Ua faaalia e le Faatonusili o le Mataglauega o le Puipuiga o le Vaomatua ma le Gataifale i luma o le Senate e faapea, a’o le’i mae’a lenei tausaga ua faalauiloa e le matagaluega se tulafono e aiaia ai le lapopo’a o i’a e mafai ona fagotaina e le aufai faiva, ina ia puipuia ai le toe soona fagotaina o i’a o loo tua i ai le atunuu i aso fai soo.

Na taua e le afioga i le alii faatonu ia Ufagafa Ray Tulafono i se iloiloga sa faia e le komiti o le Faagaioiga o le malo a le Senate e faapea, e 21 ituaiga i’a eseese o le a aofia ai i totonu o le tulafono lenei.

Na saunoa le afioga Senatoa Levu Tulafono Solaita, e fiafia tele tagata Nuuuli e fagota le i’a lea o le ‘Gatala’, aua e tele i le nofoaga lea o lo o i ai le pala i lo latou nuu, “O nisi aso ou te vaaia ai tagata fagogota o le matou nuu, toeititi atoa le ta’i 10 o tui i’a, ae toeitiiti lata i le ta’i 100 i’a i le tui i’a, ae o le lapopo’a nei o i’a (u’u i luga le peni sa i luga o lana laulau ma faatusa i ai le lapopo’a o i’a), ae ta’i $20 i le tui i’a, ae o i’a nei ou te talitonu e tatau ona toe faasosola i le sami se’i lapopo’a ona faatoa mafai lea ona fagotaina,” o le saunoaga lea a Levu na tali e ia sui o le komiti.

Sa ia taua foi e faapea, o aso ua mavae sa tele lava ni isi o figota na maua i le vaega o lo o i ai le pala i lo latou nuu e pei o ‘Tugane’ aemaise ai le i’a o le ‘gatala’ lea ua seasea toe vaaia i lenei taimi.

Na fia malamalama le alii Senatoa  pe i ai se tulafono e tapu ai le lapopo’a o ituaiga i’a e mafai ona fagota e tagata.

Sa ia fesiligia foi le laupapa a le Matagaluega o le Puipuiga o le Vaomatua ma le Gataifale, lea o lo o faatu i luma ane o le nofoaga o lo o i ai tane suauu tetele i Utulei, o lo o i ai le ata o le i’a i luga o le saini ae o lo o faalava ai ma le ekisi e faailoa atu ai, e faasa ona fagotaina ni i’a i le ogasami lea.

O le finagalo lava fo’i lea na saunoa i ai le afioga i le alii Senatoa ia Fuamatu J.V Fuamatu ina ua maua lona avanoa e saunoa ai.

Na taua e le alii Senatoa e faapea, o nisi o vaaiga o lo o ia maitaua i le tele o aso, o tagata o lo o faatau a latou i’a i totonu o ‘cooler’ i tafa ala, peitai o lo o tuu fesili lona mafaufau po o ni tagata faatau i’a nei mai le teritori po o ni isi mai Samoa tuaoi.

Na taua e Ufagafa le sauni o le tulafono e faamanino i le atunuu ituaiga i’a o le a faatulaga le lapopo’a e mafai ai ona fagotaina, ma o se tasi o i’a e 21 lea o le a faatapulaa le lapopo’a e mafai ai ona fagotaina o le i’a o le ‘Gatala’ e pei ona fesiligia e Levu.

Saunoa Ufagafa e faapea, e le tasi se ituaiga ‘Gatala’ e maua i le sami, ae afai e faamautu le tulafono ua fuafuaina e lona ofisa, ona manino ai loa lea o le ituaiga i’a o le a faatapulaa le lapopo’a e mafai ai ona fagotaina.

I le mataupu e uiga i le faasa lea ona toe fagotaina se i’a i gatai o Utulei ma faasolo atu ai i Fagatogo ma Pago Pago, e mafua lea tulaga ona ua faamaonia i suesuega a lona ofisa, o ia o loo nonofo i le vaega lea o le sami ua oona o latou tino, e mafua mai i u’amea oona o loo taatitia i le manava o le sami, o loo ai e i’a i le tele o taimi.

“Ua faamaonia i suesuega a le ofisa o le EPA, o i’a o loo nonofo i le vaega lea o le sami ua oona, o le mafuaaga lena o le faailoilo o loo faapipii ai, ia taofia ai ona toe fagota e tagata se i’a mai lea nofoaga,” o le saunoaga lea a Ufagafa.

Na fesili le afioga Levu ia Ufagafa, pe faapefea la nisi o tupulaga Fagatogo o loo masani ona ia maitauia o loo latou fagotaina i’a i gatai ane o le maketi atoa ai ma le nofoaga o loo sosoo ane ma le latou ofisa, ae na saunoa Ufagafa e faapea, e le o aafia ai i le tapu lea i’a a’e e pei o le atule ma isi i’a, aua o i’a nei e i ai lava taimi o le tausaga e a’e mai ai ona toe mou atu foi lea, ae o i’a lava o loo nonofo tumau i totonu o le ogasami ma le Fagaloa, o i’a na ua faasa ona toe fagotaina.