Ua taofia nei e leoleo i le toese i Tafuna se ali’i e 21 tausaga le matua, ona o tu’uaiga i lona faia lea o uiga mataga i se tama’ita’i e 16 tausaga, e aofia ai lona faiaiga ia te ia.

O moliaga mamafa e lima ua tuuaia ai e le malo le ali’i o Nicholas Kuka e aofia ai le moliaga o lona faiaiga i se tama’ita’i e talavou i lalo o le tulafono; faia o amioga fa’asotoma; tagofia o itutinosa o se tama’ita’i i le tulaga muamua; fa’aoolima mataga i se tama’ita’i; atoa ai ma lona faia o ni feusuaiga mataga i se tama’ita’i e le’i fa’aipoipo i ai.

O lenei mataupu na tofu atu i le ofisa o leoleo i Tafuna, ina ua faila e le aunty o le tama’ita’i e 16 tausaga na a’afia sana tagi i le ofisa o leoleo e uiga i lenei mataupu.

I le aso 23 Aperila 2015, na faila ai e le aunty o le tama’ita’i e 16 tausaga sana tagi i le ofisa o leoleo, fa’asaga i se ali’i sa ia faia uiga mataga i le tama’ita’i na a’afia, lea sa ia fa’ailoa i leoleo o lana tama.

Na fa’ailoa atili e le tina i leoleo e fa’apea, o lana tama sa sola ese mai le latou aiga, ma o iina lea e masalomia na tula’i mai ai le fa’alavelave e pei ona faia ai e se tagata uiga mataga ia te ia.

Ina ua fesiligia e leoleo le tama’ita’i na a’afia sa ia taua ai e fa’apea, i le po o le aso 22 Aperila 2015, sa ia sola ese ai mai lona aiga, ma alu ai i le fale o le ali’i la te fa’auo e igoa ia Kuka, o iina na la fai’aiga ai loa ma lea ali’i.

Na fa’amatala uma e le tama’ita’i i leoleo gaioiga sa laua faia ma Kuka, i le po atoa sa ia sola ese ai mai lona aiga.

Ina ua fesiligia e leoleo ia Kuka e tusa ai o lenei mataupu, sa ia ioeina ai lo la faiaiga ma le tama’ita’i na a’afia, i le fale o lona uncle i Malaeloa.

Na ioeina uma e Kuka fa’amatalaga uma sa tuuina atu e le tama’ita’i na a’afia i leoleo e tusa ai o le la mafutaga, pau le itu na fa’amanino e Kuka i leoleo, na te le’i fa’amalosia le tama’ita’i la te faiaiga, ae sa ia malie lava i ai.

O le aso Faraile na te’a nei na fa’atulaga e faia ai le ulua’i iloiloga a Kuka i luma o le fa’amasinoga fa’aitumalo, e iloilo ai e le fa’amasinoga mau fa’amaonia a le malo, pe lava ma totoe ia mau e lagolago ai tu’uaiga fa’asaga ia Kuka.

Ae ina ua oo i le aso o le iloiloga, sa fa’ailoa e Kuka i le fa’amasinoga lona manatu, e sili loa pe a taofi le fa’ataunu’uina o lea iloiloga fa’apitoa, ae tuu sa’o atu loa lana mataupu i luma o le fa’amasinoga maualuga e fa’aauau ai lana iloiloga.

Na teena e Kuka moliaga mamafa uma e lima o lo o tuuaia ai o ia, ina ua tula’i i luma o le fa’amasinoga maualuga i le taeao ananafi.

I lona teena ai o tu’uaiga a le malo, ua fa’atulaga ai loa lana ulua’i iloiloga e faia i le fa’aiuga o le masina o Iulai, ma o lo o taofia pea o ia i le toese i Tafuna, sei vagana ua ia totogiina le $20,000 ua fa’atulaga e le fa’amasinoga ona fa’atoa mafai lea ona tatala o ia i tua mai le toese i Tafuna.