Ads by Google Ads by Google

Tu’uaia se tagata faigaluega Femalagaaiga faaaoga faagaoi tupe pone

Ua tuuina atu nei se poloaiga a le Faamasinoga Maualuga mo le taofia faapagota o se tamaitai faigaluega a le Ofisa o Femalagaaiga, ona o tuuaiga i lona faia o ni faamaumauga sese ina ia mafai ai ona ia ave faagaoi tupe sa totogi atu e ni tagata Asia mo a latou pone (bond).

 

E le o se taimi muamua lea ua aafia ai ni isi o tagata faigaluega a le Ofisa o Femalagaaiga i mataupu faapenei.

 

Ina ua fesiligia e le alii leoleo na gafa ma le su’esu’ega, ia le tamaitai o Lagitafa Holi i le mafuaaga o lona faia o lenei gaioiga, sa ia taua e faapea, sa leai se manatu ia te ia na te gaoi tupe o pone, ae ina ua telefoni mai lona tama mai Samoa ma talosaga mai i se tupe mo faalavelave a le aiga, sa ia mafaufau ai loa i se auala e mafai ai ona ia aveese mai tupe mai totonu o le masini tali tupe.

 

O le auala na ia faia e pei ona taua i faamaumauga a le faamasinoga, na te faaaogaina le tupe e $2,300 mai pone a tagata Saina, ona faamaumau lea i le lisiti mo isi manaoga a le ofisa, e aunoa ma lona faaaogaina o ala masani e faatino ai galuega.

 

Na taua e le ua molia i le alii suesue e faapea, sa ia faia lenei gaioiga ma lona talitonuga e le mafai ona maua e le Ofisa Suetusi a le malo.

 

O lenei mataupu na alia’e mai ina ua masalomia le faia e le ua molia o ni faamaumauga tau faasese i pone o tagata mai fafo.

 

I faamaumauga a le faamasinoga o lo o taua ai e faapea, o le tamaitai ua molia sa kesia (cashier) i le Ofisa o Femalagaaiga, o ia e taunuu atu i ai tupe o lo o totogi e tagata mo a latou pone, o lana galuega o le faamaumau o igoa o tagata ma le aofai o le tupe o le pone o lo o totogi i tusi lisiti e tolu kopi i le lisiti e tasi.

 

I tuuaiga a le malo o lo o taua ai e faapea, a totogi atu le pone a se tagata, ona tago lea o lenei tamaitai ua sasae ese le kopi pito i luga o le lisiti ma tusi ai le aofa’i o le pone e $2,300, ae o kopi e lua o lo o totoe ai, sa ia tusi sese ai le aofa’i o le tupe, e na’o le $147, toe sese le igoa o le tagata e ana le pone, ona taga lea e lenei tamaitai o leisi vaega o le tupe.

 

O kopi e lua o lo o pito i lalo e pei ona taua i faamaumauga a le faamasinoga, o le kopi a le Ofisa o Femalagaaiga ma le Ofisa a le Su’etusi.

 

O lo o taua i faamaumauga a le faamasinoga se lisiti sa tuuina atu e le Suetusi tuai a le malo sa i ai, o lo o tusia ai i luga o le kopi muamua le igoa o le kamupani o le W.P.I Inc, o lo o latou sponsor se tagata mai Saina e igoa ia Che Pijiang, faatasi ai ma le tupe o le pone e $3,200, peitai i kopi e lua o le lisiti sa tusia ai e le ua molia le igoa o Palauli Alopopo, o le sponsor, ae o Venise Semu mai Samoa, ma le tupe o le pone e $147.

 

O ia gaioiga uma sa faia i le aso 6 Me, 2010 e pei ona taua i faamaumauga a le faamasinoga.

 

O le isi lisiti o pone o lo o taua i faamaumauga a le faamasinoga na sese ona faamau e le ua molia, o le pone e $2,300 o lo o tusia ai le igoa o le kamupani o le J & P Corporation, lea sa sponsor se alii mai Saina.

 

O ia faamaumauga sa tusia i le lisiti lanu pa’epa’e pito i luga, ae o lisiti e lua o lo o sosoo ane ai, sa tusia ai e le ua molia le igoa o Jay Vaoalii, o le sponsor lea a Fiatamalii Leafa mai Samoa, ma le aofa’i o le tupe o le pone e $147 o lo o tusia ai.

 

Na fesiligia e le alii leoleo na gafa ma le suesueina o lenei mataupu, ia se alii faipisinisi mai Asia o lo o aafia i lenei mataupu, ma ia taua ai e faapea, e $2,300 le tupe sa ia totogia mo le pone a se alii mai Saina na ia aumaia e fesoasoani i lana pisinisi. O le kopi o le siaki o le $2,300 na tuuina atu e le alii faipisinisi i le alii suesue e faamaonia ai lana molimau e faatatau i lenei mataupu.

 

I se ripoti na tuuina atu e le Suetusi a le malo i le Ofisa o le Loia Sili, sa taua ai lisiti e 17 o lo o masalomia sa faia i ai le ua molia ni faamaumauga sese. O ia lisiti o lo o i ai le saini a le ua molia, atoa ai ma le aso 14 Aperila 2010 e oo atu i le aso 12 Oketopa 2012, i le aofaiga o le tupe o lo o taua ai e $39,100.

 

Ina ua fesiligia e le alii suesue le ua molia i le taimi muamua, sa ia ioeina lona faia o fesuiaiga i lisiti atoa ai ma lona faaaogaina o le $2,300.

 

Ina ua fesiligia faalua i le isi foi lisiti sa ia faia i ai lenei gaioiga, na ioe le ua molia o lana saini o lo o i ai, atoa ai ma lona faaaogaina o le $2,300 sa totogi atu mo le pone, ae ina ua toe fesiligia i le isi lisiti, sa tagi ai loa le ua molia ma faatoese i le alii suesue e tusa ai o le gaioiga sa ia faia, atoa ai ma lona ioeina o lona faaaogaina o le $2,300 sa totogi atu mo le pone.

 

E $50,000 le tupe lea ua poloaina e le faamasinoga e totogi ona faatoa mafai lea ona tatala o ia i tua.