ma le atunu’u e aloaia tautua Faumuina...

Na tutu fa’atasi ta’ita’i o le Tafatolu o le Faigamalo a Amerika Samoa fa’apea ai tagatanu’u i le taeao ananafi, e fa’amanatu ma aloaia le soifua tautua a le afioga i le ali’i senatoa ia Faumuina Tagisiaali’i, e ala i le sauniga fa’alemalo sa faia i le Fale Samoa a le Fono Faitulafono.

Na fa’atusa a le afioga i le ali’i kovana ia Lolo Matalasi Moliga le afioga i le ali’i senatoa ua tu’umalo, “o se ta’ita’i sa ia fa’amaite galuega e tele ua mafua ai ona talatalanoa le atunu’u i lana tautua”, ae na fa’atusa e le Peresetene o le Senate le uso a senatoa, “o se ta’ita’i e toa e le fefe, e le tau mulimuli lona finagalo i manatu o isi senatoa, ae fai lava le mea e finagalo o ia e lelei mo le atunu’u”.

Na fa’atumulia le Fale Samoa a le Fono Faitulafon, i le taimi o le sauniga fa’alemalo, lea na tatala i se sauniga lotu na taitaia e Rev. Afalupetoa Uta’i mai le Ekalesia EFKAS i Vatia, ma viiga o le Atua na lagiina lava e le aufaipese a le Ekalesia.

O le alii kovana ma le peresetene o le Senate, Gaoteote Tofau Palaie, na saunoa e tusa ai o le soifuaga galue o le afioga a Faumuina.

Na taua e Lolo e fa’apea, afai e talatalanoa ni tagata ma moemiti i ni galuega lelei sa faia e se tagata po o se ta’ita’i fo’i, lona uiga o lena ta’ita’i o se ta’ita’i lelei ma fa’atuatuaina.

Saunoa Lolo, o le ali’i senatoa ia Faumuina, o se ta’ita’i ua talanoa i ai le toatele o tagata i ana galuega lelei sa faia mo le atunuu, o se tasi fo’i sa avea ma sui o le auva’a o lo o ta’ita’ia le Sa a Amerika Samoa, e ala i le Fono Faitulafono.

Na fa’afetaia e Lolo le soifua galue o le ali’i senatoa ua tu’umalo, ma ia fa’amalosi atu ai i le Fono Faitulafono ina ia fa’amalolosi pea e alo le Sa o Amerika Samoa, ona o lea ua o o le folauga i taimi faigata o le soifuaga.

Na tali e le mamalu o le aofia ao saunoa le alii peresetene o le Senate mo lana molimau e fa’atatau i le latou mafutaga ma le alii senatoa ua tuumalo.

Na taua e Gaoteote e fa’apea, o Faumuina, o se tagata e ese lava lona lalolagi e soifua ai i totonu o le maota, o se senatoa fo’i e le tau mulimuli lona finagalo i finagalo o isi senatoa.

Na toe fa’amanatu e Gaoteote ni isi o saunoaga a Faumuina ua fai ma tala e talasua ma tali e ai le maota maualuga i le tele o taimi, e pei o lana saunoaga pe a oo i le taimi e sauni ai le maota e pasia se pili taufa’aofi, ona fa’apea lea o Faumuina, “aua le fefe le fefe i le fefe”, lona uiga e pei ona saunoa Gaoteote, “aua le fefe le senatoa e fai le mea lelei mo le atunu’u”.

Na laina tutusa saunoaga fa’amalosi a ta’ita’i o le atunu’u ma le feau na fa’amalosi ai le ta’ita’i o le sauniga e fa’apea, “e leai se isi e maua i ai le ola ma le filemu ua na o le Atua”.

Na fa’ai’u le sauniga fa’alemalo i fa’aaloaloga masani a le fono ma le aiga, ma ua fa’amoemoe o le taeao nei e faia ai ona toe sauniga mulimuli, ma lagomau ai loa le afioga a Faumuina i lona aiga i Malaepapa.