o le niece o le to’alua a le ali’i ua molia, na aumai i Upolu ma nofo i le aiga o le ua molia, ma avea ai o ia o se tasi o lana fanau, peita’i na saunoa le ali’i fa’amasino sili ia Michael Kruse e fa’apea, na fa’aaoga e le ua molia le malosi sa ia tausia ai le teineititi na a’afia na te faia ai uiga mataga ia te ia.

O se tasi o itu sa fia malamalama i ai le fa’amasinoga mai le itu a le malo, po o i ai se vaega i lalo o tulafono tau Femalagaaiga, e taofia ai le aumai o fanau mai Samoa e nonofo i o latou auaiga i le teritori nei, ae nonofo pea o latou matua i Samoa.

E fa moliaga mamafa na ulua’i tu’uaia ai e le fa’amasinoga le ua molia, o ia moliaga e aofia ai le moliaga pito mamafa o le faiaiga ma se teineititi e laititi i lalo o le tulafono, lea e oo atu i le 15 tausaga le umi e mafai ona fa’asala ai o ia i le toese, fa’apea ai ma isi moliaga e tolu, e ta’i 7 ma le ta’i 5 tausaga e mafai ona fa’asala ai se tagata i le falepuipui pe a fa’amaonia e le fa’amasinoga.

I lalo o se maliliega na sainia e le ua molia ma le malo, sa ia tali ioe ai i le isi moliaga mamafa e le silia ma le 7 tausaga le umi e mafai ona fa’asala ai o ia i le toese, ae solofua e le fa’amasinoga isi moliaga e tolu sa totoe ai i le pepa o tagi na fa’aulu e le malo.

Na fa’atoese le ua molia e tusa ai o lana solitulafono, ma ia talosagaina ai se isi avanoa mo ia, sei toe fo’i atu ai i tua e tausi lona aiga, o lona to’alua ma lana fanau.

Na ta’utino le ua molia e fa’apea, ua avea masina na taofia ai o ia i le toese ua ia a’oa’oina ai se isi lesona aoga mo lona olaga, ma ua ia iloaina fo’i le sese o le mea sa ia faia.

Na talosaga ma loimata le to’alua a le ua molia i le fa’amasinoga mo se avanoa, e mafai ai ona toe tatala atu lona to’alua e fesoasoani i le tausiga o le la aiga aemaise ai si a la fanau laiti e to’afa.

Na taua e le tina ma ona loimata e fa’apea, o taeao uma lava na te tuua ai lo latou aiga i le itula e 4:00 i le vaveao mo lana galuega, ae nonofo ai na o lana fanau laiti i le fale e leai se isi e vaaia.

Na finau le loia a le ua molia i le fa’amasinoga ina ia fa’amama se fa’asalaga mo le ua molia, peita’i na finau le loia a le malo ina ia fa’asala le ua molia i le fa’asalaga pito sili ona mamafa o lo o fa’atulaga mai e le tulafono.

I le mae’a ai ona iloilo e ali’i fa’amasino o mau uma e lagolagoina ai lenei mataupu, sa latou tu’uina mai ai loa le fa’asalaga fa’afalepuipuie 7 tausaga mo le ua molia.