Ua fa'aalia e le Pulesili fou o le falema'i a le LBJ ia Taufete'e John Faumuina i luma o le fonotaga a Samoa e lua lea sa ma’ea i le aso ananafi lona fiafia tele, ina ua mafai ona tutu fa'atasi le falema'i ma le Matagaluega a le Soifua Maloloina a le malo mo le taimi muamua, e fetufaa'i fa'amaumauga i tulaga o gasegase e ono a'afia ai le atunu'u i le lumana'i.

Saunoa Taufete'e e fa'apea, o le maua e le LBJ ma le Soifua Maloloina o lenei avanoa e fefa'asoaa'i ai fa'amaumauga e fa'atatau i gasegase pipisi nei, o se auala lelei fo'i lea e mafai ai ona maua e Samoa e lua le auala e faaaoga ai nei fa'amaumauga, e fesoasoani ai i a latou sailiiliga o lo o faia, i auala eseese e mafai ona foia ai fa'ama'i le pipisi o lo o fai ma tulaga pagatia i Samoa e lua faapea ai atunuu o le pasefika.

"O le agaga autu e mafua ai ona faatulaga a tatou falema'i, ina ia mafai ona ofo atu togafitiga mo i latou ua gasegase, ina ia tausia lelei ma vave ai ona toe fo'i atu latou i tua i aiga", o le saunoaga lea a Taufete'e.

"E leai se malo e fia vaai atu o ola pagatia ona tagata i ni gasegase matuia, o le tiute muamua lena o soo se malo, ia faatulaga ni polokalame e mautinoa e soifua maloloina ai ona tagata nuu, ma ia faia gaioiga uma e mafai ai ona puipuia fa'ama'i pipisi mai fafo atu ona o tagata femalagaa'i solo i atumotu o le pasefika", o le isi lea saunoaga a Taufete'e.

Sa ia faafetaia le fa'amalumaluga tele mai le Fa'alapotopotoga o le Soifua Maloloina a le lalolagi (WHO), ona o polokalame o lo o latou tuuina mai pea e fesoasoani ai i le puipuia ma le fa'aitiitia o isi ituaiga fa'ama'i pipisi i le atunu'u e pei o le lepela ma le mama pala sa tetele i aso ua mavae.

Na alu le tali e a le au usu fono ina ua fa'atusa e Taufete'e le o o mai o faama'i eseese nei, "o le galuega a le tiapolo e le malolo", ae taumafai lava e saili se auala e osofa'i ai le soifua maloloina o tagata soifua.

"O le fautuaga ia tatou uma, aua tatou te nofoa'i pe faatuai, ae tatou galulue pea i auala e puipuia mai ai nai o tatou tagata i faama'i eseese nei, ina ia avea atumotu o Samoa o ni atumotu e soifua maloloina ona tagata", o le isi lea saunoaga a Taufete'e.

E le gata i fa'ama'i pipisi o lo o atugalu i ai ta'ita'i o le soifua maloloina i atumotu uma o le atu Samoa, ae faapena fo'i i faama'i le pipisi e pei o le ma'i suka, kanesa, toto maualuga ma isi lava ituaiga gasegase ua to'atele le atunuu ua a'afia ai, e pei ona taua e Taufete'e i lana saunoaga.

O le aga'i pea i luga o le taugata o le tau e togafiti ai tagata gasegase i le falemai i le taimi nei, na fautuaina ai e Taufete'e au usufono faapea ai tagata uma, ina ia faamalosi e tu'itu'i ma fa'amanatu i tagata o le atunu'u, auala e mafai ona fa'asaoina ai i latou mai le a'afia i gasegase faigata nei.

Sa ia fautuaina foi sui o le Fono Faitulafono o lo o auai i lenei fonotaga, ina ia silasila totoa i tulafono o lo o i ai nei, ma vaavaai i ni auala e faaulufale ai ni tulafono fou e mafai ai ona faamalosia ma faafaigofie ai galuega mo le foiaina o gasegase o lo o a'afia ai le atunu'u.

Na toe faatepa e le pule sili fou o le LBJ le tulaga ua i ai le auaunaga a le fale fa'amama toto i Fagaalu i le taimi nei, talu mai le ulua'i taimi na tatala ai tausaga ua te'a, lea na tula'i mai ai se lu'itau tele i le aufaigaluega, ina ia fesoasoani i tagata e le tatau ona toatele ni isi e fa'amama o latou toto.

Mai tausaga e tele ua mavae, sa galulue faatasi le falemai ina ia faalautele aoaoga mo puipuiga o faamai faigata e pei o le ma'i suka, ina ia aua ai nei vave toatele tagata e faamama a latou toto.

"Mai masini e sefulu ma ona tupu na amata mai ai le tautua a le fale fa'amama toto i Fagaalu, o le taimi nei i le tuanai ai o le sefulu tausaga ua mavae, ua 37 masini ua mafai ona fa'aaoga e fa'amama ai toto o i latou ua a'afia i lea gasegase, o le ata vaaia lena e iloa ai, e le gata ua tupu le tautua ma le auaunaga a le falema'i, ae ua to'atele fo'i le atunuu ua a'afia i le gasegase leaga o le suka ma i'u ina fa'amama atu ai ma o latou toto", o le saunoaga lea a Taufete'e.

Na fa'ai'u le saunoaga a le pule sili fou, i lona fautuaina lea o sui uma o le soifua maloloina i Samoa ma Amerika Samoa, ua o o i le taimi ua tatau ai ona galulue fa'atasi tagata uma e fa'alauiloa fa'amatalaga e fa'atatau i le puipuiga o le soifua mai fa'ama'i faigata ua vaaia i le taimi nei.