Ua i luma nei o le maota o sui se pili mo se tulafono taufaaofi, ina ia avea ma solitulafono le faia faalilolilo o suiga i faamaumauga a pisinisi tua, e aofia ai le faasese o faamaumauga, atoa ai ma le faia o ni fesuiaiga i a latou faamaumauga, e le gata o faamaumauga faasaga i le malo ae faapea fo’i i tagata faatau lautele.

Ina ia faaitiitia le tula’i soo mai o mataupu e faatatau i faiga tau faasese ma faiga le tau pulea o lo o aliali mai i ni isi o pisinisi i le teritori, ua manatu ai le Fono Faitulafono e faavae ma suia tulafono ina ia taofia ai faiga le lelei o lo o faia faasaga i le malo, ae faapea ai tagata lautele o lo o aafia i faiga le alofa a tagata faipisinisi o lo o faia lenei amio le alofa, o se fa’auupuga lea i le pili.

Ua le gata i lea, e talitonu le Fono Faitulafono, ua faatupulaia faiga faagaoi ma tulaga tau faasese i faamaumauga a ni isi o pisinisi, ma ua avea lea ma itu ua atugalu ai le Fono ona ua aafia atu ai ma le mamalu lautele o le atunuu i nei faiga.

E manatu le Fono Faitulafono, ua oo i le taimi ua tatau ai ona faia e le malo se faiga ina ia mapu ai ona tagata mai le aafia o faiga le alofa nei, ona o lea ua maitauina le aga’i atu ina matuia nei faiga.

Ua faavaeina nei le tulafono ina ia avea ai le ‘Ofoina o se faamaumauga sese e faila’ o se solitulafono.

O le faia e le tagata o lea solitulafono, o lona faia lea ma lona iloaina lelei o se gaioiga e pei o le sui i faamaumauga poo faamatalaga sa’o ina ia faasese ai se tagata po o se ofisa o le malo.

E soli fo’i e le tagata lea tulafono pe afai ua ia faia nei faamaumauga ma le talitonuga, o le a avea ma faamaumauga i se ofisa o le malo poo le ofisa fo’i o e lesitala ai nei faamaumauga, e ui sa ia iloaina lelei lava o faamaumauga nei ua uma ona ia suia, ma o lea solitulafono o se solitulafono A i le faatulagaina o solitulafono mama.

I le Maga 2 o le tulafono fou e pei ona taua, o le a avea ai ma solitulafono le faia e se tagata o le gaioiga o le ‘Fesuia’i o fa’amaumauga lautele.’

E nofo sala se tagata i lona soliina o lenei tulafono, pe afai na te iloaina lelei lava e le o ia te ia le pule po o se malosi na te faia ai suiga i faamaumauga a le pisinisi, ae sa ia faia lava ma lona iloa lelei atoa ai ma lona loto i ai.

E nofosala fo’i se tasi i le soliina o le tulafono lenei pe afai na te aveesea, toesea, faaleaga, natia, pe faia foi se tusitusiga le sa’o pe suia fo’i ma le le tonu soo se faamaumauga, poo isi lava tusitusiga ua faia, ma tuuina atu i totonu o faamaumauga ua teuina e ofisa a le malo poo isi ona sui.

O lenei solitulafono, o se vaega D lea o solitulafono mamafa e pei ona taua i le tino o lenei tulafono.

Ae mo le Maga 3 o le tulafono e pei ona taua i le tino o lenei tulafono tau faaofi, o le a avea ai ma solitulafono le faia e se tasi o le gaioiga o le ‘Faaseseina o faamaumauga faapisinisi.’

E nofosala se tasi i le faia o lenei solitulafono, pe afai na te faia ma le iloia lona faaseseina o faamaumauga a le pisinisi, e ala i lona aveesea, suia pe titina ese fo’i faamaumauga sa’o a le kamupani sa i ai ae tuu i ai ni faamaumauga sese sa ia faia ma lona iloa lelei.

O faamaumauga e pei ona taua i le tulafono lenei, o soo se faamaumauga lava e faatatau i le pisinisi i luga o komipiuta, poo isi lava fo’i faamaumauga e fesootai ma gaioiga a le pisinisi.

O lea solitulafono o se vaega D o solitulafono mamafa, e pei ona taua i le tino o le tulafono lenei.

Ua taoto atu nei lenei tulafono i le Komiti o Tulafono ma Fa’amasinoga a le maota o sui, mo le faatulagaina i ai o se iloiloga, ona e manatu le maota o sui, o se tulafono taua tele lenei mo le malu puipuia o faamaumauga a pisinisi, atoa ai ma le aua ne’i aafia ai le malo ma tagata lautele.