Ads by Google Ads by Google

Tu’uaia ulugali’i i lo la fa’asosola molimau i Apia

Ua toe taofia nei i le toese i Tafuna, ia se ulugalii ua tuuaia e le malo i lo faasosola o ni tama’ita’i se toalua, na fa’amoemoe le malo e avea ma a latou molimau, i se mataupu e faasaga i le tamaloa.

O le taeao ananafi na tutula’i ai i luma o le Fa’amasinoga Fa’aitumalo ia Tau Malae ma lona faletua o Miracle, lea ua tu’ua’ia i le taumafai e faaleaga mea molimau a le malo ma le faia o ni gaioiga e ufiufi ai se solitulafono.

E ta’i $10,000 lea ua fa’atulaga e le fa’amasinoga, e mafai ona tatala ai i la’ua i tua.

O le tausaga ua tuana’i na molia ai Tau Malae i ni moliaga i lona faia o ni amioga mataga ma ni amioga fa’a Sotoma, i tama’ita’i nei ua malaga i Apia.  O nei tama’ita’i, e pei ona ta’ua i fa’amaumauga a le fa’amasinoga, o ni tei (nieces) a le tina ia Miracle Malae, lea na la aumaia mai i Apia ma latou nonofo faatasi.

Na tuuaia e tamaitai na aafia ia Tau i lona faafefe o i laua i le sasa ma le toe faafoi i Upolu, pe afai ae la ta’uina i se tasi le mea o lo o tupu. E le’i mafai e nei tamaitai ona faitau pe faafia ona faia e Tau nei uiga mataga ia i laua, ina ua fesiligia e leoleo.

O lo o taua foi i faamaumauga a le faamasinoga e faapea, na faatoese le ua molia i tamaitai na aafia ma ia folafola i ai, na te le toe faia le mea sese sa ia faia ia te i laua.

Ae ua ta’ua i fa’amaumauga a le fa’amasinoga e faapea, o le aso 22 o Me 2012 na tuua ai e nei tamaitai le teritori mo Samoa. O lo o taua e le malo e faapea, e ui o lo o ia te i latou pepa malaga a nei tamaitai, peitai sa mafai ona talosagaina isi a laua pepa malaga fou, lea na mafai ai ona la tuua le teritori mo Samoa.

O se tasi o tuutuuga o lo o tatala ai Tau, o le faasa o ia po o n iisi o lona aiga ona latou toe faafesoota’i tamaitai o loo aafia i lenei mataupu, peitai o lo o tuuaia e le malo le toalua o Tau i lona alu lea ma talanoa i tamaitai o lo o aafia i ni isi o taimi i le nofoaga o lo o nonofo ai.

Na fesiligia e leoleo ni isi o molimau e uiga i le mataupu fou lea ua tuuaia ai le ulugalii, ma taua ai e molimau i leoleo e faapea, sa faamatala atu e Miracle ia te ia, lo la talosagaina o ni pepa malaga fou mo tamaitai nei e toalua ina ia mafai ai ona la toe foi i Samoa.

O le vaiaso nei lea sa faatulaga e le malo e faataunuu ai le faamasinoga autu a Tau i luma o le Faamasinoga Maualuga, peitai na toe talosaga le loia a le malo o Mitzie Jessop ina ia toe tolopo lea faamasinoga, ona o lea ua faila e le malo isi moliaga fou faasaga ia Tau ma lona toalua, peitai sa tetee i ai le loia a Tau, le susuga Fiti Sunia.

Na taua e Sunia e faapea, e le tatau ona toe toloina le faamasinoga autu lea ua faatulaga mo le vaiaso nei, ona o lea foi ua sauni lana itu e finau le mataupu, peitai na taua e Jessop i le faamasinoga e faapea, e le gata e fesootai moliaga fou ia ua faila faasaga i le ulugalii ma le mataupu o lo o tuuaia ai le tamaloa, ae o lea foi ua toe faafoi e le ulugalii tamaitai o lo o aafia i Samoa.

O le Aso Tofi o le vaiaso nei lea ua faamoemoe e toe valaau ai le mataupu a Tau ma Miracle i luma o le faamasinoga faaitumalo, e iloilo ai pe la te mananao e faataunuu le la ulua’i iloiloga i luma o le alii faamasino o John Ward II, po o le tuu sa’o atu loa o le la mataupu i luma o le faamasinoga maualuga e faaauau ai a laua iloiloga.

Ae o le mataupu muamua o lo o tuuaia ai Tau, ua toe tolopo le aso e fofogaina ai lana faamasinoga autu.