O le vaiaso na te’a nei na fa’aulu ia i luma o le Senate ma le Maota o Sui se pili e fa’aopoopo ai suiga i le tulafono o lo’o i ai nei e lesitala ai igoa o tagata uma e ta’usala i solitulafono o le faia lea o uiga mataga i fanau laiti. O le tulafono a Amerika Samoa e faatutusa ma le tulafono a le malo tele, e faaigoaina o le SORNA.

O le tulafono o le SORNA e pei ona fa’aaogaina e setete ma teritori o le Iunaite Setete, ua mafai ai ona taofia le tupu pea o le solitulafono o le faia o uiga mataga i fanau laiti, ina ua mafai e le SORNA ona fa’ailoa igoa ma nofoaga o lo o nonofo ma aumau ai tagata na a’afia i solitulafono nei.

E o o mai lava i le taimi nei e le i faagaioiina lava lea tulafono i totonu o Amerika Samoa.

O le itu taua o le tulafono lenei, o le tulaga saogalemu o fanau mai tagata o lo o nonofo ma aumau i le teritori, sa ta’usala i latou i solitulafono faapenei mai atunuu na malaga mai ai.

I le tino o le tulafono taufaaofi lenei o lo o taua ai e faapea, so o se tagata lava e nofomau i totonu o Amerika Samoa po o se tasi fo’i e malaga mai ma le fa’amoemoe e toe fo’i ese atu, ae a’afia i solitulafono e aafia ai le faia o uiga mataga i fanau laiti po o isi lava ituaiga solitulafono e aafia ai fanau, o le a mafai ona lesitala lona igoa i lalo o le tulafono lenei ina ia mafai ai ona iloa po o fea tonu le nofoaga o le a malaga ma nofo mau ai mo le lumana’i.

O ituaiga solitulafono e mafai ona lesitalaina ai le igoa o se tagata i lalo o le SORNA e aofia ai le ave faamalosi o fanau i soo se matua pe taumafai foi e taofiofi ina ia faia ai ni uiga mataga, falepuipui sese o fanau, fai i ai uiga faasotoma, feusuaiga faamalosi e aofia ai ma le faia i ai o amioga le tau pulea e pei o le fa’aali i ai o itutinosa, faia o amioga faatalitane i fanau e laiti i lalo o le tulafono po o le sili atu foi i luga o latou tausaga.

Afai fo’i e sui le atunuu po o le nofoaga e alu i ai le tagata ua lesitala, e mafai lava i lalo o le tulafono lenei ona iloa le nofoaga ua suia aga’i i ai, ina ia mautinoa e malu puipuia ai fanau laiti mai le nofoaga fou lea ua nofo ai.

Afai e musu le tagata ua nofosala e lesitala lona igoa e tusa ai ma le tulafono, ona logoina loa lea e le Ofisa o le Loia Sili vaega fa’amalosi tulafono, mo le sailia o le nofoaga o lo o nofo ai le tagata ina ia mafai ai ona fa’amalosi le tulafono.

O faamatalaga uma e faatatau i le tagata ua molia, o le a mafai ona maua uma e le Ofisa o le Loia Sili, ina ia mafai ai ona sailia le nofoaga e aga’i atu lea tagata ma nofo ai.

O ni isi o faamatalaga taua e tatau lava ona maua e aofia ai le nofoaga o lo o nofo ai le tagata, o le nofoaga e faigaluega ai.

Afai o se tagata sa falepuipui i Amerika Samoa ona o solitulafono tau feusuaiga i fanau laiti, e tatau ona lesitala o ia ao lei tatalaina i tua mai le falepuipui i Amerika Samoa.

O lenei tulafono o le a taualoa e avea ma tulafono i le tuana’i ai o le 60 aso talu ona tuua le tauaofiaga na pasia ai lenei tulafono.