Ua fautuaina e le afioga i le ali'i Fa'atonusili o le Ofisa o Fa'atoaga ia Lealao M. Purcell le aufai fa'atoaga lea o lo o fa'asea i le aumai o fua o fa'aeleeleaga mai Samoa i le Farm Fair sa faia i le vaiaso na te'a nei, e tu'u ia le loto leaga ma le tau muimui, ae toaaga e toto fa'atoaga mo le manuia o aiga ma le atunu'u.

"Pau lava le mea o lo o fai e le aufai fa'atoaga tete'e lea a Amerika Samoa, o le tau muimui ma le fai fai poga, soso'o atu ai ma le loto leaga ma le fai tala pepelo, ae leai ma se gaioi e toto ni fa'atoaga mo le manuia o le atunu'u ma aiga", o le saunoaga lea a Lealao i le Samoa News, e tusa ai o fa'asea a ni isi o le aufai fa'atoaga, i le aumai fua o fua o fa'aeleeleaga mai Tonga ma Samoa e fa'alauiloa i le Farm Fair na fa'atoa mavae atu nei, ae le o i latou o ni tagata fai fa'atoaga lesitala i Amerika Samoa.

Na taua fo'i e ni isi o le aufai fa'atoaga a le atunu'u e fa'apea, e le o valaaulia mai lava e Tonga ma Samoa ni isi o le aufai fa'atoaga a le atunu'u, e auai atu i taimi o a latou Farm Fair pe a fai.

Na teena e Lealao le manatu, o fua o faaeleelaga mai Tonga ma Samoa na faalauiloa i le Farm Fair, o mea na aofia i le tauvaga.

"Na mafua ona aumai vaega ia, ina ia fa'ailoa mai ai i le aufai fa'atoaga a le atunu'u ituaiga fua o fa'aeleeleaga o lo o mafai e le aufai faatoaga a Samoa ma Tonga ona toto, ae le o mafai e tatou iinei ona toto", o le isi lea saunoaga a Lealao.

Na taua e le ali'i fa'atonusili e fa'apea, sa ia faamalamalamaina i ni isi o le aufai fa'atoaga i le aso o le Farm Fair le mataupu lenei, lea fo'i na malamalama i ai latou, ae foliga mai e to'aitiiti lava le au vaega fai fa'atoaga o lo o faia le amio lea o le tete'e ma le fa'atuiese i mea e manuia ai le aufai fa'atoaga.

"O fua o fa'aeleeleaga na aumai i Samoa ma Tonga e aofia ai le kapisi uli ma le fala, ae le o mafai e le aufai fa'atoaga a tatou ona toto, e faafefea la ona faitio mai i le aumai o mea nei mai Tonga ma Samoa ae le o mafai ona latou totoina", o le saunoaga lea a le ali'i fa'atonu.

"Pau lava le mea lea e fai e ni isi o le aufai fa'aatoaga a Tutuila, na o le muimui, muimui, muimui, ae o se upu i le o e toto ni fa'atoaga tetele fa'apenei, e lipi ma se mea o faia", o le saunoaga lea a le ali'i fa'atonu, ma ia fautuaina ai loa le aufai fa'atoaga o lo o pito sili ona tete'e i le mataupu lenei, e o muamua e toto ni a latou fa'atoaga tetele ona fa'atoa faitio ai lea ma muimui.

E le i nofo lelei i le finagalo o le ali'i fa'atonusili finagalo o i latou sa fa'asea i lenei mataupu, ona o lona faanaunauga o lo o i ai, o mea uma o lo o taumafai le Ofisa o Fa'atoaga e faia, e faia mo le manuia o le aufai fa'atoaga a le atunu'u, e foliga mai o tagata o lo o pito sili ona muimui, e le o ni fai fa'atoaga moni, ae ua na o ni tagata fai fa'atoaga tau amata.

O se tasi o fa'ata'ita'iga na taua e Lealao e faavae ai lona manatu i le aufai fa'atoaga o lo o fa'asea, na muamua lava fesiligia o ia e ni isi o le aufai fa'atoaga i le aso Lulu na te'a nei, pe aisea ua taofi ai e le Ofisa o Fa'atoaga le toe taliaina o le umala i le 'School Lunch', a o lea e manaomia e le School Lunch le umala.

"Na ou faailoa i le au alii fai faatoaga sa fesili mai ia te a'u, e le o taofia le fa'atauina mai o le umala, e 6,000 pauna o le umala o lo o mana'omia e le School Lunch i vaiaso ta'itasi, lona uiga, e matua mana'omia lava le o e toto le umala ina ia lava ma totoe", o le isi lea saunoaga a Lealao.

Saunoa le ali'i fa'atonu e faapea, e le tatau i le aufai fa'atoaga o lo o faia le amio o le muimui le fa'atele o le tautala, ae tatau ona o muamua e toto ni a latou fa'atoaga ia tele ma lelei, fa'atoa fa'asea ai lea pe afai e fa'aletonu le tautua a le malo.