Ua tuuina atu nei e le faigamalo i luma o le Fono Faitulafono se pili mo se tulafono taufaaofi, e fa’asa ai ona toe faia gaioiga a sui tauva e ono faalavelave ai i tagata palota i nofoaga o le a faia ai palota, e pei o le tufatufaina atu o taumafa e komiti a sui tauva i tagata palota, atoa ai ma le faia o BBQ i nofoaga e latalata i fale palota.

E oo foi i faiga masani o lo o faia e ni isi o sui tauva, e pei o le tuuina atu lea o meaalofa tupe i aiga po o pulega a nuu ma itumalo i le taimi a’o lumana’i ai le palota, e manatu le Ofisa o Palota, atonu o ni isi ia o tu ma aga faa Samoa, ae o le a avea nei faiga ma auala e faalavelave ai i tagata palota mai le faatinoina o a latou palota.

I se tusi sa tuuina atu e le afioga i le kovana le tumau ia Lemanu Peleti Mauga i ta’ita’i o le Fono i le vaiaso nei, o lo o ia faamaninoina ai le taua o lenei mataupu i taimi o faiga palota lautele a le atunuu.

Na taua e Lemanu e faapea, ina ia puipui malu faiga palota a le atunuu i soo se taimi e faataunuuina, ua manatu ai le Ofisa o Palota ina ia faataoto suiga nei e taofia ai le toe faia o gaioiga nei i nofoaga e faatinoina ai palota a le atunuu.

O le isi vaega o le tulafono tau faaofi lea ua i luma nei o le Fono, afai e tutusa le palota mo ni sui se to’alua, e tatau ona faataunuuina le palota faalua (run-off election) i totonu o le 30 mai le aso na maua ai le ulua’i faaiuga, sei vagana ua i ai se tagi e faaulu i le fa’amasinoga e tusa ai o mataupu tau palota.

O lo o taua fo’i i le isi suiga o le tulafono, soo se gaioiga e faia i totonu o le taimi ao lumana’i le palota, e pei o le tuuina atu o taumafa, tupe poo isi lava meaalofa, pe faia fo’i ona o le manatu o ni isi nei o tu ma agaifanua a Samoa, o gaioiga uma nei e le faatagaina i lalo o le tulafono tau palota.

Soo se tasi e faamaonia ua ia solia lea maga o le tulafono, e ala i le tuuina atu o meaai poo tupe ma le faamoemoe e faatosina ai loto o tagata palota i le aso tonu o le palota, o le a molia o ia i lona faia o gaioiga faatosina i taimi o palota.