O le fa’atasiga sa faia a Matua ma Fanau A’oga fa’apea ma Faia’oga i le aso ananafi, e tolu lelei mea taua na fa’atino ai mo lea a’oga. O le tufatufaina o fa’ailoga i fanau ua ausia togi maualuluga i mataupu tau’avea ma kosi o Matata Eseese o tau’avea i a’oga; ma le tufaina o fa’ailoga i fanau ua tumau latou GPA 4.0; ma le sailia o le latou Tausala ma le Manaia Nuuuli VocTech High mo lenei tausaga a’oga.

Mai le vasega 9 e to’alima le fanau o ausia le GPA 4.0, e to’afa teine ma le tama e to’atasi. O le  Vasega 10 e to’alua i la’ua e 4.0GPA e na’o tama e to’alua. Vasega 11 e na’o le to’alua fo’i o tama’ita’i uma, ma le to’atasi o lo’o 4.0 i le vasega fa’ai’uaso o le ali’i o Siale Kava.

Soso’o lea ma le taua’aoina o fa’ailoga e fa’afetaia ai le taumafaiga a tama ma teine o lo’o tauva i ta’amilosaga o ta’aloga Football, Pasiketipolo a tama ma teine, Volipolo a tama ma teine i totonu o a’oga maualuluga a le tatou Malo.

O le mae’a o nei tufaga fa’ailoga, sa fa’atino ai loa le sailiga o le Tausala Lalelei o le aoga maualugaa Nuuuli Voctech High.

Tauvaga Tausala & Manaia Nuuuli VocTech High:

O lenei tausaga e to’atolu Tausala Lalelei ma le to’atolu o Manaia Tausa’afia sa tauva mo tofiga “Tausala & Manaia o le A’oga Nuuuli VocTech High.”

Ua manumalo ai nei le tama’ita’i lalelei o Karen Sagapolutele i lea tauvaga mo le tausala, ae manumalo Siale Kava mo le Manaia Tausa’afia i le tausaga 2014.

O le fesili sa talia e Donald White, sa fa’afesiligia ai le a’oa’oina o le gagana Samoa i vasega tulaga lua, pe aoga lea mo le fanau i lo latou lumana’i. Na ioe White, e aoga aua e le tatau ona motusia le so’otaga e fa’aauau ai ona olaola pea le gagana Samoa i tupulaga faia’e o Amerika Samoa.

O le isi fesili sa matagofie ae na talia e Pita Ili, “Pe ua tatau ona a’oa’oina Feusua’iga Fa’aleituaiga i a’oga maualuluga, ma aisea e tatau ai?” O le tali matagofie sa fa’ailoa ai lona taofi, “Ioe e tatau o a’oa’oina ma fa’ailoa i fanau a’oga maualuluga lenei mataupu, aua o lo’o mo’omia e le fanau ona latou matua iloa lelei, le faigata ma ogaoga e ono o’o i o latou olaga, pe afai latou te vave uia le ala fita lea! E atili faigata ai lo latou lumana’i! E tatau ona latou iloa ola tausisi i lo latou saogalemu.”

Vaiaso Fa’ataua Ai A’oga Ekalesia Katoliko

O lo ua fa’alauiloa mai le vaiaso e afua ia Ianuari 26 se’ia o’o ia Ianuari 31, 2014 ua avea nei ma vaiaso e fa’ataua ai A’oga a le Ekalesia Katoliko i le atunu’u. Ua fa’ailoa mai e amatalia le fa’amoemoe i le sauniga Misasa e faia lea i le aso Sa, Ianuari 26, e faia fa’atasi i le Malumalu Aiga Pa’ia i Fatuoaiga, i le itula e 4:30 i le afiafi.

O le aso Gafua loa ua fa’asolo le polokalama fa’apitoa a le A’oga lava latou ma e tatala mo le mamalu o matua ma aiga, i latou e fia fa’afesili i a’oa’oga a fanau, ma e fo’i e fia maimoaina le taimi o vasega ma le a’oa’oga o fanau i potu aoga.

Mo le a’oga maualuga a Fa’asao Malisi High, o le a faia i le aso Lulu le latou Career Day po’o le aso mo le fa’ailoilo o galuega e mafai ona e fia tautua ai i lou aiga, malo ma tagatanu’u uma o le atunu’u.

O le a’oga a Marist St. Francis Elementary ua latou fa’aaogaina lenei vaiaso e avea ma vaiaso e fa’atautaia ai le latou “History Day” i le aso Faraile 31, Ianuari 2014.