E ui i se faitioga mai se sui o le kapeneta a le alii kovana, ma taua ai le faailoga lanu o auala o lo o fa’a faigaluega ai tagata i Manu’a, e le i avea lea ma itu e suia ai fua le auala ua mae’a ona fa’ataoto e fa’a faigaluega ai tagata i Manu’a, e pei ona saunoa le Fa’atonusili o le Matagaluega o Tagata Faigaluega a le malo, susuga Sonny Thompson.

Ina ua fesiligia e le Samoa News le susuga Thompson i le vaiaso na te’a nei e tusa ai o lenei mataupu, na taua ai e Thompson e fa’apea, a le nofomau le tagata i Manu’a na te le mauaina le avanoa faigaluega i Manu’a.

O le aso Lua na te’a nei i le taimi o le fonotaga a le kapeneta, na laga ai e le Fa’atonusili o le Matagaluega o le Puipuiga o le Saogalemu Lotoifale (DHS) ia Utuali’i Iuniasolua Savusa le mataupu e fa’atatau i auala o lo o fa’a faigaluega ai tagata i Manu’a, ma ia taua ai le fa’ailoga lanu o lea faiga.

Na talosaga Utuali’i i le lutena kovana ia Lemanu Peleti Mauga, ina ia toe silasila i auala o lo o fa’a faigaluega ai tagata i Manu’a, ina ia mafai ai fo’i ona agava’a atu ai ma tagata o lo o nonofo mau i Tutuila nei, peita’i o lea fautuaga e le i nofo lelei i le finagalo o Thompson.

Saunoa Thompson i lana tusi e fa’apea, o le agaga autu o le polokalame na fa’atulai e le kovana ma le faigamalo, o le unaia lea o auala e fa’aleleia ai atina’e ma le tamaoaiga o tagata Manu’a, aemaise i auala e sailia ai galuega.

“O le mea moni lava la, afai e le o oe o se tagata e nofo tumau i le motu o Manu’a, e leai se avanoa e te maua ai fua le avanoa faigaluega”, o se vaega lea o le tusi a Thompson sa tuuina mai i le Samoa News.

Sa ia taua fo’i e fa’apea, na mafua ona fa’atula’i e le faigamalo ta’iala faapitoa mo le sailia o tagata e galulue i avanoa faigaluega i Manu’a, ina ia mafai ai ona ave le fa’amuamua mo tagata ua nonofo mau i le motu o Manu’a.

“O le avanoa e galue ai le tagata i galuega i Manu’a, o lo o tuuina atu i tagata ua fa’amaonia le nonofo tumau i totonu o Manu’a”, o le isi lea vaega o le tali a Thompson ina ua fesiligia e le Samoa News e tusa ai o lenei mataupu.

O se tasi o itu na taua e Thompson na lagona ai lona fa’anoaona, o le toe fesiligia lea e se tasi e mafana le la mafutaga o lenei fuafuaga, ma ua ia le iloa ai po o a tonu ni isi auala e tatau ona fai, ina ia mafai ai ona lagolagoina le fuafuaga a le alii kovana ma le faigamalo.

Na faamanino atili foi e Thompson e faapea, o aiaiga i le taiala lea na faataoto ai le sailia o tagata e agavaa mo galuega i Manu’a, e tutusa lelei lava ma le vaega o lo o faataoto i le tulafono i le sailia o ni isi e agavaa i galuega i totonu o Amerika Samoa, e pei o le ave lea o le fa’amuamua mo tagata ua nonofo mau i totonu o Amerika Samoa.