O le vaiaso nei na tula’i ai i luma o le fa’amasinoga maualuga se tagata faigaluega a le Pulega o le Eletise ma le Suavai (ASPA) mai lona lala i Manu’a, ona o tu’aiga i lona fa’aaoga fa’agaoi o se vaega tupe a le ASPA sa tu’uina atu i lalo o lana va’ava’aiga.

O le taeao ananafi na tula’i ai le tama’ita’i o Laumalie Tali i luma o le fa’amasinoga, ma ia teena ai moliaga mamafa e lua fa’asaga ia te ia, ina ua talia e le fa’amasinoga fa’aitumalo lana talosaga e fa’aagafua lana ulua’i iloiloga sa fuafua e faia i le aso Lua na te’a nei i luma o le ali’i fa’amasino o John Ward II, e iloilo ai pe lava mau a le malo e lagolago ai tu’uaiga fa’asaga ia te ia.

O lo o tu’uaia e le malo ia Tali i moliaga mamafa e lua e aofia ai le gaoi, atoa ai ma lona ave fa’agaoi o mea totino a le ASPA sa tu’uina atu i lalo o lana va’ava’aiga.

O le ali’i loia fautua mo tagata lautele ia Michael White na fa’aleoina le tali tete’e a Tali i luma o le ali’i fa’amasino sili lagolago ia Lyle L. Richmond, ma fa’atulaga ai loa le isi iloiloga o lenei mataupu i le masina o Iulai.

O tu’uaiga fa’asaga ia Tali na alia’e mai i le taimi a o galue o ia o se tali tupe i le lala o le Ofisa a le ASPA i Manu’a.

E tusa ai ma fa’amaumauga a le fa’amasinoga o lo o taua ai e fa’apea, o Tali e taunu’u atu i ai tupe a tagata i Manu’a e totogi mo a latou pili o le eletise ma le suavai.

O se tasi o vaega o galuega fa’atino a Tali e pei ona taua i fa’amaumauga a le fa’amasinoga, o lona malaga mai lea i Tutuila e aumai tupe sa maua i le totogiina atu e tagata Manu’a o a latou pili eletise ma le suavai, ma tu’uina sa’o atu i le Ofisa autu o le ASPA i Tafuna.

I le va la o le aso 9 -13 Me, 2014 i Amerika Samoa, sa malaga mai ai Tali mai Manu’a ma se tino i tupe e $6,000, o meatotino ia a le ASPA ma le fa’amoemoe e tu’uina atu i lona Ofisa autu i Tafuna, peita’i sa le i mafai ona fa’ataunu’uina lea vaega o lana galuega.

Na logoina e le ASPA le Ofisa o Leoleo e tusa ai o lenei mataupu, ma auina atu ai loa Tali i le ofisa o leoleo mo le fesiligiaina o ia e uiga i le tupe na malaga mai ma ia.

Na fa’ailoa e Tali i leoleo e faapea, a o le i malaga mai ma ia le tupe mai Manu’a, sa ia fa’aaoga se vaega o lea tupe i le aofaiga e $1,200, peita’i o le isi vaega o le tupe sa totoe sa i lana ato, na gaoi e le tagata i luga o le va’a i le taimi na malaga mai ai, na te le o iloaina fo’i po o ai na ia gaoiina le tupe.

O lo o taofia pea Tali i le toese e fa’atali ai le aso lea ua fa’atulaga e toe tula’i ai i luma o le fa’amasinoga, ma ua fa’atulaga e le fa’amasinoga le vaega tupe e $5,000 e totogi ona fa’atoa mafai lea ona tatala o ia i tua.